ରାଜ୍ୟବ୍ୟାପୀ ‘ଉତ୍କଳ ଦିବସ’ ପାଳିତ: ଓଡ଼ିଆ ପରିଧାନ କଲେ ଓଡ଼ିଶା ହସ୍ତତନ୍ତ

ଭୁବନେଶ୍ବର : ଏପ୍ରିଲ ୧ ତାରିଖ ‘ଉତ୍କଳ ଦିବସ’ ପାଳନ ଅବସରରେ ରାଜ୍ୟବାସୀ ଓଡ଼ିଶାର ହାତବୁଣା ବସ୍ତ୍ର ପରିଧାନ କରିବାକୁ ‘ସମ୍ବାଦ’ର ସମ୍ପାଦକ, ‘ଆମ ଓଡ଼ିଶା’ ଅଧ୍ୟକ୍ଷ ତଥା ‘ସମ୍ବାଦ ସାହିତ୍ୟ ଘରର’ ପ୍ରତିଷ୍ଠାତା ସଭାପତି ସୌମ୍ୟରଞ୍ଜନ ପଟ୍ଟନାୟକ ଆହ୍ବାନ ଦେଇଥିଲେ। ଏହି ପରିପ୍ରେକ୍ଷୀରେ ଶନିବାର ଦିନ ରାଜ୍ୟର ବିଭିନ୍ନ ସଂଗଠନ, ଶିକ୍ଷାନୁଷ୍ଠାନ, ସରକାରୀ ଓ ବେସରକାରୀ ସଂସ୍ଥା, ବହୁ ଆପାର୍ଟମେଣ୍ଟ ଓ କଲୋନିର ଅଧିବାସୀ ହସ୍ତତନ୍ତ ପୋଷାକ ପିନ୍ଧି ଏକାଠି ହୋଇ ଫଟୋ ଉଠାଇବା ସହ ‘ବନ୍ଦେ ଉତ୍କଳ ଜନନୀ’ ଗାନ କରିଥିଲେ।

ଏଥିସହ ‘ଭୁବନେଶ୍ବରସ୍ଥିତ ସମ୍ବାଦ ମୁଖ୍ୟାଳୟ’ ସମେତ ସମସ୍ତ ସଂସ୍କରଣସ୍ତରରେ ସହଯୋଗୀମାନେ ତଥା ‘ସମ୍ବାଦ ସାହିତ୍ୟ ଘର’ର ବିଭିନ୍ନ ଶାଖାର ସଦସ୍ୟମାନେ ହସ୍ତତନ୍ତ ଶାଢ଼ି, ପୋଷାକ, କୁର୍ତା, ସାର୍ଟ ବା ଉତ୍ତରୀୟ ପରିଧାନ କରି ଓଡ଼ିଶା ହସ୍ତତନ୍ତର ପ୍ରଚାରପ୍ରସାର ଦିଗରେ ପ୍ରଥମ ପାଦ ଆଗକୁ ବଢ଼ାଇଛନ୍ତି। ‘ସମ୍ବାଦ’ର ବିଭିନ୍ନ ସଂସ୍କରଣର ପ୍ରାୟ ୧୦୦୦ରୁ ଅଧିକ ସହଯୋଗୀ ଆଜିର ଦିନରେ ହସ୍ତତନ୍ତ ପୋଷାକ ପରିଧାନ କରିଥିବା ବେଳେ ‘ସମ୍ବାଦ ସାହିତ୍ୟ ଘର’ର ପ୍ରାୟ ୧୧୦ଟି ଶାଖାର ସଭ୍ୟସଭ୍ୟାମାନେ ଆଜି ହସ୍ତତନ୍ତ ପୋଷାକ ପରିଧାନ କରି ଓଡ଼ିଶାର ହସ୍ତତନ୍ତର ଉତ୍କର୍ଷତାକୁ ପ୍ରଦର୍ଶିତ କରିଥିଲେ।