ବିଂଝାରପୁର ବ୍ଲକରେ ଜଳକଷ୍ଟ, ପିଇବା ପାଣି ଲାଗି ଖରସ୍ରୋତା ନଦୀ ଜଳ ଉପରେ ନିର୍ଭର କରୁଛନ୍ତି ସ୍ଥାନୀୟ ବାସିନ୍ଦା
ଯାଜପୁର: ଯାଜପୁର ଜିଲ୍ଲାର ବିଂଝାରପୁର ବ୍ଲକ ଅନ୍ତର୍ଗତ ବାଙ୍ଗରା ନୂଆକୂଳ ଜେନା ସାହିରେ ଜଳକଷ୍ଟ ଦେଖାଦେଇଛି । ଗାଁରେ ଥିବା ସରକାରୀ ନଳକୂଅ ଦୀର୍ଘବର୍ଷ ଧରି ଅଚଳ ହୋଇପଡ଼ିଛି । ପାଖ ଗାଁରୁ ଆସିଥିବା ପାଇପ ପାଣି ସମୁଦ୍ରକୁ ଶଙ୍ଖେ ହୋଇଛି । ବର୍ଷ ବର୍ଷ ଧରି ଏଭଳି ସମସ୍ୟା ଭୋଗୁ ଥିବାରୁ ସ୍ଥାନୀୟ ଲୋକେ ପାଖ ଖରସ୍ରୋତା ନଦୀ ଜଳ ଉପରେ ନିର୍ଭର କରୁଛନ୍ତି । ପାଖାପାଖି ୧୦୦ ପରିବାର ପ୍ରତିଦିନ ଏଭଳି ଦୁର୍ଦ୍ଦଶା ଭୋଗ କରୁଥିଲେ ହେଁ ପ୍ରଶାସନ ପାଖରେ କୌଣସି ଖବର ନାହିଁ ।
Sambad is now on WhatsApp
Join and get latest news updates delivered to you via WhatsApp
ପିଇବା ପାଣି ପାଇଁ ଲମ୍ବା ଲାଇନ । ଗାଁରେ ନାହିଁ ନଳକୂଅ । ଦୀର୍ଘ ବର୍ଷ ତଳୁ ଗାଁର ଥିବା ନଳକୂଅଟି ଅଚଳ ହୋଇଯାଇଥିଲେ ହେଁ ଆଜି ପର୍ଯ୍ୟନ୍ତ ସଜଡ଼ା ହୋଇପାରିନି । ଫଳରେ ବାଧ୍ୟ ହୋଇ ଲୋକେ ପାଖ ଖରସ୍ରୋତା ନଦୀ ଉପରେ ନିର୍ଭର କରୁଛନ୍ତି । ଗାଁର ନଳକୂଅରୁ ମଧୁର ଜଳ ନ ବାହାରିବାରୁ ଏହା ବ୍ୟବହାର ଅନୁପଯୋଗୀ ହୋଇଯାଇଥିଲା । ପଡ଼ୋଶୀ ବାଙ୍ଗରା ଗାଁରୁ ପାଇପ ଯୋଗେ ପାଣି ଆସୁଛି ସତ କିନ୍ତୁ କିଭଳି ଆସୁଛି ତାକୁ ଭଲ ଭାବେ ଟିକେ ଦେଖନ୍ତୁ । ଯାହା କେତେବେଳେ କେମିତି ଆସୁଛି ତାହା ସମୁଦ୍ରକୁ ଶଙ୍ଖେ ସଦୃଶ । ବାଲଟିଏ ପାଣିପାଇଁ ଦିନଯାକର ସମୟ ଯାଉଛି ।ସମସ୍ୟା ଦିନ କି ମାସେ ନୁହେଁ ପ୍ରତିବର୍ଷ ଏହି ସମସ୍ୟା ଦେଖାଦେଉଛି । ପ୍ରତିବର୍ଷ ପ୍ରଶାସନର ଦୃଷ୍ଟି ଆକର୍ଷଣ କଲେ ସମାଧାନ ହେବାର ପ୍ରତିଶ୍ରୁତି ମିଳେ ସତ, କିନ୍ତୁ ପୁରଣ ହୋଇପାରେନା ।
ଖରାଦିନ ଯାଇ ବର୍ଷା ଆସେ ସମସ୍ୟା ଯେଉଁଠି କି ସେଇଠି ରହିଯାଏ । ପାଣି ଟୋପେ ପାଇବା ପାଇଁ ଲୋକେ ଡହଳ ବିକଳ ହେଉଥିଲେ ସ୍ଥାନୀୟ ବ୍ଲକ ପ୍ରଶାସନ ନିଦାବିଷ୍ଣୁ ସାଜିଛି । ମହିଳାମାନେ ପାଖ ନଦୀରୁ ପାଣି ଆଣି ଘରର କାମ କରନ୍ତି,ଅନେକ ସମୟରେ ବିଭିନ୍ନ ରୋଗରେ ଆକ୍ରାନ୍ତ ହେଉଥିବାର ନଜିର ମଧ୍ୟ ରହିଛି । ଏତେପରେ ବି ସମସ୍ୟା ସଂପର୍କରେ ଜିଲା ପ୍ରଶାସନ ପାଖରେ କୌଣସି ଖବର ନାହିଁ । ତେବେ ଆଗାମୀ ଦିନରେ ସମାଧାନ କରାଯିବ ବୋଲି ଜିଲାପାଳ ପ୍ରତିଶ୍ରୁତି ଦେଇଛନ୍ତି । ପ୍ରତିବର୍ଷ ଖରାଦିନ ଆସିଲେ ଲୋକେ ଏମିତି ଅସୁବିଧାର ସମ୍ମୁଖୀନ ହୁଅନ୍ତି ଏବଂ ପ୍ରଶାସନ ପକ୍ଷରୁ ସମାଧାନ କରାଯିବାର ପ୍ରତିଶ୍ରୁତି ମିଳେ, କିନ୍ତୁ ଦେଖାଯାଉ ଜିଲାପାଳଙ୍କ ଏହି ପ୍ରତିଶ୍ରୁତି ପ୍ରକୃତରେ କାର୍ଯ୍ୟକାରୀ ହେଉଛି ନା ନାହିଁ ।