କୋରାପୁଟ: ଦୁର୍ଦ୍ଦାନ୍ତ ମାଓବାଦୀ ଧନଞ୍ଜୟ ଗୋପେ ଓରଫ ସୁଧୀର(୨୭) କୋରାପୁଟ ରେଂଜ ଡିଆଇଜିଙ୍କ ପାଖରେ ରବିବାର ଆତ୍ମ ସମର୍ପଣ କରିଛି। ସେ ଡିଭିଜନାଲ କମିଟି ସଦସ୍ୟ ଭାବେ କାମ କରୁଥିଲା। ଦୁଇ ଡଜନରୁ ଅଧିକ ମାଓ କାର୍ଯ୍ୟକଳାପରେ ତାର ସଂପୃକ୍ତି ଥିବା ସନ୍ଦେହ କରାଯାଉଥିଲାବେଳେ ତା’ ମୁଣ୍ଡ ପାଇଁ ୫ ଲକ୍ଷ ଟଙ୍କାର ପୁରସ୍କାର ରାଶି ରହିଥିଲା।
Sambad is now on WhatsApp
Join and get latest news updates delivered to you via WhatsApp
ମାଲକାନ୍ଗିରି ଜିଲ୍ଲା କାଲିମେଳା ଥାନା ଏମଭି-୩୧ ଗ୍ରାମର ଧନଞ୍ଜୟ ୨୦୦୯ରେ ସିପିଆଇ ମାଓବାଦୀ ସଂଗଠନରେ ଯୋଗ ଦେଇଥିଲା। ସେବେଠାରୁ ସେ କାଲିମେଳା ଦଲମରେ କାମ କରୁଥିଲା। ୨୦୧୫ ଠାରୁ ସେ ଗୁମ୍ମା ଏରିଆ କମିଟି ପାଇଁ କାମ କରୁଥିଲା। ଏକାଧିକ ମାଓ ହିଂସାରେ ସେ ସଂପୃକ୍ତି ଥିବା ସନ୍ଦେହ କରାଯାଉଛି। ପଡିଆ ବ୍ଲକ କାର୍ଯ୍ୟାଳୟ ଆକ୍ରମଣ, ଜାନିଗୁଡା ଆମ୍ବୁସ ସମେତ ପ୍ରାୟ ୧୪ଟି ହତ୍ୟାକାଣ୍ଡରେ ତାର ହାତ ଥିବା ପୁଲିସ ଅନୁମାନ କରାଯାଉଛି। ଏହା ବାଦ୍ ବହୁବାର ପୁଲିସ ସହ ଗୁଳି ବିନିମୟରେ ତାଙ୍କର ସଂପୃକ୍ତି ରହିଛି।
ଗୁରୁପ୍ରିୟା ସେତୁ ହେଲା ପରେ ଜନ୍ତାବାଇରେ କ୍ୟାମ୍ପ ହେବା ଏବଂ ବିଛିନ୍ନାଞ୍ଚଳରେ ସୁରକ୍ଷା କର୍ମୀଙ୍କ ଗତିବିଧି ବଢିବା ପରେ ମାଓବାଦୀଙ୍କ ମନୋବଳ ଭାଙ୍ଗି ଯାଇଛି। ଏହା ସହ ବିକାଶମୂଳକ କାମ ଆଗେଇବା ଦ୍ବାରା ଲୋକମାନେ ଏହାର ସୁଫଳ ପାଉଛନ୍ତି। ଏପଟେ ମାଓ ସଂଗଠନରେ କନିଷ୍ଠ ଓ ବରିଷ୍ଠ କ୍ୟାଡରଙ୍କ ମଧ୍ୟରେ ବିବାଦ ବଢୁଥିବାରୁ ସେ ସଂଗଠନ ଛାଡି ଆତ୍ମ ସମର୍ପଣ କରିଥିବା ଧନଞ୍ଜୟ କହିଛି । ଆତ୍ମ ସମର୍ପଣ କରିବା ପରେ ତାକୁ ସରକାରଙ୍କ ବିଭିନ୍ନ ସହାୟତା ପ୍ରଦାନ କରାଯିବ। ଏହା ସହିତ ଘର ନିର୍ମାଣ ପାଇଁ ଆର୍ଥିକ ସହାୟତା ସହିତ ବୈଷୟିକ ଶିକ୍ଷା ପାଇଁ ତାଲିମ ପ୍ରଦାନ କରାଯିବ ବୋଲି ପୁଲିସ ପକ୍ଷରୁ କୁହାଯାଇଛି। ଆଜି କୋରାପୁଟ ରେଂଜ ଡିଆଇଜି ହିମାଂଶୁ ଲାଲ ତାକୁ ଫୁଲତୋଡା ଦେଇ ସମାଜର ମୁଖ୍ୟ ସ୍ରୋତକୁ ସ୍ବାଗତ କରିଥିଲେ। ଏହି ସମୟରେ ମାଲକାନଗିରି ଏସପି ଜଗମୋହନ ମୀନା ଓ କୋରାପୁଟ ଏସପି ଡଃ କନୱର ବିଶାଳ ସିଂହ ଉପସ୍ଥିତ ଥିଲେ।