ଭୁବନେଶ୍ବର: ଆୟବହିର୍ଭୂତ ସଂପତ୍ତି ଠୁଳ ଅଭିଯୋଗରେ ଦ୍ୱିତୀୟ ଦିନରେ ବାରିପଦା ଆଇଟିଡିଏ ସହକାରୀ ଯନ୍ତ୍ରୀ ସନ୍ତୋଷ ଦାସଙ୍କ ଭୁବନେଶ୍ୱରର ବରଗଡ଼ ଅଞ୍ଚଳରେ ଥିବା ଚାରିମହଲା କୋଠାରେ ଚଢ଼ାଉ କରୁଛି ଭିଜିଲାନ୍ସ ଟିମ୍। ସନ୍ତୋଷ ଦାସଙ୍କ ଅମାପ ସମ୍ପତି ଦେଖି ଭିଜିଲାନ୍ସ ଟିମ୍ ବିସ୍ମିତ ହୋଇଛି। ଦୁଇଦିନରେ ନଗଦ ମୋଟ ୪୧ ଲକ୍ଷ ୭୭ ହଜାର ଟଙ୍କା ଏବଂ ୬୫୯ ଗ୍ରାମ ସୁନା ଜବତ କରିଛି ଭିଜିଲାନ୍ସ।
ଏବେ ସୁଦ୍ଧା ଭୁବନେଶ୍ୱରରେ ଗୋଟିଏ ୪ମହଲା କୋଠା, ଗୋଟିଏ ଫ୍ଲାଟ ଓ ଏକ ଅର୍ଦ୍ଧନିର୍ମିତ ଘର ଠାବ କରିଛି ଭିଜିଲାସନ୍ସ। ଏହାଛଡ଼ା ବାଲେଶ୍ୱରରେ ଗୋଟିଏ ୪ମହଲା କୋଠା ଓ ତିନୋଟି ପ୍ଲଟ୍ ଠାବ ହୋଇଛି।
Sambad is now on WhatsApp
Join and get latest news updates delivered to you via WhatsApp
ସୂଚନାଯୋଗ୍ୟ, ଗତକାଲି ଆୟବହିର୍ଭୂତ ସଂପତ୍ତି ଠୁଳ ଅଭିଯୋଗରେ ବାରିପଦା ଆଇଟିଡିଏ ସହକାରୀ ଯନ୍ତ୍ରୀ ସନ୍ତୋଷ ଦାସଙ୍କ ବାସଭବନ ସମେତ ଏଗାରଟି ସ୍ଥାନରେ ଭିଜିଲାନ୍ସ ଚଢ଼ାଉ ଆରମ୍ଭ କରିଥିଲା। କଟକ ଭିଜିଲାନ୍ସ ଦ୍ବାରା ଏହି ଚଢ଼ାଉ ଆଜି ସକାଳୁ ଆରମ୍ଭ ହୋଇଥିବାର ଖବର ମିଳିଛି।
୧୦ଜଣ ଡିଏସପି, ୪ ଜଣ ଇନ୍ସପେକ୍ଟର ଏବଂ ଅନ୍ୟ ୩୦ କର୍ମଚାରୀ ଏହି ଚଢ଼ାଉରେ ନିୟୋଜିତ ଅଛନ୍ତି।। ଚଢ଼ାଉ ଚାଲିଥିବା ସ୍ଥାନଗୁଡିକ ହେଲା ଭୁବନେଶ୍ୱର ପ୍ଲଟ ନମ୍ବର ୨୪୦୪/ ଇବି-୫୦୨ଉପରେ ଅବସ୍ଥିତ ଚାରିମହଲା କୋଠା, ଫ୍ଲାଟ ନମ୍ବର ୧୦୫, ବିଜୟ ଏନକ୍ଲେଭ, ଶୈଳଶ୍ରୀ ବିହାର, ଭୁବନେଶ୍ୱର, ଭୁବନେଶ୍ୱରର କଳିଙ୍ଗ ବିହାରରେ ନିର୍ମାଣାଧୀନ କୋଠା, ବାଲେଶ୍ବରରରେ ଚାରି ମହଲା କୋଠା, ବାଲିଆପାଳରେ ପୈତୃକ ବାସଭବନ, ବାଲେଶ୍ବରର ସଦରରେ ଶଶୁର ଘର, ବାଲେଶ୍ବରର ଏଲଆଇସି କଲୋନି ନିକଟରେ ଥିବା ଜ୍ୱାଇଁଙ୍କ ଭଡ଼ା ଘର , ବାଲିଆପାଳରେ ଥିବା ଜ୍ୱାଇଁଙ୍କ ପୈତୃକ ଘର, ବାରିପଦାରେ ସନ୍ତୋଷ ଦାସଙ୍କ ଭଡ଼ା ଘର, ବାରପଦାରେ ଥିବା ତାଙ୍କ ସରକାରୀ କାର୍ଯ୍ୟାଳୟ, ମୟୂରଭଞ୍ଜର ବାଇସିଙ୍ଗାରେ ପୁଅଙ୍କ ଭଡା ଘର।
କଟକ ଭିଜିଲାନ୍ସ ଡିଏସପି ପି .କେ ଦ୍ବିବେଦୀଙ୍କ ସହ ୫ଜଣ କର୍ମଚାରୀ ବାଲିଆପାଳରେ ଚଢ଼ାଉ କରିଛନ୍ତି। ଏଠାରେ କେବଳ ସନ୍ତୋଷ ଦାସଙ୍କ ବାପା ରହନ୍ତି। ଏଠାରେ ଥିବା ତାଙ୍କ ଜମିବାଡ଼ି ଓ ସଂପତ୍ତିର ଆକଳନ କରୁଛନ୍ତି ଭିଜିଲାନ୍ସ ଟିମ୍। ଏନେଇ ଅଧିକ ତଥ୍ୟକୁ ଅପେକ୍ଷା କରାଯାଇଛି। ଏଅଞ୍ଚଳରେ ଏହା ଏକ ବଡ଼ ଧରଣର ଭିଜିଲାନ୍ସ ଚଢ଼ାଉ ବୋଲି କୁହାଯାଉଛି।