ପୁରୀ : କରୋନା ସଂକ୍ରମଣକୁ ପ୍ରତିହତ ପାଇଁ ସୋମବାରଠାରୁ କଟକଣା ଭିତରେ ମହାପ୍ରଭୁଙ୍କ ଦର୍ଶନ ଆରମ୍ଭ ହେଉଛି। ସୋମବାରଠାରୁ କୋଭିଡ୍‌ ନେଗେଟିଭ୍‌ ରିପୋର୍ଟ ଅବା କୋଭିଡ୍‌ ଟିକାର ଦୁଇଟି ଡୋଜ୍‌ ନେଇଥିବା ରିପୋର୍ଟ ନ ଦେଖାଇଲେ ବାହାର ରାଜ୍ୟ ଭକ୍ତଙ୍କୁ ଦର୍ଶନ ମିଳିବନି। ଏଥିପାଇଁ ବ୍ୟାପକ ବ୍ୟବସ୍ଥା କରାଯାଇଛି। ଭକ୍ତଙ୍କ ପାଇଁ ପରିଚୟପତ୍ର ଦେଖାଇବା ବାଧ୍ୟତାମୂଳକ କରାଯାଇଛି। ଯାଞ୍ଚ ପାଇଁ ଶ୍ରୀମନ୍ଦିର କାର୍ଯ୍ୟାଳୟ ନିକଟରେ ସ୍ବତନ୍ତ୍ର କିଓସ୍କ ଖୋଲାଯାଇଛି। ମହାପ୍ରଭୁଙ୍କ ଦର୍ଶନ ପାଇଁ ସେଡ୍‌ରେ ପ୍ରବେଶ ପୂର୍ବରୁ ଏହିଠାରେ ଭକ୍ତମାନେ ପରିଚୟପତ୍ର ଓ ଆବଶ୍ୟକ କାଗଜପତ୍ର ଦେଖାଇବେ। ନଚେତ୍‌ ଭକ୍ତଙ୍କୁ ଦର୍ଶନ ଅନୁମତି ମିଳିବନାହିଁ। ଦର୍ଶନ ପୂର୍ବରୁ ଭକ୍ତମାନେ ପୂର୍ବଭଳି ସାନିଟାଇଜ୍‌ ହୋଇ ଯିବେ।

Advertisment

କରୋନା ସଂକ୍ରମଣକୁ ଦୃଷ୍ଟିରେ ରଖି ଶ୍ରୀମନ୍ଦିରରେ ମହାପ୍ରଭୁଙ୍କ ଦର୍ଶନ ପାଇଁ ମନ୍ଦିର ପ୍ରଶାସନ ନୂଆ ଏସ୍‌ଓପି ଜାରି କରିଛି। ସପ୍ତାହକୁ ଶନିବାର ଓ ରବିବାର ଶ୍ରୀମନ୍ଦିରରେ ଦର୍ଶନ ବନ୍ଦ ରଖାଯାଇଛି। ଆସନ୍ତା ୨୪ ତାରିଖରୁ ଏହି କଟକଣା ଲାଗୁ ହେବ। ସେପଟେ ସୋମବାର(୧୯ ତାରିଖ)ଠାରୁ ରାଜ୍ୟ ବାହାର ଭକ୍ତଙ୍କ କ୍ଷେତ୍ରରେ ୯୬ ଘଣ୍ଟାର କୋଭିଡ୍‌ ଆର୍‌ଟିପିସିଆର ରିପୋର୍ଟ ବାଧ୍ୟତାମୂଳକ କରାଯାଇଛି। ନଚେତ୍‌ କୋଭିଡ୍‌ ଟିକାର ଦୁଇଟି ଡୋଜ୍‌ ନେଇଥିବା ପ୍ରମାଣପତ୍ର ଦେଖାଇବାକୁ କୁହାଯାଇଛି। ଭିତର କାଠ ପ୍ରବେଶ ନିଷେଧ କରାଯାଇ ଭକ୍ତଙ୍କୁ ବାହାର କାଠରୁ ଦର୍ଶନ ପାଇଁ ନିଷ୍ପତ୍ତି ନିଆଯାଇଛି। ଓଡ଼ିଶା ଓ ଓଡ଼ିଶା ବାହାର ଭକ୍ତ ଚିହ୍ନଟ ପାଇଁ ଆଧାରକାର୍ଡ଼, ଭୋଟର୍‌ ପରିଚୟପତ୍ର ଆଦି ବାଧ୍ୟତାମୂଳକ କରାଯାଇଛି। ମାସ୍କ ଯାଞ୍ଚ କଡ଼ାକଡ଼ି ଉପରେ ଗୁରୁତ୍ବ ଦିଆଯାଇଛି। ପାନଛେପ, ପଲିଥିନ୍‌ ପାଇଁ ଯଥାକ୍ରମେ ୫ଶହ ଓ ଶହେ ଟଙ୍କ ଜରିମାନା ଆଦାୟ ନିଷ୍ପତ୍ତି ହୋଇଛି। ଏଥିପାଇଁ ଶ୍ରୀମନ୍ଦିର ପ୍ରଶାସନ, ଜିଲ୍ଲା ପ୍ରଶାସନ, ପୁଲିସ ଓ ସେବକଙ୍କୁ ନେଇ ଏକ ସ୍ବତନ୍ତ୍ର ସ୍କ୍ବାଡ୍‌ ଗଠନ ହୋଇଛି।