ଖୋର୍ଦ୍ଧାର ମେଗା ପାଇପ ଜଳ ପ୍ରକଳ୍ପ ପାଇଁ ଭବିଷ୍ୟତରେ ଜଳସଙ୍କଟ ଆଶଙ୍କା!
ଖୋର୍ଦ୍ଧା: ଖୋର୍ଦ୍ଧା ଉପଖଣ୍ଡର ୬ଟି ବ୍ଲକ ପାଇଁ ସରକାର ଦୁଇଟି ପର୍ଯ୍ୟାୟରେ ୪ଟି ମେଗା ପାଇପ ଜଳ ପ୍ରକଳ୍ପ ଆରମ୍ଭ କରିଛନ୍ତି । ତେବେ ଏହି ପ୍ରକଳ୍ପ ପାଇଁ ବର୍ତମାନ ସମୟ ରଙ୍ଗୀନ ଦେଖାଗଲେ ମଧ୍ୟ ଭବିଷ୍ୟତରେ ଜଳବାୟୁ ପରିବର୍ତନ ଯୋଗୁଁ ଏହି ପ୍ରକଳ୍ପଗୁଡ଼ିକର ସ୍ଥାୟିତ୍ୱ ନେଇ ବିଶେଷଜ୍ଞମାନେ ଆଶଙ୍କା ବ୍ୟକ୍ତ କରିଛନ୍ତି।
Sambad is now on WhatsApp
Join and get latest news updates delivered to you via WhatsApp
ସରକାର ଓ ବେସରକାରୀ ସଂସ୍ଥାଙ୍କ ପକ୍ଷରୁ ବିଭିନ୍ନ ସମୟରେ କରାଯାଇଥିବା ସର୍ବେକ୍ଷଣରେ ଖୋର୍ଦ୍ଧା ଜିଲ୍ଲାର ଦୟାନଦୀ ସବୁଠାରୁ ଅଧିକ ପ୍ରଦୂଷିତ ଓ ନିକଟ ଭବିଷ୍ୟତରେ ଏହାର ମୃତ୍ୟୁ ନେଇ ଯଥେଷ୍ଟ ସମ୍ଭାବନା ଥିବା ଦର୍ଶାଇଛନ୍ତି । ଏହି ସମୟରେ ଦୟାନଦୀର ଉପ ଓ ଶାଖା ନଦୀଗୁଡ଼ିକରୁ ମେଗା ଜଳ ପ୍ରକଳ୍ପ ପାଇଁ ଉତ୍ତୋଳିତ ହେବାକୁ ଥିବା ଜଳର ପରିମାଣ ଓ ଏହାର ସ୍ଥାୟିତ୍ୱ ନେଇ ବିଶେଷଜ୍ଞମାନେ ଆଶଙ୍କା ବ୍ୟକ୍ତ କରିଛନ୍ତି । ଟାଙ୍ଗୀ ବ୍ଲକର ୧୭ଟି ପଂଚାୟତ ପାଇଁ ଉଦ୍ଦିଷ୍ଟ ଥିବା ମେଗା ପାଇପ ଜଳ ପ୍ରକଳ୍ପ ପାଇଁ ଟାଙ୍ଗୀ ବ୍ଲକର ବାଦଲ ଗାଁ ନିକଟରୁ ୫.୬୭୮ ଘନମିଟର ପ୍ରତିଘଂଟା ଜଳ ଉତ୍ତୋଳନ କରାଯିବ । ଏନେଇ ଚଳିତ ଜୁନ୍ ୧ ତାରିଖରେ ରାଜ୍ୟ ଜଳ ସମ୍ପଦ ବିଭାଗର ଇଂଜିନିୟର ଇନ୍ ଚିଫ୍ ରାଜ୍ୟ ସରକାରଙ୍କ ବିଭାଗୀୟ ଅତିରିକ୍ତ ପ୍ରମୁଖ ସଚିବଙ୍କୁ ଚିଠି ଲେଖି ଜଣାଇଛନ୍ତି ।
