ହୋଲିରେ ଓଡ଼ିଶାରେ ପାଗ ଶୁଖିଲା ରହିବ, ୧୧ରୁ ୧୪ ଯାଏ କେତେକ ସ୍ଥାନରେ ବର୍ଷା, ବଢ଼ିବ ଦିନର ତାପମାତ୍ରା
ଭୁବନେଶ୍ୱର : ହୋଲିରେ ଓଡ଼ିଶାରେ ପାଗ ମୁଖ୍ୟତଃ ଶୁଖିଲା ରହିବ। କାଁ ଭାଁ ଗୋଟେ ଦୁଇଟି ସ୍ଥାନରେ ବର୍ଷା ହୋଇପାରେ। ତେବେ ଅପରାହ୍ଣଠାରୁ ୧୪ ତାରିଖ ଯାଏ ଅଧିକାଂଶ ଜିଲ୍ଲାରେ ବର୍ଷା ଲାଗି ରହିବ ବୋଲି ଆଞ୍ଚଳିକ ପାଣିପାଗ ବିଜ୍ଞାନ କେନ୍ଦ୍ର ପକ୍ଷରୁ ଆକଳନ କରାଯାଇଛି। ପାଣିପାଗ କେନ୍ଦ୍ର ପକ୍ଷରୁ କୁହାଯାଇଛି ଯେ ୧୦ ତାରିଖ ଅପରାହ୍ଣଠାରୁ କନ୍ଧମାଳ, ରାୟଗଡ଼ା, ଗଜପତି, ଗଞ୍ଜାମ, କୋରାପୁଟ, ସୁନ୍ଦରଗଡ଼, ଝାରସୁଗୁଡ଼ା, କେନ୍ଦୁଝର, ନୂଆପଡ଼ା, ବରଗଡ଼ ଓ ମୟୂରଭଞ୍ଜ ଜିଲ୍ଲାର ଗୋଟିଏ ଦୁଇଟି ସ୍ଥାନରେ ବର୍ଷା ହୋଇପାରେ। ୧୧ରୁ ୧୩ ତାରିଖ ମଧ୍ୟରେ ଉତ୍ତର କେନ୍ଦ୍ରୀୟ ଓଡ଼ିଶା ସମେତ ସୋନପୁର, ବଲାଙ୍ଗୀର, କନ୍ଧମାଳ, ବାଲେଶ୍ୱର, ବୌଦ୍ଧ, ସମ୍ବଲପୁର, ଦେବଗଡ଼, ଅନୁଗୁଳ, କେନ୍ଦୁଝର, ଢେଙ୍କାନାଳ, ଭଦ୍ରକ, ସୁନ୍ଦରଗଡ଼, ମୟୂରଭଞ୍ଜ ଓ କଳାହାଣ୍ଡି ଜିଲ୍ଲାର କେତେକ ସ୍ଥାନରେ ଘଡ଼ଘଡ଼ି ସହ ବର୍ଷା ହେବ। ସ୍ଥାନେ ସ୍ଥାନେ ଘଣ୍ଟା ପ୍ରତି ୩୦ରୁ ୪୦ କିମି ବେଗରେ ପବନ ବହିବାର ସମ୍ଭାବନା ରହିଛି। ଆସନ୍ତା ୨ରୁ ୩ ଦିନ ଯାଏ ସର୍ବାଧିକ ଓ ସର୍ବନିମ୍ନ ତାପମାତ୍ରାରେ ସେଭଳି ପରିବର୍ତନ ହେବନି। ୯ ତାରିଖରେ ଉତ୍ତର କେନ୍ଦ୍ରୀୟ ଓ ଦକ୍ଷିଣ ଓଡ଼ିଶାର କେତେକ ସ୍ଥାନରେ ବର୍ଷା ହୋଇପାରେ।
Sambad is now on WhatsApp
Join and get latest news updates delivered to you via WhatsApp
