ମିଛ ତେଲ ବିଲ୍ ଦେଇଥିବା ଅଭିଯୋଗ: ଓଟିଡିସିର ଦୁଇ କର୍ମଚାରୀ ନିଲମ୍ବିତ
ଭୁବନେଶ୍ବର : ମିଛ ତେଲ ବିଲ୍ ଦେଇ ଓଡ଼ିଶା ପର୍ଯ୍ୟଟନ ଉନ୍ନୟନ ନିଗମ(ଓଟିଡିସି)ର ଦୁଇ ଜଣ କର୍ମଚାରୀ ନିଲମ୍ବିତ ହୋଇଛନ୍ତି। ସେମାନେ ହେଲେ ପରିବହନ ମ୍ୟାନେଜର ଅକ୍ଷୟ ମହାଳିକ ଓ ଡ୍ରାଇଭର୍ ଅତୁଲ୍ୟ କୁମାର ମହାନ୍ତି। ଓଟିଡିସି ଅଧ୍ୟକ୍ଷ ବ୍ୟବହାର କରୁଥିବା ଇନୋଭା ଗାଡ଼ିରେ ଗତ ଚାରି ବର୍ଷରେ ପ୍ରାୟ ୩୦ ଲକ୍ଷ ଟଙ୍କାର ତେଲ ପଡ଼ିଥିଲା। ଏ ନେଇ ଅଭିଯୋଗ ହେଲା ପରେ ନିଗମ ପକ୍ଷରୁ ପ୍ରାଥମିକ ଭାବେ ଏହି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି। ଦୁଇ କର୍ମଚାରୀଙ୍କ ବିରୋଧରେ ବିଭାଗୀୟ ଶୃଙ୍ଖଳାଗତ ତଦନ୍ତ ଆରମ୍ଭ ହୋଇଛି।
Sambad is now on WhatsApp
Join and get latest news updates delivered to you via WhatsApp
ଓଟିଡିସି ଅଧ୍ୟକ୍ଷ ଓଡି-୦୨- ଏଡବ୍ଲ୍ୟୁ-୬୦୦୧ ନମ୍ବରର ଇନୋଭା ଗାଡ଼ି ବ୍ୟବହାର କରନ୍ତି। ୨୦୧୮-୧୯ ମସିହାରେ ତତ୍କାଳୀନ ଅଧ୍ୟକ୍ଷଙ୍କ ଗାଡ଼ି ତେଲ ବାବଦକୁ ୪ ଲକ୍ଷ ୯୩ ହଜାର ଟଙ୍କା ଖର୍ଚ୍ଚ ହୋଇଥିଲା। ୨୦୧୯ ଅଗଷ୍ଟ ମାସରେ ଶ୍ରୀମୟୀ ମିଶ୍ର ଅଧ୍ୟକ୍ଷା ଭାବେ ଦାୟିତ୍ବ ଗ୍ରହଣ କରିଥିଲେ। ତାଙ୍କ ଗାଡ଼ିରେ ତେଲ ଖର୍ଚ୍ଚ ବାବଦକୁ ୨୦୧୯-୨୦ରେ ୭,୩୦,୦୧୧ ଟଙ୍କା, ୨୦୨୦-୨୧ରେ ୭,୯୨,୯୨୯ ଟଙ୍କା ଓ ୨୦୨୧-୨୨ରେ ୯,୪୨,୬୬୩ ଟଙ୍କା ଖର୍ଚ୍ଚ ହୋଇଛି। ଏମିତିରେ ଚାରି ବର୍ଷରେ ପାଖାପାଖି ୩୦ ଲକ୍ଷ ଟଙ୍କା ତେଲ ବାବଦକୁ ଖର୍ଚ୍ଚ ହୋଇଛି।