ଚିଠି ଅନୁସାରେ, ବାଦଲ ନିକଟରେ ଦୟା ନଦୀର ଉପନଦୀ ମକରା ନଦୀରୁ ତିନିଟି ପର୍ଯ୍ୟାୟରେ ପ୍ରାୟ ୧୪ ଘନ ମିଟର ପ୍ରତିଘଂଟା ଜଳ ଉତ୍ତୋଳନ କରାଯିବ । ପ୍ରଥମ ପର୍ଯ୍ୟାୟରେ ୨୦୨୪ରେ ୪.୩୦୧ ଘନମିଟର ପ୍ରତିଘଂଟା, ୨୦୩୯ରେ ୪.୯୬୪ ଘନ ମିଟର ପ୍ରତିଘଂଟା ଓ ତୃତୀୟ ପର୍ଯ୍ୟାୟରେ ୫.୬୭୮ ଘନମିଟର ପ୍ରତିଘଂଟା ଜଳ ଉତ୍ତୋଳନ କରାଯିବ । ତେବେ ଚିଠିରେ ମକରା ନଦୀରୁ ଦିଆଯିବାକୁ ଥିବା ୪.୩୦୧ ଘନମିଟର ପ୍ରତିଘଂଟା (୧୦.୫୨୪ ନିୟୁତ ଲିଟର ପ୍ରତିଦିନ) ଜଳ ନିରବଚ୍ଛିନ୍ନ ଭାବେ ଉତ୍ତୋଳିତ ହୋଇପାରିବ ନାହିଁ ବୋଲି ଆଶଙ୍କା ବ୍ୟକ୍ତ କରାଯାଇଛି । ଏଥିପାଇଁ ମହାନଦୀ ଉପାତ୍ୟାକା ଓ ମକରା, ମଲାଗୁଣି ଓ ଦୟାନଦୀରେ ପରିବେଶ ଓ ଜଳବାୟୁ ପରିବର୍ତନ ଜନିତ ଜଳ ସମସ୍ୟା ପ୍ରତି ଅଙ୍ଗୁଳି ନିଦେ୍ର୍ଦଶ କରାଯାଇଛି । ଏଣୁ ଏହି ପାଇପ ଜଳ ଯୋଗାଣ ପ୍ରକଳ୍ପ ପାଇଁ ଆବଶ୍ୟକ ଜଳ ଗ୍ରୀଷ୍ମ ଋତୁ କିମ୍ବା ଅନ୍ୟ ପ୍ରତିକୂଳ ପରିସ୍ଥିତିରେ ଜଳ ଯୋଗାଇବା ନିଶ୍ଚିତ କରାଯାଇପାରିବ ନାହିଁ ବୋଲି ମଧ୍ୟ ସତର୍କ କରାଇଦିଆଯାଇଛି । ଏହି କାରଣରୁ ପ୍ରତି ୩ ବର୍ଷରେ ଥରେ ଜଳ ବିନିଯୋଗ ଅଡିଟ୍ ପରେ ପରବର୍ତୀ ଜଳ ଉତ୍ତୋଳନ ସମ୍ପର୍କରେ ଅନୁମତି ନେଇ ବିଚାର କରାଯିବ ବୋଲି ନିୟମ ଓ ସର୍ତ ରଖାଯାଇଛି ।
ସୂଚନାଯୋଗ୍ୟ, କୁଆଖାଇ ଠାରୁ ଭିନ୍ନ ହୋଇ ଖୋର୍ଦ୍ଧା ଓ ପୁରୀ ଜିଲ୍ଲାର ସୀମାନ୍ତ ଦେଇ ଦୀର୍ଘ ୩୭ କିମି ଅତିକ୍ରମ କରି ଚିଲିକାରେ ପଡ଼ିଥିବା ଦୟାନଦୀର ତିନିଟି ଉପନଦୀ- ମଲାଗୁଣି, ରାଜୁଆ ଓ ମକରା ନଦୀ ଓ ଗୋଟିଏ ଶାଖା ନଦୀ, ମନ୍ଦାକିନୀ ରହିଛି । ମଲାଗୁଣି ନଦୀର ରାମେଶ୍ୱର ନିକଟରେ ବନ୍ୟା ନିୟନ୍ତ୍ରଣ ଓ ଚାଷ ଜମିକୁ ଜଳ ଯୋଗାଇବା ପାଇଁ ଏକ କ୍ଷୁଦ୍ର ଜଳସେଚନ ପ୍ରକଳ୍ପ ରହିଛି ।