ତାଳଚେର ଜେଲ୍ରେ ସୁରକ୍ଷା ଢିଲା ଘଟଣା: ନିଲମ୍ବିତ ହେଲେ ଦୁଇ ୱାର୍ଡର୍
ତାଳଚେର : ଡ୍ୟୁଟି ସମୟରେ ଶୋଇବା ଘଟଣାରେ ତାଳଚେର ସହର ଉପଖଣ୍ଡ କାରାଗାର କର୍ତ୍ତୃପକ୍ଷ ଆଜି ଦୁଇ ୱାର୍ଡର୍ଙ୍କୁ ନିଲମ୍ବିତ କରିଛନ୍ତି।
Sambad is now on WhatsApp
Join and get latest news updates delivered to you via WhatsApp
ସୂଚନା ମୁତାବକ, ତାଳଚେର ଉପକାରାଗାରରେ ୱାର୍ଡର୍ ରୂପେ କାର୍ଯ୍ୟରତ ସୁନୀଲ ମଲ୍ଲିକ ଏବଂ ତ୍ରିଲୋଚନ ଭୋଇ ଜେଲ୍ର ମୁଖ୍ୟଦ୍ବାର ପାଖରେ ଶୋଇଥିଲେ। ଜଣେ ଗୋଟିଏ ଚୌକିରେ ବସି ଆଉ ଏକ ଚୌକିକୁ ଗୋଡ଼ ଲମ୍ବାଇ ଶୋଇଥିବା ବେଳେ ଅନ୍ୟ ଜଣେ ପିନ୍ଧିଥିବା ବିଭାଗୀୟ ସାର୍ଟ ଖୋଲି ଫାଟକ ପାଖରେ ଥିବା ଟେବୁଲ ତଳେ ଶୋଇଥିଲେ। ଏହି ଟେବୁଲ ଉପରେ କାରାଗାରର ଗୁରୁତ୍ବପୂର୍ଣ୍ଣ କାଗଜପତ୍ର ରହିଥିଲା। ଏହାର କିଛି ଫଟୋ ସାମାଜିକ ଗଣମାଧ୍ୟମରେ ଭାଇରାଲ ହୋଇଥିଲା। ଏ ସଂପର୍କରେ ‘ସମ୍ବାଦ’ରେ ଆଜି ‘ତାଳଚେର ଜେଲ୍ରେ ସୁରକ୍ଷା ଢିଲା’ ଶୀର୍ଷକ ଖବର ପ୍ରକାଶ ପାଇଥିଲା। ତାଳଚେର ଉପକାରାଗାର ଅଧୀକ୍ଷକ ଦିଲୀପ କୁମାର ବେହେରା କହିଛନ୍ତି, କାର୍ଯ୍ୟରତ ସମୟରେ ସୁନୀଲ ଓ ତ୍ରିଲୋଚନ ଶୋଇଥିଲେ। କର୍ତ୍ତବ୍ୟରେ ଅବହେଳା ପାଇଁ ଦୁହିଁଙ୍କୁ କାର୍ଯ୍ୟରୁ ନିଲମ୍ବିତ କରାଯାଇଛି।