ବାଇକ ଦୁର୍ଘଟଣାରେ ଜଣେ ମୃତ: ୨ ଯୁବକ ଗୁରୁତର

ରାଇରଙ୍ଗପୁର/ବାଦାମପାହାଡ଼: ମୟୂରଭଞ୍ଜ ଜିଲ୍ଲାର ବାଦାମପାହାଡ଼ ଥାନା ଝିପାବନ୍ଦ ଗ୍ରାମ ନିକଟରେ ଥିବା ବନ୍ଦ ନିକଟରେ ବାଇକ ଦୁର୍ଘଟଣାରେ ଜଣେ ଯୁବକ ମୃତ୍ୟୁ ହୋଇଛି। ଅନ୍ୟ ଦୁଇ ଜଣ ଯୁବକ ଗୁରୁତର ଆହତ ହୋଇଥିବା ଜଣାପଡିଛି।

ସୂଚନାଯୋଗ୍ୟ କି ମଙ୍ଗଳବାର ସନ୍ଧ୍ୟା ସମୟରେ ଉକ୍ତ ବାଦାମପାହାଡ଼ ଥାନା ଝିପାବନ୍ଦ ଗ୍ରାମର ସୀମା ତିରିଆ (୨୫), ବିଜୟ ମହାକୁଡ଼ (୨୭) ଓ ସର୍ଗତ ଅଟଳ ମହାକୁଡ଼ର ପୁତ୍ର ଶମ୍ଭୁ ମହାକୁଡ଼ (୩୦) ଏକ ବାଇକ୍‌ରେ ଗେଂତେଇସାହିରୁ ଘରକୁ ଫେରିଥିଲେ। ଗ୍ରାମରୁ ଅଳ୍ପ ଦୂରରେ ଥିବା କାଦବନ୍ଧ ନିକଟରେ ଭାରସାମ୍ୟ ହରାଇ ରାସ୍ତାକଡ଼ରେ ଖସି ଯାଇଥିଲେ। ଫଳରେ ସମସ୍ତେ ଗୁରୁତର ଆହତ ଅବସ୍ଥାରେ ପଡ଼ିଥିଲେ। ସ୍ଥାନୀୟ ଜନସାଧାରଣ ତୁରନ୍ତ ଆମ୍ବୁଲାନ୍ସ ଯୋଗେ ତିନି ଜଣଙ୍କୁ ରାଇରଙ୍ଗପୁର ଉପଖଣ୍ଡ ସରକାରୀ ଡାକ୍ତରଖାନା ପହଞ୍ଚାଇ ଥିଲେ। ଡାକ୍ତରଖାନାରେ ଡାକ୍ତର ଶମ୍ଭୁକୁ ମୃତ ଘୋଷଣା କରିଥିବା ବେଳେ ଅନ୍ୟ ଦୁଇ ଆହତଙ୍କୁ ଜିଲ୍ଲା ସଦର ମହକୁମା ବାରିପଦା ସ୍ଥିତ ପଣ୍ଡିତ ରଘୁନାଥ ମୁର୍ମୁ ମେଡ଼ିକାଲ କଲେଜ ଓ ଜିଲ୍ଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତରିତ କରାଯାଇଛି। ଶମ୍ଭୁଙ୍କ ସ୍ତ୍ରୀ ସହିତ ଦୁଇ ଛୋଟ ସନ୍ତାନ ଥିବାର ଜଣାଯାଇଛି। ଶବ ବ୍ୟବଚ୍ଛେଦ ହେବା ପରେ ପରିବାର ଲୋକଙ୍କୁ ହସ୍ତାନ୍ତର କରାଯାଇଛି।