‘ସ୍ଥାୟୀ ଭବିଷ୍ୟତ ପାଇଁ ଜୈବ ବିବିଧତା ଏବଂ କୃଷିର ସାମ୍ପ୍ରତିକ ଅଗ୍ରଗତି’ ଶୀର୍ଷକ ଅନ୍ତର୍ଜାତୀୟ ସମ୍ମିଳନୀ ଉଦ୍‌ଘାଟିତ

କୋରାପୁଟ: ଓଡ଼ିଶା କେନ୍ଦ୍ରୀୟ ବିଶ୍ବବିଦ୍ୟାଳୟ ଆନୁକୂଲ୍ୟରେ ଜୈବ ବିବିଧତା ଏବଂ ପ୍ରାକୃତିକ ସମ୍ପଦ ସଂରକ୍ଷଣ ବିଭାଗ ଦ୍ୱାରା ଆୟୋଜିତ "ସ୍ଥାୟୀ ଭବିଷ୍ୟତ ପାଇଁ ଜୈବ ବିବିଧତା ଏବଂ କୃଷିର ସାମ୍ପ୍ରତିକ ଅଗ୍ରଗତି" ଶୀର୍ଷକ ଦୁଇ ଦିନିଆ ଅନ୍ତର୍ଜାତୀୟ ସମ୍ମିଳନୀ ବିଶ୍ୱବିଦ୍ୟାଳୟର ମୁଖ୍ୟ କ୍ୟାମ୍ପସରେ ୧୯ ଏପ୍ରିଲ ୨୦୨୪ରେ ଉଦଘାଟିତ ହୋଇଯାଇଛି। ବିଶ୍ୱବିଦ୍ୟାଳୟର କୁଳପତି ତଥା ଅନ୍ତର୍ଜାତୀୟ ସମ୍ମିଳନୀର ମୁଖ୍ୟ ପୃଷ୍ଠପୋଷକ ପ୍ରଫେସର ଚକ୍ରଧର ତ୍ରିପାଠୀ ସମ୍ମିଳନୀକୁ ଆନୁଷ୍ଠାନିକ ଭାବେ ଉଦ୍‌ଘାଟନ କରିଥିଲେ। ଏହି ଅବସରରେ କୁଳପତି ପ୍ରଫେସର ଚକ୍ରଧର ତ୍ରିପାଠୀ କହିଥିଲେ ଯେ ବୈଦିକ କାଳରୁ ଭାରତ ଓ ଜୈବ ବିବିଧତା ପରସ୍ପର ସହ ଜଡ଼ିତ। ପ୍ରାଚୀନ କାଳରେ ଆମେ ଆମର ଜୈବ ବିବିଧତା ବ୍ୟବସ୍ଥାକୁ ଅତି ଶୃଙ୍ଖଳିତ ଭାବେ ସଂରକ୍ଷଣ କରୁଥିଲୁ।

ବିଶ୍ୱ ସ୍ୱାସ୍ଥ୍ୟ ବ୍ୟବସ୍ଥା ଖରାପ ହେବାରେ ଲାଗିଛି ଏବଂ ଏହାର କାରଣ ହେଉଛି ଆମେ ଆମର ପାରମ୍ପରିକ ପ୍ରଥା ଅନୁସରଣ କରୁନାହୁଁ । ଆମ ସମାଜ ସବୁବେଳେ ସଂସ୍କୃତି ଓ ପରିବେଶର ମିଶ୍ରଣ । ଇକୋସିଷ୍ଟମ ପ୍ରତି ଆମର ଧାରଣା ଚମତ୍କାର ଥିଲା, ଏବେ ଆମ ପରମ୍ପରାକୁ ପୁନରୁଦ୍ଧାର କରିବାର ସମୟ ଆସିଛି । ଆମକୁ ଇକୋସିଷ୍ଟମ ଏବଂ ଜୈବ ବିବିଧତା ସଂରକ୍ଷଣର ପାରମ୍ପରିକ ଢାଞ୍ଚାକୁ ପୁନରୁଦ୍ଧାର କରିବାକୁ ହେବ ଏବଂ 'ନିଜେ ବଞ୍ଚିବା ଏବଂ ଅନ୍ୟକୁ ବଞ୍ଚିବାକୁ ଦେବା' ପ୍ରାଚୀନ ଆଦର୍ଶକୁ ଅନୁସରଣ କରିବାକୁ ହେବ ବୋଲି ସେ ପରାମର୍ଶ ଦେଇଥିଲେ । ପ୍ରଫେସର ଶରତ କୁମାର ପଳିତା ସ୍ୱାଗତ ଭାଷଣ ଦେବା ସହ ସମ୍ମିଳନୀର ଉଦ୍ଦେଶ୍ୟ ବର୍ଣ୍ଣନା କରିଥିଲେ। ଜୈବ ବିବିଧତା ଅଧ୍ୟୟନ ପାଇଁ ଏହି ଅଞ୍ଚଳ ସବୁଠାରୁ ଉପଯୁକ୍ତ, ସେଥିପାଇଁ ଏହି ସମ୍ମିଳନୀ ଅର୍ଥପୂର୍ଣ୍ଣ ବୋଲି ସେ କହିଥିଲେ। ବିଶ୍ବବିଦ୍ୟାଳୟରେ କୃଷି ବିଜ୍ଞାନ, ଦୁଗ୍ଧ ଓ ପଶୁପାଳନ, ଜଙ୍ଗଲ ପରିଚାଳନା ଏବଂ ଯୋଗାଣ ଓ ଶୃଙ୍ଖଳା ପରିଚାଳନା ଭଳି ୪ଟି ନୂତନ ବିଭାଗ ର ଆବିର୍ଭାବ କୋରାପୁଟରେ କୃଷି ଓ ଆନୁଷଙ୍ଗିକ କ୍ଷେତ୍ରର ବିକାଶରେ ସହାୟକ ହେବ ବୋଲି ସେ ଆଶା ବ୍ୟକ୍ତ କରିଥିଲେ।