ପାଣିପାଗ ବିଶେଷଜ୍ଞ ପ୍ରଫେସର୍ ସୁରେନ୍ଦ୍ରନାଥ ପଶୁପାଳକଙ୍କ କହିବାନୁଯାୟୀ, ଆସନ୍ତା ୧୦ ତାରିଖ ତଥା ହୋଲି ଦିନ ସାରା ଓଡ଼ିଶାରେ ପାଗ ମୁଖ୍ୟତଃ ଶୁଖିଲା ରହିବ। ଅପରାହ୍ଣରେ କେତେକ ସ୍ଥାନରେ ପାଗ କୋହଲା ହୋଇପାରେ। ତେବେ ଆସନ୍ତାକାଲି(ସୋମବାର)ଠାରୁ ରାଜ୍ୟରେ ପବନର ଦିଗ ପରିବର୍ତନ ସହ ପାଗରେ ପରିବର୍ତନ ଆସିବ। ରାଜ୍ୟର ଅଧିକାଂଶ ସ୍ଥାନରେ ଦିନର ସର୍ବାଧିକ ତାପମାତ୍ରା ବଢ଼ିବ। ୯ ଓ ୧୦ ତାରିଖ ଦୁଇଦିନ ଭିତରେ ୨ରୁ ୩ ଡିଗ୍ରି ବଢ଼ିବାର ସମ୍ଭାବନା ରହିଛି। ୧୨ରୁ ୧୪ ତାରିଖ ମଧ୍ୟରେ ସର୍ବାଧିକ ତାପମାତ୍ରା ବିଶେଷ ଭାବେ ବଢ଼ିବ ଏବଂ ଗରମ ଅନୁଭୂତ ହେବ। ଭୁବନେଶ୍ୱର ସମେତ ଉପକୂଳ, କେନ୍ଦ୍ରୀୟ ଓ ଦକ୍ଷିଣ ଓଡ଼ିଶାର ଅଧିକ ଗରମ ଅନୁଭୂତ ହେବ। ସମ୍ବଲପୁରଠାରୁ ଉତ୍ତରରେ ରହିଥିବା ପଶ୍ଚିମ ଓଡ଼ିଶା, ବିଶେଷକରି ସୁନ୍ଦରଗଡ଼ରେ ଦିନର ତାପମାତ୍ର କମ୍ ରହବି। ୧୬ ତାରିଖ ସୁଦ୍ଧା ତାପମାତ୍ରା ପାଖାପାଖି ୬ ଡିଗ୍ରି ବଢ଼ିବାର ସମ୍ଭାବନା ରହିଛି। ଭୁବନେଶ୍ୱର ଓ ଅନୁଗୁଳରେ ଦିନର ତାପମାତ୍ରା ୩୮ ଡିଗ୍ରି ପହଞ୍ଚିବାର ସମ୍ଭାବନା ରହିଛି। ୧୦ ତାରିଖ ଅପରାହ୍ଣଠାରୁ ପାଗ ଆଂଶିକ ମେଘୁଆ ରହିବ। ୧୧ରୁ ୧୪ତାରିଖ ମଧ୍ୟରେ ବାଲେଶ୍ୱରଠାରୁ ସୋନପୁରକୁ ସଂଯୋଗ କରୁଥିବା ସରଳରେଖାର ଉତ୍ତରରେ ଥିବା କେତେକ ସ୍ଥାନରେ ଘଡ଼ଘଡ଼ି ସହ ବର୍ଷା ହୋଇପାରେ। ୧୮ ତାରିଖରେ ଅନୁଗୁଳ ସମେତ କେନ୍ଦ୍ରୀୟ ଓଡ଼ିଶାର କେତେକ ସ୍ଥାନରେ କୁଆପଥର ବର୍ଷା ହୋଇପାରେ। ଗତ ୩୬ ଘଣ୍ଟା ମଧ୍ୟରେ କଟକରେ ୫୩.୪ ମିମି ବର୍ଷା ହୋଇଥିବା ବେଳେ ଫୁଲବାଣୀରେ ୪୩.୬, ପାରାଦୀପରେ ୩୧.୧, ଝାରସୁଗୁଡ଼ାରେ ୧୨, ଚାନ୍ଦବାଲିରେ ୧୧.୯, ବାଲେଶ୍ବରରେ ୯.୪ ମିମି ବର୍ଷା ରେକର୍ଡ କରାଯାଇଛି।