ଉମରକୋଟ: ପୈତୃକ ସମ୍ପତ୍ତି ଭାଗବଣ୍ଟାକୁ ନେଇ ନିଜ ଝିଆରୀକୁ ହତ୍ୟା କଲା ଦାଦା । ଏପରି ଏକ ଗୁରୁତର ଅଭିଯୋଗ ଆସିଛି ନବରଙ୍ଗପୁର ଜିଲ୍ଲା ଉମରକୋଟ ଥାନା ଇନ୍ଦ୍ରପୁରୀ ୟୁଭି-୫୪ ଗାଁରେ। ମୃତକ ଝିଆରୀ ହେଲେ ଜ୍ୟୋତିରାଣୀ ମଣ୍ଡଳ(୨୨)। ସୂଚନା ମୁତାବକ ଜ୍ୟୋତିରାଣୀଙ୍କ ବାପା ମୃତ୍ୟୁବରଣ କରିସାରିଥିବାବେଳେ ୨ ଭଉଣୀ ଓ ତାଙ୍କ ମା ଗୋଟିଏ ଘରେ ରହୁଛନ୍ତି। ତାଙ୍କ ପୈତୃକ ଜମି ୫ ଏକର ରହିଥିବା ବେଳେ ଏହି ଜମି ଭାଗ ବଣ୍ଟା ହୋଇପାରିନଥିଲା। ଯାହା ଫଳରେ ଅନେକ ଥର ତାଙ୍କ ଦାଦା ଓ ତାଙ୍କ ପରିବାର ମଧ୍ୟରେ କଳହ ହୋଇଛି।
Sambad is now on WhatsApp
Join and get latest news updates delivered to you via WhatsApp
ଅଭିଯୋଗ ଅନୁଯାୟୀ ଗତକାଲି ରାତିରେ ଦାଦା ଭଳାନାଥ ମଣ୍ଡଳ ତାଙ୍କ ଘରେ ପଶି ମାରଧର କରିବା ସହ ମାରିଦେବା ପାଇଁ ଟାଙ୍ଗିଆ ଆଣିବା ପାଇଁ ଯାଇଥିଲେ। ଦାଦା ଭୟରେ ମା ଓ ୨ ଭଉଣୀ ଘରୁ ବାହାରକୁ ଦୌଡି ପଳାଇଥିଲେ। ଏ ସମୟରେ ପୁଲିସକୁ ବି ଖବର ଦେଇଥିଲେ।
ପୁଲିସ ଆସିବା ପରେ ସବୁକିଛି ଶାନ୍ତ ଥିବାବେଳେ ପୁଲିସ ଗଲା ପରେ ସକାଳୁ ଜ୍ୟୋତିର ମୃତଦେହ ଗାଁ ମଧ୍ୟରେ ହିଁ ଦେଖିବାକୁ ଲୋକେ ପାଇଥିଲେ। ଏ ନେଇ ଉମରକୋଟ ଥାନାରେ ଖବର ଦେବା ପରେ ଉମରକୋଟ ପୁଲିସ ଘଟଣା ସ୍ଥଳରେ ପହଞ୍ଚି ଜେଜେବାପାକୁ ଥାନାକୁ ଆଣି ଅଟକ ରଖିଛି। ସାଇଣ୍ଟିଫିକ୍ ଟିମ୍ ଓ ସନ୍ଧାନୀ କୁକୁର ଘଟଣାସ୍ଥଳରେ ପହଞ୍ଚି ତଦନ୍ତ ଚଳାଇଛି।