ନୂଆଦିଲ୍ଲୀସ୍ଥିତ ଆଇସିଏଆର୍ (ଭାରତୀୟ କୃଷି ଗବେଷଣା ପରିଷଦ), ଫସଲ ବିଜ୍ଞାନ ବିଭାଗର ଅତିରିକ୍ତ ମହାନିର୍ଦେଶକ ତଥା ମୁଖ୍ୟ ଅତିଥି ପ୍ରଫେସର ଶରତ କୁମାର ପ୍ରଧାନ କହିଥିଲେ ଯେ ବିବିଧତା ଓ ବିଭ୍ରାଟ ନଥିଲେ ବିକାଶ ସମ୍ଭବ ନୁହେଁ। ତେଣୁ ସଂରକ୍ଷଣ ଓ ବିବିଧତାର ଭୂମିକା ସମାଜ ପାଇଁ ଗୁରୁତ୍ୱପୂର୍ଣ୍ଣ । ଯଦି ଆମେ ବିକଶିତ ଭାରତ @୨୦୪୭ରେ ପହଞ୍ଚିବାକୁ ଚାହୁଁଛୁ, ତେବେ ଆମକୁ ଆମର ଜୈବ ବିବିଧତାର ସଂରକ୍ଷଣ କରିବାକୁ ପଡ଼ିବ ବୋଲି ସେ କହିଥିଲେ । ଖାଦ୍ୟଶସ୍ୟ ଉତ୍ପାଦନ ଏବଂ ଅନ୍ୟାନ୍ୟ ଆନୁଷଙ୍ଗିକ ଉତ୍ପାଦନ କ୍ଷେତ୍ରରେ ଭାରତ ଅଗ୍ରଗତି କରୁଛି, କିନ୍ତୁ ଆମକୁ ଅଧିକ ଉତ୍ପାଦନ ପାଇଁ ଅଧିକ ସମ୍ବଳ ବ୍ୟବହାର କରିବାକୁ ପଡ଼ିବ ବୋଲି ସେ କହିଥିଲେ ।

"ନିରନ୍ତର ବିକାଶ ଅଗ୍ରଗତି ଏବଂ ଭବିଷ୍ୟତ ଏଜେଣ୍ଡା ପାଇଁ ଭାରତରେ ଜୈବ ବିବିଧତା ଏବଂ କୃଷି ଗବେଷଣା" ଶୀର୍ଷକ ଆଲୋଚନାଚକ୍ରରେ ଲକ୍ଷ୍ନୌସ୍ଥିତ ଏନବିଆରଆଇ (ନ୍ୟାସନାଲ ବୋଟାନିକାଲ ରିସର୍ଚ୍ଚ ଇନଷ୍ଟିଚ୍ୟୁଟ)ର ପୂର୍ବତନ ନିର୍ଦ୍ଦେଶକ ତଥା ଶିଲଙ୍ଗର ନେହୁସ୍ଥିତ ଉଦ୍ଭିଦ ବିଜ୍ଞାନର ପ୍ରଫେସର ସରୋଜ କୁମାର ବାରିକ ମୁଖ୍ୟ ବକ୍ତବ୍ୟ ରଖିଥିଲେ। ସେ ତାଙ୍କ ଅଭିଭାଷଣରେ ୧୧ ହଜାର ବର୍ଷର ଭାରତର ସମୃଦ୍ଧ କୃଷି ଐତିହ୍ୟ ବିଷୟରେ ବର୍ଣ୍ଣନା କରିଥିଲେ।

