ସମ୍ବଲପୁର: ଟ୍ରକ୍ ଧକ୍କାରେ ୨ ମୃତ, ୨ ଗୁରୁତର
ଯୁଯୁମୁରା/ରେଢ଼ାଖୋଲ: ସମ୍ବଲପୁର ଜିଲ୍ଲାର ରେଢ଼ାଖୋଲ ଓ ଯୁଯୁମୁରା ନିକଟରେ ଆଜି ଟ୍ରକ ଚାପାରେ ୨ ଜଣ ଯୁବକଙ୍କ ମୃତ୍ୟୁ ଘଟିଥିବା ବେଳେ ୨ ଜଣଙ୍କୁ ଗୁରୁତର ଅବସ୍ଥାରେ ଡାକ୍ତରଖାନାରେ ଭର୍ତ୍ତି କରାଯାଇଛି। ମୃତକମାନେ ହେଲେ ମନୋଜ ନାୟକ (୨୫) ଓ କଳ୍ପତରୁ ବେହେରା (୨୬)।
Sambad is now on WhatsApp
Join and get latest news updates delivered to you via WhatsApp
ସୂଚନା ଅନୁସାରେ ମାନେଶ୍ୱର ଅଞ୍ଚଳର ମିର୍ଗାମୁଣ୍ଡା ଗାଁର ମନୋଜ ନାଏକ ଆଜି ନିଜର ଅନ୍ୟ ୨ ସାଙ୍ଗ ସୁଧୀର ମିର୍ଦ୍ଧା ଓ ରାହୁଲ ଓରାମଙ୍କ ସହିତ ପିଉଷୀଙ୍କ ଗାଁରେ ଚାଲିଥିବା ବାଦିପାଲା ଦେଖିବାକୁ ଏକ ସ୍କୁଟର (ଓଡି ୧୫ଏମ୍-୭୨୦୨)ରେ ଯାଉଥିଲୋ। ଏହି ସମୟରେ ଏକ ଟ୍ରକ (ଡବ୍ଲୁବି ୩୩ଇ-୦୯୦୨) ଧକ୍କା ଦେଇ ଘଟଣାସ୍ଥଳରୁ ଫେରାର ହୋଇଯାଇଥିଲା। ସମସ୍ତଙ୍କୁ ଜିଲ୍ଲା ମୁଖ୍ୟ ଡାକ୍ତରଖାନାରେ ଭର୍ତ୍ତି କରାଯାଇଥିଲା। ପରେ ମନୋଜଙ୍କୁ ବୁର୍ଲା ସ୍ଥାନାନ୍ତର କରାଯାଇଥିଲା। କିନ୍ତୁ ମନୋଜଙ୍କୁ ଡାକ୍ତର ମୃତ ଘୋଷଣା କରିଥିଲେ। ପୁଲିସ ଟ୍ରକକୁ ଜବତ କରି ମାମଲା ରୁଜୁ କରିଥିବା ବେଳେ ଚଳାକ ଓ ହେଲପର ଫେରାର ଅଛନ୍ତି।
ରେଢ଼ାଖୋଲ ଥାନା ଅନ୍ତର୍ଗତ ବୈଷ୍ଣବଝୁଲି ଗ୍ରାମ ଦେଇ ଯାଇଥିବା ୫୫ ନମ୍ବର ଜାତୀୟ ରାଜପଥ ଉପରେ ଆଜି ସନ୍ଧ୍ୟା ପ୍ରାୟ ୭ଟାରେ ଲୁହାପଙ୍କ ପଂଚାୟତର କୁସୁମଖୋଲ କଳ୍ପତରୁ ଛିଡ଼ା ହୋଇଥିଲେ। ଏହି ସମୟରେ କଟକ ପଟରୁ ସମ୍ବଲପୁର ଅଭିମୁଖେ ଯାଉଥିବା ଟ୍ରକ କଳ୍ପତରୁଙ୍କୁ ଧକ୍କା ଦେଇ ଘଟଣାସ୍ଥଳରୁ ଫେରାର ହୋଇଯାଇଥିଲା। ଦୁର୍ଘଟଣାର ଶିକାର ହେବା ପରେ ସ୍ଥାନୀୟ ଲୋକେ ଛଟପଟ ହେଉଥିବା କଳ୍ପତରୁଙ୍କୁ ରୋଢାଖୋଲସ୍ଥିତ ଉପଖଣ୍ଡ ଡାକ୍ତରଖାନାରେ ଭର୍ତ୍ତି କରିଥିଲେ। କଳ୍ପତରୁଙ୍କୁ ଡାକ୍ତର ମୃତ ଘୋଷଣା କରିଥିଲେ। ସୂଚନା ପାଇ ପୁଲିସ ମୃତଦେହ ଜବତ କରିଥିବା ବେଳ ଆସନ୍ତାକାଲି ମୃତଦେହ ପୋଷ୍ଟମର୍ଟମ ହେବ। ଦୁର୍ଘଟଣା ପରେ ଟ୍ରକ ଚାଳକ ଫେରାର ହୋଇଯାଇଥିଲା।