ପିକଅପ୍‌ ଭ୍ୟାନ -କାର ମୁହାଁମୁହିଁ: ବିଜେପି ନେତା ଓ ପତ୍ନୀ ଗୁରୁତର

ନଠୁଆବର: କୁଆଖିଆ ଥାନା ଅନ୍ତର୍ଗତ ୧୬ ନମ୍ବର ଜାତୀୟ ରାଜପଥର ବିଜୁନଗର ନିକଟରେ କୋରେଇ ବିଜେପି ନେତା ବିଶ୍ବଜିତ ନାୟକଙ୍କ କାର୍‌ ସହ ଗୋଟିଏ ପିକଅପ୍‌ ଭ୍ୟାନ ମୁହାଁମୁହିଁ ଧକ୍କା ହୋଇଥିଲା। ଏଥିରେ ବିଜେପି ନେତା ଶ୍ରୀ ନାୟକ ଓ ତାଙ୍କ ପତ୍ନୀ ସଂଗୀତା ନାୟକ  ଆହତ ହୋଇଛନ୍ତି। ଆହତମାନଙ୍କୁ ଧର୍ମଶାଳା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଥିଲା। ପ୍ରାଥମିକ ଚିକିତ୍ସା ପରେ ସେମାନଙ୍କୁ ଭୁବନେଶ୍ବରର ଏକ ଘରୋଇ ଡାକ୍ତରଖାନାକୁ ସ୍ଥାନାନ୍ତର କରାଯାଇଛି।

ପ୍ରକାଶ ଯେ, ଆଜି ଅପରାହ୍ଣରେ ବିଜେପି ନେତା ଶ୍ରୀ ନାୟକ ପରିବାର ସହ କଟକ ଯାଉଥିବା ସମୟରେ ଭୁଲ ରାସ୍ତାରେ ଆସୁଥିବା ଏକ ପିକଅପ୍‌ ଭ୍ୟାନ ନମ୍ବର ଓଡି-୦୫ଏସି-୭୭୪୨ ସହ ତାଙ୍କ କାର୍‌ ଏଚ୍‌ଆର- ୫୧ଏକେ-୮୪୮୦ ମୁହାଁମୁହିଁ ଧକ୍କା ହୋଇଥିଲା। ଏହି ଦୁର୍ଘଟଣାରେ କାର୍‌ର ବ୍ୟାପକ କ୍ଷତି ହୋଇଥିବା ବେଳେ ଶ୍ରୀ ନାୟକ ଓ ତାଙ୍କ ପତ୍ନୀ ଗୁରୁତର ଆହତ ହୋଇଥିଲେ। ଆହତମାନଙ୍କ ମୁଣ୍ତରେ ଗଭୀର ଆଘାତ ଲାଗିଛି। କୁଆଖିଆ ଥାନା ପୁଲିସ ପହଞ୍ଚି ଆହତମାନଙ୍କୁ ଡାକ୍ତରଖାନା ପଠାଇଥିଲା। କ୍ଷତିଗ୍ରସ୍ତ କାର୍‌ ଓ ଦୁର୍ଘଟଣା ଘଟାଇଥିବା ଭ୍ୟାନ୍‌କୁ ପୁଲିସ ଜବତ କରି ତଦନ୍ତ ଜାରି ରଖିଛି। ରାତି ସୁଦ୍ଧା ଏନେଇ କୁଆଖିଆ ଥାନାରେ କୌଣସି ଅଭିଯୋଗ ହୋଇନାହିଁ ବୋଲି ପୁଲିସ କହିଛି।