ଖଲ୍ଲିକୋଟ ବିଶ୍ୱବିଦ୍ୟାଳୟର ପୂର୍ବତନ କୁଳପତି ପ୍ରଫେସର ଅମରେନ୍ଦ୍ର ନାରାୟଣ ମିଶ୍ର ଏଭଳି ଏକ ଉପଯୁକ୍ତ ସମ୍ମିଳନୀ ଆୟୋଜନ କରିଥିବାରୁ ବିଶ୍ୱବିଦ୍ୟାଳୟକୁ ପ୍ରଶଂସା କରିଥିଲେ। ଏହି ସମ୍ମିଳନୀ ପ୍ରକ୍ରିୟା ଫଳପ୍ରଦ ଫଳାଫଳ ଆଣିବ ବୋଲି ସେ ଆଶା ବ୍ୟକ୍ତ କରିଛନ୍ତି। ଜୈବ ବିବିଧତା ଗବେଷଣା ପାଇଁ କୋରାପୁଟ ହେଉଛି ସର୍ବୋତ୍ତମ ସ୍ଥାନ ବୋଲି ପ୍ରଫେସର ଅଧିକାରୀ କହିଠିଏଲ । ଜୈବ ବିବିଧତା ବିଷୟ ଭାରତୀୟ ବିଶ୍ୱବିଦ୍ୟାଳୟଗୁଡ଼ିକରେ କୌଣସି ସ୍ଥାନରେ ଉପଲବ୍ଧ ନାହିଁ। ତେଣୁ ଏ ଅଞ୍ଚଳ ତଥା ଭାରତବର୍ଷ ପାଇଁ ଏହା ଅତ୍ୟନ୍ତ ଗୁରୁତ୍ବପୂର୍ଣ। ବିଶ୍ଵବିଦ୍ୟାଳୟର ଭାରପ୍ରାପ୍ତ କୁଳସଚିବ ପ୍ରଫେସର ନରସିଂହ ଚରଣ ପଣ୍ଡା କହିଥିଲେ ଯେ କୃଷି ବିକାଶ କ୍ଷେତ୍ରରେ ଭାରତୀୟ ପାରମ୍ପରିକ ବ୍ୟବସ୍ଥା ବିଶ୍ୱର ଶ୍ରେଷ୍ଠ ବ୍ୟବସ୍ଥା। ସେ ଆମ ପ୍ରାଚୀନ ପୁରାଣର କୃଷି ପରାଶରର ଉଦାହରଣ ଦେଇଥିଲେ ଯେଉଁଠାରେ କୃଷି ବିଷୟରେ ଉଲ୍ଲେଖ ଅଛି। ସେବେଠାରୁ ଆମେ ଚାଷ କାର୍ଯ୍ୟ କରିଆସୁଛୁ।

