ରାଇସ ମିଲ୍‌ କର୍ମଚାରୀଙ୍କ ଅସ୍ବାଭାବିକ ମୃତ୍ୟୁ

କୋରେଇ : କୋରେଇ ବ୍ଲକ୍‌ ଅନ୍ତର୍ଗତ ଧନେଶ୍ବର ପଞ୍ଚାୟତ ବେଗନା ଗ୍ରାମର ସ୍ବର୍ଗତ ଏକାଦଶୀ ମଲ୍ଲିକଙ୍କ ପୁଅ ନରେନ୍ଦ୍ର(୪୦)ଙ୍କର ଗତକାଲି ବିଳମ୍ବିତ ରାତିରେ ଅକାଳ ବିୟୋଗ ଘଟିଛି। ନରେନ୍ଦ୍ର ପାଣିକୋଇଲି ଥାନା ଅନ୍ତର୍ଗତ ପଥରପଦା ପଞ୍ଚାୟତ ମୁଲରୀ ଗ୍ରାମରେ ଥିବା ଆଶୀର୍ବାଦ ରାଇସ୍‌ ମିଲ୍‌ରେ କାର୍ଯ୍ୟ କରୁଥିଲେ।

ଗତକାଲି ସେ ମିଲ୍‌ରୁ ଫେରି ଘରେ ଥିବା ବେଳେ ରାତିରେ ହଠାତ୍‌ ଅସୁସ୍ଥ ହୋଇପଡ଼ିଥିଲେ। ପରିବାର ଲୋକେ ତାଙ୍କୁ ଯାଜପୁରରୋଡ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରିଥିଲେ। ସେଠାରେ ତାଙ୍କର ମୃତ୍ୟୁ ଘଟିଥିଲା। ଦାନଗଦୀ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ବ୍ୟବଚ୍ଛେଦ ପରେ ମୃତଦେହ ପରିବାର ଲୋକଙ୍କୁ ହସ୍ତାନ୍ତର କରାଯାଇଥିଲା। ଆଜି‌ ନରେନ୍ଦ୍ର କାର୍ଯ୍ୟ କରୁଥିବା ରାଇସ୍‌ ମିଲ୍‌ର ପରିଚାଳକ ଶରତ ଦାଶ ବେଗନାରେ ପହଞ୍ଚି ମୃତକଙ୍କ ପରିବାର ଲୋକଙ୍କୁ ସମବେଦନା ଜଣାଇଥିବା ସହ ଆର୍ଥିକ ସହାୟତା ପ୍ରଦାନ କରିଥିଲେ।