ରାଜ୍ୟରେ ଲାଗିରହିଥିବା ଝଡ଼ବର୍ଷା ଛାଡ଼ିଲା, କୁହୁଡ଼ି ବଢ଼ିବ
ଭୁବନେଶ୍ବର : ଦୁଇ ଦିନ ଧରି ରାଜ୍ୟରେ ଲାଗିରହିଥିବା ଝଡ଼ବର୍ଷା ଆଜି କମିଛି। ସକାଳଠାରୁ ରାଜ୍ୟର କୌଣସି ଅଞ୍ଚଳରେ ବର୍ଷା ହୋଇ ନ ଥିବା ଆଞ୍ଚଳିକ ପାଣିପାଗ ବିଜ୍ଞାନ କେନ୍ଦ୍ର ପକ୍ଷରୁ ସୂଚନା ଦିଆଯାଇଛି। କେତେକ ସ୍ଥାନରେ କୋହଲା ପାଗ ଲାଗି ରହିଥିବାରୁ ଥଣ୍ଡା ଅନୁଭୂତ ହୋଇଥିଲା। ଗୁରୁବାରଠାରୁ ପାଗ ସ୍ବାଭାବିତ ହେବା ସହ ଅଧିକାଂଶ ସ୍ଥାନରେ ଘନ କୁହୁଡ଼ି ଲାଗିରହିବ ବୋଲି ପାଣିପାଗ କେନ୍ଦ୍ର ଆକଳନ କରିଛି। ଘନ କୁହୁଡ଼ିକୁ ଦୃଷ୍ଟିରେ ରଖି ଆସନ୍ତା ୨୯ ତାରିଖ ପର୍ଯ୍ୟନ୍ତ ୟେଲୋ ୱାର୍ଣ୍ଣିଂ ଜାରି ହୋଇଛି।
Sambad is now on WhatsApp
Join and get latest news updates delivered to you via WhatsApp
ପାଣିପାଗ କେନ୍ଦ୍ରର ଆକଳନ ହେଉଛି ଯେ ଗୁରୁବାର ଉତ୍ତର ଉପକୂଳ ଓଡ଼ିଶା ସମେତ ସୁନ୍ଦରଗଡ଼, ଅନୁଗୁଳ, ଢେଙ୍କାନାଳ, ଖୋର୍ଧା, ପୁରୀ, ନୟାଗଡ଼, କନ୍ଧମାଳ, କଳାହାଣ୍ଡି, ବଲାଙ୍ଗୀର ଓ ଝାରସୁଗୁଡ଼ାରେ ଘନ କୁହୁଡ଼ି ହେବ। ସ୍ଥାନେ ସ୍ଥାନେ ୨୦୦ ମିଟର ପରେ ରାସ୍ତା ଦେଖାଯାଇ ନପାରେ। ୨୮ ତାରିଖ ଦିନ ଉପକୂଳ ଓଡ଼ିଶା ସମେତ କନ୍ଧମାଳ ଓ କଳାହାଣ୍ଡି ଏବଂ ୨୯ ତାରିଖ ଭୋର ସମୟରେ କଳାହାଣ୍ଡି, କନ୍ଧମାଳ ଓ ବଲାଙ୍ଗୀରରେ ଘନ କୁହୁଡ଼ି ହେବ। ଏହାପରେ ପାଗରେ ପରିବର୍ତନ ହେବ। ଆସନ୍ତା ୪୮ ଘଣ୍ଟା ମଧ୍ୟରେ ରାତିର ତାପମାତ୍ରା ୧ରୁ ୩ ଡିଗ୍ରି ପର୍ଯ୍ୟନ୍ତ ହ୍ରାସ ପାଇବ। ଏହାପରେ ସେଭଳି କୌଣସି ପରିବର୍ତନ ହେବନି। ଗୁରୁବାର ଦିନର ସ୍ବାଭାବିକ ତାପମାତ୍ରା ୨ରୁ ୪ ଡିଗ୍ରି କମ୍ ରହିବ ବୋଲି ପାଣିପାଗ କେନ୍ଦ୍ର ପକ୍ଷରୁ କୁହାଯାଇଛି। ଆଜି ସକାଳ ସୁଦ୍ଧା ଭୁବନେଶ୍ବରରେ ସର୍ବାଧିକ ୭୮.୨ ମିମି ବର୍ଷା ହୋଇଥିବା ବେଳେ ଭବାନୀପାଟଣାରେ ୩୫, ସମ୍ବଲପୁରରେ ୨୬, ପାରାଦୀପ ଓ ବାଲେଶ୍ବରରେ ୨୧, କଟକରେ ୧୯.୪, ଅନୁଗୁଳରେ ୧୯ ମିମି ବର୍ଷା ହୋଇଛି। ଅନ୍ୟ ସମସ୍ତ ସହରରେ ସ୍ବଳ୍ପରୁ ମଧ୍ୟମଧରଣର ବର୍ଷା ହୋଇଥିଲା। ରାୟଗଡ଼ା ବ୍ୟତୀତ ରାଜ୍ୟର ଅନ୍ୟାନ୍ୟ ସମସ୍ତ ସହରରେ ଆଜି ଦିନର ତାପମାତ୍ରା ୩୦ ଡିଗ୍ରି ତଳେ ରହିଥିଲା।