ଆଜି ରାଜ୍ୟର ୫ ଜିଲ୍ଲାରେ ହେବ ପ୍ରବଳ ବର୍ଷା, ୟେଲୋ ୱାର୍ଣ୍ଣିଂ ଜାରି
ଭୁବନେଶ୍ୱର : ମୌସୁମୀ ଟ୍ରଫ୍ ଏବେ ରାଜସ୍ଥାନରୁ ମଣିପୁର ଆଡ଼କୁ ଗତି କରୁଛି ଅର୍ଥାତ୍ ଧୀରେ ଧୀରେ ନିଜ ପାରମ୍ପରିକ ସ୍ଥାନରୁ ଉତ୍ତରମୁହାଁ ହେବାରେ ଲାଗିଛି। ଏହା ପ୍ରଭାବରେ ଆସନ୍ତାକାଲି ରାଜ୍ୟର ଅଧିକାଂଶ ସ୍ଥାନରେ ବିଜୁଳି, ଘଡ଼ଘଡ଼ି ସହ ବର୍ଷା ହେବା ସମ୍ଭାବନା ରହିଛି। ବିଶେଷକରି ମାଲକାନଗିରି, କୋରାପୁଟ, ରାୟଗଡ଼ା, ଗଜପତି ଓ କନ୍ଧମାଳ ଆଦି ୫ ଜିଲ୍ଲାର ଗୋଟିଏ ଦୁଇଟି ସ୍ଥାନରେ ପ୍ରବଳ ବର୍ଷା ହୋଇପାରେ। ଏହାବ୍ୟତୀତ ବାଲେଶ୍ବର, ଭଦ୍ରକ, ଯାଜପୁର, କେନ୍ଦ୍ରାପଡ଼ା, କଟକ, ଜଗତ୍ସିଂହପୁର, ପୁରୀ, ଖୋର୍ଧା, ନୟାଗଡ଼, ଗଞ୍ଜାମ, ଗଜପତି, ନବରଙ୍ଗପୁର, କଳାହାଣ୍ଡି, କନ୍ଧମାଳ, ରାୟଗଡ଼ା, ମାଲକାନଗିରି, କୋରାପୁଟ, କେନ୍ଦୁଝର, ମୟୂରଭଞ୍ଜ ଓ ଢେଙ୍କାନାଳ ଆଦି ଜିଲ୍ଲାର କେତେକ ସ୍ଥାନରେ ବିଜୁଳି ଘଡ଼ଘଡ଼ି ସହ ବର୍ଷା ହେବ। ଏହି ସବୁ ଜିଲ୍ଲାଗୁଡ଼ିକ ପାଇଁ କେନ୍ଦ୍ର ୟେଲୋ ୱାର୍ଣ୍ଣିଂ ଜାରି କରିଛି। ଅପରପକ୍ଷେ ପ୍ରବଳ ବର୍ଷାକୁ ଦୃଷ୍ଟିରେ ରଖି ସଜାଗ ରହିବା ସହ ଆବଶ୍ୟକ ପ୍ରସ୍ତୁତି ସାରିବାକୁ ସ୍ବତନ୍ତ୍ର ରିଲିଫ୍ କମିସନର୍ ପ୍ରଦୀପ ଜେନା ସମସ୍ତ ଜିଲ୍ଲାପାଳଙ୍କୁ ଚିଠି କରିଛନ୍ତି।
Sambad is now on WhatsApp
Join and get latest news updates delivered to you via WhatsApp
କେନ୍ଦ୍ରର ସୂଚନା ଅନୁଯାୟୀ, ମୌସୁମୀ ଟ୍ରଫ୍ ଏବେ ଉତ୍ତରମୁହାଁ ହୋଇଥିବାରୁ ରାଜ୍ୟରେ ମୌସୁମୀ ଦୁର୍ବଳ ହୋଇଯିବାର ଆଶଙ୍କା ପ୍ରକାଶ ପାଇଛି। କିନ୍ତୁ ଆସନ୍ତା ୩ ଦିନ ଯଦି ଲଗାତାର ୫ମିମିରୁ ଅଧିକ ବର୍ଷା ହେବ, ତେବେ ମୌସୁମୀ ସକ୍ରିୟ ଥିବା ଧରାଯିବ ବୋଲି ପାଣିପାଗ ବିଜ୍ଞାନୀ ଉମାଶଙ୍କର ଦାସ କହିଛନ୍ତି। ସେ କହିଛନ୍ତି, ଗତ ୨୦ ତାରିଖରେ ଉତ୍ତର-ପୂର୍ବ ବଙ୍ଗୋପସାଗରରେ ହୋଇଥିବା ଲଘୁଚାପ ପ୍ରଭାବରେ ରାଜ୍ୟରେ ମୌସୁମୀ ସକ୍ରିୟ ହୋଇଥିଲା। କିନ୍ତୁ ଏବେ ମୌସୁମୀ ଟ୍ରଫ୍ ଧୀରେଧୀରେ ଉତ୍ତରମୁହାଁ ହେବାରେ ଲାଗିଛି। ଏହାର ପ୍ରଭାବରେ ୨୬ ତାରିଖଠାରୁ ରାଜ୍ୟରେ ବିଶେଷ ବର୍ଷାର ସମ୍ଭାବନା ନାହିଁ। ମୌସୁମୀ ଥିବା ସମୟରେ ସାଧାରଣତଃ ରାଜ୍ୟରେ ଦିନକୁ ୬ରୁ ୧୦ମିମି ବର୍ଷା ହୋଇଥାଏ। ଯଦି ଲଗାତାର ୩ ଦିନ ପର୍ଯ୍ୟନ୍ତ ଦିନକୁ ଏହାର ଅଧା ବର୍ଷା ହୁଏ, ତେବେ ମୌସୁମୀ ଦୁର୍ବଳ ହେଲା ବୋଲି ଆମେ ଘୋଷଣା କରିଥାଉ।
ଗତ ୨୪ ଘଣ୍ଟାରେ ଉତ୍ତର ଆଭ୍ୟନ୍ତରୀଣ ଓଡ଼ିଶାର କିଛି କିଛି ସ୍ଥାନରେ ହାଲ୍କାରୁ ମଧ୍ୟମ ଧରଣର ବର୍ଷା ହୋଇଯାଇଛି। ଏଥିସହ ରାଜ୍ୟର ବାକି ସମସ୍ତ ସ୍ଥାନରେ ବିଶେଷକରି ଦକ୍ଷିଣ ଓ ଉପକୂଳ ଓଡ଼ିଶାର କେତେକ ସ୍ଥାନରେ ଝଡ଼ ତୋଫାନ ଜନିତ ବର୍ଷା ହୋଇଯାଇଛି। ସର୍ବାଧିକ ୩୨.୨ ମିମି ବର୍ଷା ଅନୁଗୁଳ ଜିଲ୍ଲା ରେଙ୍ଗାଲିରେ ହୋଇଛି। ମୟୂରଭଞ୍ଜ ଜିଲ୍ଲା ତିରିଂରେ ୨୬.୨ମିମି, ବୌଦ୍ଧ ଜିଲ୍ଲା ହାଡ଼ଭଙ୍ଗାରେ ୨୩.୦ମିମି ବର୍ଷା ହୋଇଥିବା ରେକର୍ଡ କରାଯାଇଛି।