ବାରଙ୍ଗ : ନନ୍ଦନକାନନ ପ୍ରାଣୀ ଉଦ୍ୟାନର ୩୨ ନମ୍ବର ‘ଗ’ ଖୁଆଡ଼ରେ ଧଳା ବାଘୁଣୀ ବିଜୟା (୮) ଆଜି ଦୁଇଟି ଶାବକଙ୍କୁ ଜନ୍ମ ଦେଇଛି। ସକାଳ ପ୍ରାୟ ୭ଟା ୫ ମିନିଟ୍ରେ ପ୍ରଥମ ଶାବକ ଓ ସକାଳ ୮ଟା ବେଳେ ସେ ଦ୍ୱିତୀୟ ଶାବକ ପ୍ରସବ କରିଥିଲା। ଶାବକଦ୍ୱୟ ମଧ୍ୟରେ ଗୋଟିଏ ଧଳା ଓ ଗୋଟିଏ ସାଧାରଣ ରଙ୍ଗର ବୋଲି ନନ୍ଦନକାନନ ଉପନିର୍ଦ୍ଦେଶକ ଜୟନ୍ତ କୁମାର ଦାସ ସୂଚନା ଦେଇଛନ୍ତି। ମା’ ବାଘୁଣୀ ଓ ନବଜାତକ ଦ୍ୱୟ ସୁସ୍ଥ ଅଛନ୍ତି। ବିଜୟା ଶାବକଦ୍ୱୟଙ୍କ ଠିକ୍ ଭାବେ ଯତ୍ନ ନେଉଛି। ପେଟ ତଳେ ରଖି କ୍ଷୀର ପାନ କରାଉଥିବା ଉପନିର୍ଦ୍ଦେଶକ ହରିଶଙ୍କର ଉପାଧ୍ୟାୟ ଜନ୍ତୁ ରକ୍ଷକଙ୍କୁ ପଚାରି ବୁଝିଛନ୍ତି। ଗତ ଜୁନ୍ ୯ ଓ ୧୦ତାରିଖ ଦୁଇ ଦିନ ଧରି ସାଧାରଣ ରଙ୍ଗର ମହାବଳ ବାଘ ରୋଶନ୍(୧୬) ସହ ମିଳନରୁ ବିଜୟା ଗର୍ଭଧାରଣ କରିଥିଲା।
Sambad is now on WhatsApp
Join and get latest news updates delivered to you via WhatsApp
ବିଜୟା ଏଥରକୁ ମିଶାଇ ଦୁଇଥର ଗର୍ଭ ଧାରଣ ପରେ ମୋଟ ୪ଟି ଶାବକ ପ୍ରସବ କରିଛି। ଉଭୟଙ୍କ ମିଳନରୁ ୨୦୧୬ ଅଗଷ୍ଟ ୯ ତାରିଖରେ ସାଧାରଣ ରଙ୍ଗର ବାଘୁଣୀ ଆଦିତି ଓ ଧଳା ରଙ୍ଗର ବାଘ ସାହିଲର ଜନ୍ମ ହୋଇଥିଲା। ଆଜି ଶାବକ ଦୁଇଟି ଜନ୍ମ ହେବା ଫଳରେ ନନ୍ଦନକାନନର ମୋଟ ବାଘ ସଂଖ୍ୟା ୨୬କୁ ବୃଦ୍ଧି ପାଇଛି। ଏମାନଙ୍କ ମଧ୍ୟରେ ସାଧାରଣ ରଙ୍ଗର ୧୪ଟି (ମାଈ ୯ଟି ଓ ୫ଟି ପୁରୁଷ), ଧଳା ରଙ୍ଗର ୮ଟି (ମାଈ୪ ଓ ପୁରୁଷ ୪), ବିରଳ କଳା ରଙ୍ଗର ୨ଟି ଓ ଆଜି ଜନ୍ମିତ ଲିଙ୍ଗ ଚିହ୍ନଟ ହୋଇନଥିବା ୨ଟି ଶାବକ ଅଛନ୍ତି। ବାଘୁଣୀ ବିଜୟା ୨୦୧୦ ମାର୍ଚ୍ଚ ୧ ତାରିଖରେ ଧଳା ରଙ୍ଗର ବାଘୁଣୀ କୁସୁମ ଓ ସାଧାରଣ ରଙ୍ଗର ମହାବଳ ବାଘ ନିଶାନର ମିଳନରୁ ଜନ୍ମ ଲାଭ କରିଥିଲା। ତା’ ଜୀବନ ସାଥୀ ରୋଶନ୍ ଦୃଷ୍ଟିହୀନ। ଗତ ୨୦୦୨ ନଭେମ୍ବର ୫ରେ ନନ୍ଦନକାନନର ଧଳା ବାଘୁଣୀ ଶ୍ରେୟା ଓ ସାଧାରଣ ରଙ୍ଗର ମହାବଳ ରାମଙ୍କ ମିଳନରୁ ରୋଶନ୍ର ଜନ୍ମ ହୋଇଥିଲା।