ସମ୍ମିଳନୀର ଆବାହକ ତଥା ପ୍ରଫେସର ଦେବବ୍ରତ ପଣ୍ଡା ସମସ୍ତ ଅତିଥିଙ୍କୁ ସ୍ୱାଗତ କରିବା ସହ ପ୍ରାରମ୍ଭିକ ବିବରଣୀ ପ୍ରଦାନ କରିଥିଲେ। ଡ. କାକୋଲି ବାନାର୍ଜୀ ଧନ୍ୟବାଦ ଅର୍ପଣ କରିବା ସହ ଉଦ୍ ଘାଟନୀ କାର୍ଯ୍ୟକ୍ରମକୁ ସଂଯୋଜନା କରିଥିଲେ। ଅନ୍ୟମାନଙ୍କ ମଧ୍ୟରେ ବିଶ୍ଵବିଦ୍ୟାଳୟର ପରାମର୍ଶଦାତା ଶିକ୍ଷାବିତ୍ ପ୍ରଫେସର ଭିସି ଝା, ପ୍ରଫେସର ଏମ୍ କେ ଶତପଥୀ, ନାଇଜେରିଆର ଡ. ବୋଲଗୁନ ଶାମସୁଦିନ ଟାମିୱା, ପ୍ରଫେସର ଏମ୍ ଭେଟ୍ରିଭେନ୍ଥାନ୍ ଙ୍କ ସମେତ ବହୁ ବିଶିଷ୍ଟ ବ୍ୟକ୍ତି, ଅଧ୍ୟାପକ, ଛାତ୍ରଛାତ୍ରୀ ଓ ଗବେଷକ ମାନେ ଉପସ୍ଥିତ ଥିଲେ। ଏହି ଅବସରରେ କୋରାପୁଟର ଦୁଇ ଜଣ ବିଶିଷ୍ଟ ବ୍ୟକ୍ତିଙ୍କୁ ସ୍ଥାନୀୟ ଅଞ୍ଚଳର ଜୈବ ବିବିଧତା ସଂରକ୍ଷଣ ଓ କୃଷି କ୍ଷେତ୍ରରେ ଅବଦାନ ପାଇଁ ସମ୍ବର୍ଦ୍ଧିତ କରାଯାଇଥିଲା। ସେମାନେ ହେଲେ ପାତ୍ରପୁଟ ଗ୍ରାମର ବିଶିଷ୍ଟ କୃଷକ-ସହ ସଂରକ୍ଷକ ଶ୍ରୀ ନେତ୍ରାନନ୍ଦ ଲେଙ୍କା ଓ ବାଜରା ସଂରକ୍ଷଣକ୍ଷେତ୍ରରେ ଅବଦାନ ପାଇଁ ଶ୍ରୀମତୀ ରାଇମତୀ ଘିଉରିଆ।

ଦୁଇ ଦିନିଆ ଏହି ସମ୍ମିଳନୀରେ ୫ଟି ବୈଷୟିକ ଅଧିବେଶନ ଅନୁଷ୍ଠିତ ହେବ ଯେଉଁଥିରେ ଦେଶ ତଥା ବିଦେଶ ରେ ଥିବା ବିଶ୍ୱବିଦ୍ୟାଳୟ ଓ ଗବେଷଣା ଅନୁଷ୍ଠାନର ପ୍ରଫେସର ଓ ବୈଜ୍ଞାନିକମାନେ ପେପର ଉପସ୍ଥାପନ କରିବେ। ବିଭିନ୍ନ ଅନୁଷ୍ଠାନର ଅଧ୍ୟାପକ ଓ ଗବେଷକମାନେ ମଧ୍ୟ ପୋଷ୍ଟର ଉପସ୍ଥାପନା ମାଧ୍ୟମରେ ସେମାନଙ୍କ ଗବେଷଣା ଫଳାଫଳ ଉପସ୍ଥାପନ କରିବେ। କୋରାପୁଟର ସମୃଦ୍ଧ ଜୈବ ବିବିଧତା ଏବଂ କୃଷି ଐତିହ୍ୟ ପାଇଁ କୋରାପୁଟ ଅଞ୍ଚଳର ଗୁରୁତ୍ୱ ଉପରେ ଆଲୋକପାତ କରିବା ପାଇଁ କୋରାପୁଟର ବିଭିନ୍ନ ସ୍ୱେଚ୍ଛାସେବୀ ଅନୁଷ୍ଠାନର ଅଂଶଗ୍ରହଣରେ ଏକ ମାଣ୍ଡିଆ ପ୍ରଦର୍ଶନୀ ମଧ୍ୟ ଆୟୋଜନ କରାଯାଇଥିଲା ବୋଲି ବିଶ୍ଵବିଦ୍ୟାଳୟର ଜନସମ୍ପର୍କ ଅଧିକାରୀ ଡ. ଫଗୁନାଥ ଭୋଇ ଜଣାଇଛନ୍ତି। ଅନ୍ୟମାନଙ୍କ ମଧ୍ୟରେ ଜୈବ ବିବିଧତା ଓ ପ୍ରାକୃତିକ ସମ୍ପଦ ସଂରକ୍ଷଣ ବିଦ୍ୟାଳୟର ଡିନ୍ ତଥା ସମ୍ମିଳନୀର ଅଧ୍ୟକ୍ଷ ପ୍ରଫେସର ଶରତ କୁମାର ପାଲିତା ଓ ସହ-ଆବାହକ ଡ. କାକୋଲି ବାନାର୍ଜୀ ପ୍ରମୁଖ ମଞ୍ଚାସୀନ ଥିଲେ।