ବିଡିସିସି ବ୍ୟାଙ୍କ ମ୍ୟାନେଜରଙ୍କ ଘରେ ଚଢ଼ଉ
ଟିଟିଲାଗଡ଼ : ଆକ୍ସନ ମୋଡ଼କୁ ଆସିଛି ଭିଜିଲାନ୍ସ ବିଭାଗ। ଗୁରୁବାର ବିଡିସିସି ବ୍ୟାଙ୍କ ଲାଠୋର ଶାଖା ପରିଚାଳକ ସାଗର ରଣାଙ୍କ ଟିଟିଲାଗଡ଼ସ୍ଥିତ ଘରେ ଚଢ଼ଉ କରିଛି। ସଂପୃକ୍ତ ଅଧିକାରୀଙ୍କ ବିରୋଧରେ ଆୟ ବହିର୍ଭୂତ ସଂପତ୍ତି ଠୁଳ କରିଥିବା ଅଭିଯୋଗ ହୋଇଛି। ପ୍ରକାଶ ଯେ, ଗୁରୁବାର ଟିଟିଲାଗଡ଼ ସହରର ହାଇସ୍କୁଲ ପନାରେ ଥିବା ଶ୍ରୀ ରଣାଙ୍କ ଘରକୁ ପହଞ୍ଚି ତନାଘନା ଆରମ୍ଭ କରିଥିଲେ। ସେହିପରି ଏକକାଳୀନ ତାଙ୍କ ଲାଠୋରସ୍ଥିତ ତାଙ୍କ କାର୍ଯ୍ୟାଳୟ ଏବଂ ସଇନ୍ତଳା ଥାନା ଘୁନସର ଗାଁରେ ଥିବା ତାଙ୍କ ଶ୍ୱଶୁର ଘର ଉପରେ ମଧ୍ୟ ଚଢ଼ଉ କରାଯାଇଥିଲା। ବଲାଙ୍ଗୀର ଭିଜିଲାନ୍ସ ଡିଏସପି କାଦମ୍ୱିନୀ ସାମଲଙ୍କ ନେତୃତ୍ବରେ ହୋଇଥିବା ଏହି ଚଢ଼ଉରେ ବରଗଡ଼, ସୁବର୍ଣ୍ଣପୁର ଆଦି ଜିଲ୍ଲାର ପ୍ରାୟ ୨୦ରୁ ଅଧିକ ଅଧିକାରୀ ସାମିଲଥିଲେ।
Sambad is now on WhatsApp
Join and get latest news updates delivered to you via WhatsApp
ଏହି ଚଢ଼ଉ ବିଷୟରେ ଶ୍ରୀ ରଣା କହିଛନ୍ତି ଯେ ତାଙ୍କ ବିରୋଧରେ ହୋଇଥିବା ଆୟ ବହିର୍ଭୂତ ସଂପତ୍ତି ଠୁଳ ଅଭିଯୋଗ ମିଛ। ତାଙ୍କ ନିକଟରେ ଯାହା ବି ସଂପତ୍ତି ଓ ଜମି ରହିଛି ତାହା ତାଙ୍କ ପୈତୃକ ଅଟେ। ଟିଟିଲାଗଡ଼ ଥାନା ବାଲପଦର ଗାଁର ମୂଳ ବାସିନ୍ଦା ଶ୍ରୀ ରଣା ତାଙ୍କ ଚାକିରି ଜୀବନ ଜଗୁଆ ପଞ୍ଚାୟତରେ ଥିବା ପେକ୍ସର ସଂପାଦକ ଭାବେ ଆରମ୍ଭ କରିଥିଲେ। ପଦୋନ୍ନତି ପାଇ ଏବେ ଲାଠୋର ବିଡିସିସି ବ୍ୟାଙ୍କର ଶାଖା ପରିଚାଳକ ଭାବେ ଅବସ୍ଥାପିତ ଅଛନ୍ତି। ଭିଜିଲାନ୍ସ ଅଧିକାରୀମାନେ ତାଙ୍କ ଘରୁ ଜବତ କରିଥିବା ସୁନା ଓ ଗାଡ଼ି ତାଙ୍କୁ ଫେରାଇ ଦିଆଯିବ ଓ ବ୍ୟାଙ୍କ ତଥା ଘର ସଂକ୍ରାନ୍ତୀୟ କାଗଜପତ୍ର ଜବତ କରି ତଦନ୍ତ କରାଯିବ ବୋଲି କହିଛନ୍ତି।