ଖୋର୍ଦ୍ଧାକୁ ଚଳିତ ବର୍ଷ ଜଳକଷ୍ଟ ଆଶଙ୍କା!
ଖୋର୍ଦ୍ଧା: ଖୋର୍ଦ୍ଧା ଜିଲ୍ଳା ଏକ ପ୍ରାକୃତିକ ପ୍ରବଣ ଜିଲ୍ଲା । ପ୍ରତିବର୍ଷ ମରୁଡ଼ି, ବାତ୍ୟା କିମ୍ବା ଅସାମୟିକ ବର୍ଷାର ବିତ୍ପାତ ଲାଗି ରହିଥାଏ । ୨୦୧୭ ମସିହା ପରଠାରୁ ଜିଲ୍ଲାରେ ବାତ୍ୟା ବିଭୀଷିକା ଲାଗି ରହିଥିବା ବେଳେ ଚଳିତ ବର୍ଷ ମରୁଡ଼ିର ଆଶଙ୍କା ସୃଷ୍ଟି ହୋଇଛି ।
Sambad is now on WhatsApp
Join and get latest news updates delivered to you via WhatsApp
ସୂଚନାନୁସାରେ, ଖୋର୍ଦ୍ଧା ଜିଲ୍ଳାରେ ସାଧାରଣତଃ ଜୁଲାଇରୁ ସେପ୍ଟମ୍ବର ମାସ ମଧ୍ୟରେ ବର୍ଷା ପରିମାଣ ହ୍ରାସ ପାଇବା ଦ୍ୱାରା ମରୁଡ଼ି ପରିସ୍ଥିତି ସୃଷ୍ଟି ହୋଇଥାଏ । ୨୦୧୪ରେ ମରୁଡ଼ି ପରିସ୍ଥିତି ସୃଷ୍ଟି ହୋଇଥିଲା । ଏଥିରେ ୫ଟି ପଂଚାୟତର ୧୫ଟି ଗାଁ ଓ ୬୪୦ ହେକ୍ଟର ଚାଷ ଜମି ପ୍ରଭାବିତ ହୋଇଥିଲା । ୨୦୧୫ରେ ୧୦୪ଟି ପଂଚାୟତର ୯୨୫ଟି ଗାଁ ଓ ୬୦,୭୫୦ ହେକ୍ଟର ଚାଷଜମି ପ୍ରଭାବିତ ହୋଇଥିଲା । ୨୦୧୭ରେ ୫ଟି ପଂଚାୟତର ୧୦ଟି ଗାଁର ୨୪ ହେକ୍ଟର ଚାଷ ଜମି ପ୍ରଭାବିତ ହୋଇଥିଲା । ଚଳିତ ବର୍ଷ କିନ୍ତୁ ଜଳ କ୍ଲିଷ୍ଟ ପରିସ୍ଥିତି ସୃଷ୍ଟି ହେବା ଆଶଙ୍କା ସୃଷ୍ଟି ହୋଇଛି । ଏହାର ପ୍ରମୁଖ କାରଣ, ବିଗତ ବର୍ଷଗୁଡ଼ିକରେ ଅପ୍ରିଲ୍ ମାସରେ ସାମନ୍ୟ ବର୍ଷା ହୋଇଥାଏ । ଫଳରେ ପ୍ରବଳ ଗ୍ରୀଷ୍ମ ପ୍ରବାହ ସତ୍ୱେ ଭୂତଳ ଓ ଭୂପୃଷ୍ଠ ଜଳସ୍ତର ଉପରେ ସେତେ ନକରାତ୍ମକ ପ୍ରଭାବ ପଡ଼ିନଥାଏ ।
୨୦୨୧ରେ ଅପ୍ରିଲ୍ ମାସରେ ମୋଟ ୧୦୬ ମିମି ବର୍ଷା ରେକର୍ଡ କରାଯାଇଥିଲା । ୨୦୨୦ରେ ମଧ୍ୟ ୯୦୭ ମିମି ବର୍ଷା ରେକର୍ଡ କରାଯାଇଥିଲା । ପୂର୍ବ ଦୁଇ ବର୍ଷ ଅଧିକାଂଶ ବର୍ଷା ଅପ୍ରିଲ୍ ପ୍ରଥମ ସପ୍ତାହରେ ପଡ଼ିଥିଲା । ଚଳିତ ବର୍ଷ ଅପ୍ରିଲ୍ ମାସର ଦ୍ୱିତୀୟ ସପ୍ତାହ ଅତିକ୍ରାନ୍ତ ହେବାକୁ ବସିଛି, କିନ୍ତୁ ବର୍ଷା ମୁନ୍ଦିଏ ପଡ଼ିନାହିଁ । ଜିଲ୍ଲାରେ ହାରହାରି ଭୂତଳ ଜଳସ୍ତର ୦. ୪୭୬୪ ମିଟର ରହିଥାଏ । ଗ୍ରୀଷ୍ମକାଳରେ ଏହା ୨ରୁ ୩ ମିଟର ହ୍ରାସ ପାଇଥାଏ । ଚଳିତବର୍ଷ ବର୍ଷା ଅଭାବ ଓ ଅନେକ ପୋଖରୀ, ନଦୀ ଆଦି ଭୂପୃଷ୍ଣ ଜଳ ଉତ୍ସ ସଂଖ୍ୟା ହ୍ରାସ ପାଇଥିବାରୁ ଏହା ଆହୁରି କମିବା ଆଶଙ୍କା କରାଯାଉଛି । ଅପରପକ୍ଷରେ, ଯଦି କେବଳ ଖୋର୍ଦ୍ଧା ସହର (ପୌରାଂଚଳ) କଥା ଅନୁଶୀଳନ କରାଯାଏ ତେବେ ଦୈନିକ ୭.୮୩ ନିୟୁତ ଲିଟର ଜଳ ଆବଶ୍ୟକ ହେଉଥିବା ବେଳେ ନରାଜ, ବୋର ୱେଲ୍, ନଳକୂପ ଆଦିରୁ ୯.୨୭ ନିୟୁତ ଲିଟର ଜଳ ଯୋଗାଣ ହୋଇଥାଏ । ଗ୍ରୀଷ୍ମକାଳରେ ଯୋଗାଣ ପରିମାଣ ୬-୭ ନିୟୁତ ଲିଟର/ଦୈନିକ ହ୍ରାସ ପାଇଥାଏ । ଚଳିତ ବର୍ଷ ବର୍ଷାର ଅଭାବ ଯୋଗୁଁ ଏହି ଅଭାବ ବୃଦ୍ଧି ପାଇବା ସମ୍ଭାବନା ରହିଛି । ପ୍ରଶାସନ ପକ୍ଷରୁ ଏହି ଦିଗ ପ୍ରତି ଦୃଷ୍ଟି ଦେଇ ଆବଶ୍ୟକ ପାଣି ଟ୍ୟାଙ୍କର ଓ ଅସ୍ଥାୟୀ ବ୍ୟବସ୍ଥା ଆଦି କରିବାକୁ ବିଶେଷଜ୍ଞମାନେ ମତ ଦେଇଛନ୍ତି ।