ଶ୍ରୀମନ୍ଦିରରେ ପାନ ଛେପ ଦେଖି ରାଗିଗଲେ ପାଣ୍ଡିଆନ
ପୁରୀ : ଶ୍ରୀମନ୍ଦିରରେ ଆଜି ସକାଳର ଏକ ଘଟଣା ଦିନତମାମ ଚର୍ଚ୍ଚାର କେନ୍ଦ୍ର ବିନ୍ଦୁ ପାଲଟିଛି। ମହାପ୍ରଭୁଙ୍କ ଦର୍ଶନ ପାଇଁ ଶ୍ରୀମନ୍ଦିର ଆସିଥିବା ୫-ଟି ସଚିବ ଭି.କେ. ପାଣ୍ଡିଆନ କାହିଁକି ରାଗିଲେ ତାକୁ ନେଇ ଅଧିକାରୀ ଓ କର୍ମଚାରୀଙ୍କ ଭିତରେ ଚାଲିଛି ଆଲୋଚନା। ତେବେ ପାଣ୍ଡିଆନଙ୍କ ରାଗର କାରଣ ଶ୍ରୀମନ୍ଦିର ଭିତରେ ପଡ଼ିଥିବା ପାନ ଛେପ ବୋଲି ଜଣାପଡ଼ିଛି। ମହାପ୍ରଭୁଙ୍କ ଦର୍ଶନ ପାଇଁ ଯାଉଥିବା ବେଳେ ଶ୍ରୀ ପାଣ୍ଡିଆନ ଶ୍ରୀମନ୍ଦିର ଘଣ୍ଟିଦ୍ବାର ନିକଟରେ ପାନ ଛେପ ପଡ଼ିଥିବା ଦେଖିଥିଲେ। ପାଣ୍ଡିଆନ ଏହା ଦେଖି ଭୀଷଣ ବିରକ୍ତି ପ୍ରକାଶ କରିଥିଲେ। ସିଧାସଳଖ ଶ୍ରୀମନ୍ଦିର ପରିସରରେ ଥିବା ଶାଖା କାର୍ଯ୍ୟାଳୟରେ ପହଞ୍ଚିଥିଲେ। ଦାୟିତ୍ବରେ ଥିବା କର୍ମଚାରୀ କିଏ ବୋଲି ପ୍ରଶ୍ନ କରିଥିଲେ। ଗତ ଶନିବାର ଦିନ ମଧ୍ୟ ସେଠାରେ ପାନ ଛେପ ଦେଖି ବିରକ୍ତି ପ୍ରକାଶ କରିଥିଲେ।
Sambad is now on WhatsApp
Join and get latest news updates delivered to you via WhatsApp
ବିରକ୍ତି ପ୍ରକାଶ କରିବା ସହ ଚୂନ, ବାଲିଟି ଦିଅ ନିଜେ ସଫା କରିଦେବି ବୋଲି ମଧ୍ୟ କହିଥିଲେ। ଆହୁରି ମଧ୍ୟ କହିଲେ, ଆଜି କହିକି ଯାଉଛି, ଯଦି ଆର ଥରକୁ ଆସିଲା ବେଳେ ଶ୍ରୀମନ୍ଦିର ପରିସରରେ କେଉଁଠି ପାନ ଛେପ ପଡ଼ିଥିବାର ଦେଖେ, କାହାକୁ କିଛି କହିବିନି, ଝାଡ଼ୁରେ ନିଜେ ଧୋଇଦେବି।
ଏଠାରେ ପ୍ରଶ୍ନ ଉଠୁଛି ଶ୍ରୀମନ୍ଦିର ଭିତରକୁ ପାନ ଗୁଟ୍ଖା ନେବାରେ ପ୍ରତିବନ୍ଧକ ରହିଛି, ଧରାପଡ଼ିଲେ ଜରିମାନା ବ୍ୟବସ୍ଥା ମଧ୍ୟ ରହିଛି। ଏଭଳି ସ୍ଥିତିରେ କିଏ ପାନ ନେଇ ମନ୍ଦିର ଭିତରକୁ ଯାଉଛନ୍ତି ବୋଲି ପ୍ରଶ୍ନ ଉଠିଛି। ପ୍ରଦୀପ୍ତ ମହାପାତ୍ର ଶ୍ରୀମନ୍ଦିର ମୁଖ୍ୟ ପ୍ରଶାସକ ଥିବା ବେଳେ ଶ୍ରୀମନ୍ଦିର ଭିତରକୁ ପାନ ଗୁଟୁଖା ପ୍ରବେଶ ଉପରେ କଟକଣା ଲଗାଇଥିଲେ। ଏ ନେଇ କଡ଼ା ନିୟମ ଲାଗୁ ହୋଇଥିଲା। ଏପରିକି ମନ୍ଦିର ଭିତରକୁ ପାନ ଗୁଟୁଖା ନେଇ କରି ଯାଉଥିବା ବେଳେ ଧରାପଡ଼ିଲେ ଏକ ହଜାର ଟଙ୍କା ଜରିମାନା ବ୍ୟବସ୍ଥା ଥିଲା। ଏ ନେଇ ସିଂହଦ୍ବାରରେ ଫଳକ ମଧ୍ୟ ଲାଗିଛି। ଦିନେ ଦୁଇ ଦିନ ନିୟମ କଡ଼ାକଡ଼ି କରି ପ୍ରଶାସନ ପୁଣି ଏହାକୁ ଭୁଲିଗଲା।