ଡାଆଣୀ ସନ୍ଦେହରେ ଟ୍ରିପଲ୍ ମର୍ଡର ମାମଲା : ଦୁଇ ହତ୍ୟାକାରୀଙ୍କୁ ଆଜୀବନ କାରାଦଣ୍ଡ
ରାଇରଙ୍ଗପୁର : ମୟୂରଭଞ୍ଜ ଜିଲ୍ଲା ବାଦାମପାହାଡ଼ ଥାନା ଝିପାବନ୍ଧ ଗ୍ରାମର ବହୁଚର୍ଚ୍ଚିତ ଟ୍ରିପଲ୍ ମର୍ଡର ମାମଲାର ରାୟ ଆଜି ପ୍ରକାଶ ପାଇଛି। ୨୦୧୭ ମସିହାରେ ଡାଆଣୀ ସନ୍ଦେହରେ ସଂଘଟିତ ଏହି ଲୋମଟାଙ୍କୁରା ହତ୍ୟା ଘଟଣାରେ ଦୁଇ ଅଭିଯୁକ୍ତ ଅର୍ଜୁନ ସିଙ୍କୁ ଓ ଗୁରୁଚରଣ କାରୁଆଙ୍କୁ ଆଜୀବନ କାରାଦଣ୍ଡରେ ଦଣ୍ଡିତ କରିଛନ୍ତି ରାଇରଙ୍ଗପୁର ଅତିରିକ୍ତ ଜିଲ୍ଲା ଦୌରାଜଜ୍ ଅନୁପ ରଞ୍ଜନ ପଟ୍ଟନାୟକ। ଜେଲ ଦଣ୍ଡ ସହ ଉଭୟଙ୍କୁ ୧୦ ହଜାର ଟଙ୍କା ଜରିମାନା ମଧ୍ୟ କରାଯାଇଛି। ଜରିମାନା ଅନାଦେୟ ଅତିରିକ୍ତ ୬ ମାସ କାରାଦଣ୍ଡ ଭୋଗିବାକୁ ରାୟରେ ଉଲ୍ଲେଖ ରହିଛି।
Sambad is now on WhatsApp
Join and get latest news updates delivered to you via WhatsApp
୨୦୧୭ ମସିହା ଜୁଲାଇ ୧୮ ତାରିଖରେ ଝିପାବନ୍ଧ ଗ୍ରାମର ମଧୁସୂଦନ ସିଙ୍କୁଙ୍କ ପତ୍ନୀ ରିଙ୍କି ସିଙ୍କୁ (୩୫) ତାଙ୍କର ଦୁଇ ପୁଅ ଜଗନ୍ନାଥ (୧୦) ଓ ଯଶୋବନ୍ତ (୩)ଙ୍କୁ ନେଇ ବାପଘର ରାଇପଡ଼ାକୁ ବାହରିଥିଲେ। ହେଲେ ବାପଘରେ ପହଞ୍ଚିଲେନି। ପରିବାର ଲୋକେ ବହୁ ଖୋଜାଖୋଜି କରିବା ପରେ ୨୧ ତାରିଖ ଦିନ ଝିପାବନ୍ଧ ଜଙ୍ଗଲ ଭିତରୁ ମା ଓ ଦୁଇ ପୁଅଙ୍କ ମୃତଦେହ ମିଳିଥିଲା। ସ୍ୱାମୀ ମଧୁସୂଦନଙ୍କ ଅଭିଯୋଗ ମୁତାବକ ସେହି ଗ୍ରାମର ଅର୍ଜୁନ ସିଙ୍କୁ ଓରଫ ବିଜୟ (୨୭) ଓ ଗୁରୁଚରଣ କାରୁଆ (୨୨) ତାଙ୍କ ପତ୍ନୀ ରିଙ୍କିଙ୍କୁ ଡାଆଣୀ ବୋଲି ସନ୍ଦେହ କରି ଆସୁଥିଲେ। ତେଣୁ ଦୁହେଁ ମିଶି ତାଙ୍କ ପତ୍ନୀ ଓ ଦୁଇ ଛୁଆଙ୍କୁ ହତ୍ୟା କରିଥିବା ନେଇ ସେ ବାଦାମପାହାଡ଼ ଥାନାରେ ଅଭିଯୋଗ କରିଥିଲେ। ଏ ନେଇ ପୁଲିସ କେସ୍ ନଂ ୨୨/୧୭ରେ ଏକ ମାମଲା ରୁଜୁ କରି ଦୁଇ ଅଭିଯୁକ୍ତଙ୍କୁ ଗିରଫ କରି କୋର୍ଟ ଚାଲାଣ କରିଥିଲା। ଜିଆର୍ କେସ୍ ନଂ ୨୯୯/୧୭ ଓ ଏସଟି ନଂ ୩୦/୧୮ କ୍ରମେ ଏହି ମାମଲା ରାଇରଙ୍ଗପୁର ଅତିରିକ୍ତ ଜିଲ୍ଲା ଦୌରାଜଜ୍ଙ୍କ କୋର୍ଟରେ ବିଚାରାଧୀନ ଥିଲା। ଅତିରିକ୍ତ ପିପି ପଙ୍କଜ ଦାସ ମାମଲା ପରିଚାଳନା କରିଥିଲେ।