ମାହାଙ୍ଗା ଶ୍ରଦ୍ଧାଞ୍ଜଳି ସଭାରେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ: କୁଳମଣି, ଦିବ୍ୟସିଂହଙ୍କ ବଳିଦାନ ବ୍ୟର୍ଥ ଯିବନାହିଁ
ଘଟଣା ସମ୍ପର୍କରେ ପ୍ରଧାନମନ୍ତ୍ରୀଙ୍କୁ ଅବଗତ କରାଯାଇଛି, ସାହିତ୍ୟ ସଂସ୍କୃତି ପାଇଁ ପ୍ରସିଦ୍ଧ ମାହାଙ୍ଗା ହିଂସା ଓ ଦୁର୍ନୀତିର ପ୍ରୟୋଗଶାଳା
କଟକ/ମାହାଙ୍ଗା: ମାହାଙ୍ଗା ଅଞ୍ଚଳରେ ସର୍ବଦା ଗରିବଙ୍କ ସେବା କରୁଥିବା ଦିବଙ୍ଗତ ବିଜେପି ନେତା କୁଳମଣି ବରାଳ ଓ ଦିବ୍ୟସିଂହ ବରାଳଙ୍କ ବଳିଦାନ ବ୍ୟର୍ଥ ଯିବନାହିଁ। ଦୁଇ ଜଣଙ୍କୁ ଯେଭଳି ବୀଭତ୍ସ ଭାବେ ହତ୍ୟା କରାଯାଇଛି, ସେ ସମ୍ପର୍କରେ ପ୍ରଧାନମନ୍ତ୍ରୀଙ୍କୁ ଅବଗତ କରାଯାଇଛି। ଉଭୟଙ୍କ ଏକାଦଶାହ ଅବସରରେ ଆୟୋଜିତ ଶ୍ରଦ୍ଧାଞ୍ଜଳି ସଭାରେ ଯୋଗଦେଇ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଏହିଭଳି ବକ୍ତବ୍ୟ ଦେବା ସହିତ ସ୍ଥାନୀୟ ବିଧାୟକ ତଥା ମନ୍ତ୍ରୀ ପ୍ରତାପ ଜେନାଙ୍କୁ ସିଧାସଳଖ ଟାର୍ଗେଟ କରିଛନ୍ତି।
Sambad is now on WhatsApp
Join and get latest news updates delivered to you via WhatsApp
ଶ୍ରୀ ପ୍ରଧାନ କହିଛନ୍ତି ଯେ ରାଜନୀତିରେ ଦଳ ବଦଳ, ମତ ବଦଳ, ମନ ବଦଳ ହୁଏ। କିନ୍ତୁ ଏଭଳି ହିଂସାର ସ୍ଥାନ ନଥାଏ। ଏଭଳି ବୀଭତ୍ସ ଘଟଣା ପରେ ମନ୍ତ୍ରୀ ତଥା ସ୍ଥାନୀୟ ବିଧାୟକ ଯେଉଁଭଳି ଭାବେ ଭଡ଼ାଟିଆଙ୍କୁ ଲଗାଇ କୁଶପୁତ୍ତଳିକା ଦାହ କରୁଛନ୍ତି ଓ ଏଥିରେ ନାଗରିକ ମଞ୍ଚକୁ ଲଗାଇଛନ୍ତି, ତାହା ଦୁର୍ଭାଗ୍ୟଜନକ। ମନ୍ତ୍ରୀ ନିଜ ଅହଂକାର ଘରେ ରଖନ୍ତୁ। ପ୍ରଜାତନ୍ତ୍ରରେ ଅଂହକାରର ସ୍ଥାନ ନାହିଁ। ମନ୍ତ୍ରୀଙ୍କ ଭଡ଼ାଟିଆ ଭାବେ କୁଶପତ୍ତଳିକା ଦାହ କରୁଥିବା ବ୍ୟକ୍ତି ବି ଥରେ ନିଜ ନିଜ ବିବେକକୁ ପଚାରନ୍ତୁ ବୋଲି ସେ କହିଛନ୍ତି।
କେନ୍ଦ୍ରମନ୍ତ୍ରୀ ଶ୍ରୀ ପ୍ରଧାନ ଆହୁରି ମଧ୍ୟ କହିଛନ୍ତି ଯେ, ପ୍ରଧାନମନ୍ତ୍ରୀ ଆବାସ ଦୁର୍ନୀତି ଘଟଣା ସଂପର୍କରେ କୁଳମଣି ବାବୁ ତାଙ୍କୁ ଅନେକଥର ଭେଟି ସୂଚନା ଦେଇଛନ୍ତି। ଏହି ପ୍ରସଙ୍ଗକୁ ନେଇ ବିଧାନସଭାରେ ବି ତୁମ୍ବିତୋଫାନ ହୋଇଥିଲା। ସେହି କାରଣରୁ ଏଭଳି ବୀଭତ୍ସଭାବେ କୁଳମଣି ଓ ତାଙ୍କ ସହଯୋଗୀଙ୍କୁ ହତ୍ୟା କରାଗଲା। କିନ୍ତୁ ଏହି ହତ୍ୟାକାଣ୍ଡକୁ କେତେବେଳେ ପାରିବାରିକ ତ କେତେବେଳେ ପୂର୍ବଶତ୍ରୁତାରୁ ଆଖ୍ୟା ଦେଇ ମତ ବଦଳାଉଛନ୍ତି ମନ୍ତ୍ରୀ। ଦିନେ ବୈଷ୍ଣବ ପାଣିଙ୍କ ପାଇଁ ଯେଉଁ ମାଟି କଳା, ସାହିତ୍ୟ, ସଂସ୍କୃତିକୁ ନେଇ ପ୍ରସିଦ୍ଧ ଥିଲା, ଏବେ ସେହି ଅଂଚଳ ରାଜୈନିତକ ହିଂସା ଓ ଦୁର୍ନୀତିର ପ୍ରୟୋଗଶାଳା ପାଲଟିଛି। କିନ୍ତୁ ଏହି ଘଟଣାରେ କଂଗ୍ରେସ ରାଜ୍ୟ ସଭାପତି ଓ ଅନ୍ୟ ନେତାମାନେ ଦୁଇ ଦିବଙ୍ଗତଙ୍କ ପରିବାର ପାଖରେ ପହଞ୍ଚି ସମବେଦନା ଜଣାଇଥିବାରୁ ସେମାନଙ୍କୁ କୃତଜ୍ଞତା ଜଣାଉଛି ବୋଲି ଶ୍ରୀ ପ୍ରଧାନ କହିଥିଲେ।
ବରିଷ୍ଠ ନେତା ଦିଲ୍ଲୀପ ମଲ୍ଲିକଙ୍କ ସଂଯୋଜନାରେ ଆୟୋଜିତ ଏହି ଶ୍ରଦ୍ଧାଞ୍ଜଳି ସଭାରେ ‘ସ୍ମୃତିତୀର୍ଥ’ ସ୍ମରଣିକା ଉନ୍ମୋଚିତ ହୋଇଥିଲା।
ଶ୍ରଦ୍ଧାଞ୍ଜଳି ସଭାରେ ପୂର୍ବତନ ଡିଜି ତଥା ବରିଷ୍ଠ ନେତା ପ୍ରକାଶ ମିଶ୍ର, ରାଜ୍ୟ ସାଧାରଣ ସମ୍ପାଦକ ପୃଥ୍ୱୀରାଜ ହରିଚନ୍ଦନ, ଲେଖାଶ୍ରୀ ସାମନ୍ତସିଂହାର, ବିଜେପି ମୁଖ୍ୟ ସଚେତକ ମୋହନ ମାଝୀ, ବରିଷ୍ଠ ଆଇନଜୀବୀ ପିତାମ୍ବର ଆଚାର୍ଯ୍ୟ, ବିଧାୟକ ନାଉରି ନାଏକ, ସୁବାସ ପାଣିଗ୍ରାହୀ, ସୁକାନ୍ତ ନାଏକ, ଲଳିତେନ୍ଦୁ ବିଦ୍ୟାଧର ମହାପାତ୍ର, ରବି ନାଏକ, ଜିଲ୍ଲା ବିଜେପି ସଭାପତି ତଥା ପୂର୍ବତନ ବିଧାୟକ ପ୍ରକାଶ ବେହେରା, ମାହାଙ୍ଗା ନେତା ଶାରଦା ପ୍ରଧାନ, ରାଜ୍ୟ ଯୁବ ମୋର୍ଚ୍ଚା ସଭାପତି ଇରାଶିଷ ଆଚାର୍ଯ୍ୟ,ରାଜ୍ୟ ମହିଳା ମୋର୍ଚ୍ଚା ସଭାନେତ୍ରୀ ସ୍ମୃତି ପଟ୍ଟନାୟକ, ନୟନ ମହାନ୍ତି, ସୁଦୀପ୍ତ ରାୟ, ଦିଲ୍ଲୀପ ମହାନ୍ତି, ଯତୀନ ମହାନ୍ତି, ସୁରଥ ବିଶ୍ୱାଳ, ରାଜ୍ୟ ଅନୁସୂଚିତ ଜାତି ମୋର୍ଚ୍ଚା ସଭାପତି ବିଭୁ ପ୍ରସାଦ ତରାଇ, ରାଜ୍ୟ ସଂଖ୍ୟା ଲଘୁ ମୋର୍ଚ୍ଚା ସଭାପତି ସିକନ୍ଦର ଅଲ୍ଲୀ, ଅମର ନାଏକ, କଟକନଗର ସଭାପତି ଲଲାଟେନ୍ଦୁ ବଡୁ, ଯାଜପୁର ଜ଼ିଲ୍ଲା ସଭାପତି ଗୌତମ ରାୟ, ବିଷ୍ଣୁ ଦାସ, ଟଙ୍କଧର ତ୍ରିପାଠୀ, ଭୁବନ ମୋହନ ଜେନା, ରଶ୍ମିରେଖା ଦାସ, ଯାଜ୍ଞସେନୀ ଜେନା, ପ୍ରଦୀପ ପଟ୍ଟନାୟକ, ବିଶ୍ୱରଞ୍ଜନ ମିଶ୍ର, ଚୌଧୁରୀ ହେମନ୍ତ ସାହୁ ପ୍ରମୁଖ ଯୋଗ ଦେଇଥିଲେ।