ଶିଶୁପୁତ୍ରକୁ ବିକ୍ରି କରୁଥିଲେ ବାପାମା’, ପ୍ରଶାସନ ପହଞ୍ଚି ଅଟକାଇଲା
କେନ୍ଦୁଝର : କେନ୍ଦୁଝର ସଦର ବ୍ଲକ୍ ବୋଦାପଳଶା ପଞ୍ଚାୟତ ଶଙ୍କରପୁର ଗ୍ରାମରେ ଜଣେ ବ୍ୟକ୍ତି ନିଜର ଶିଶୁପୁତ୍ରକୁ ବିକ୍ରି କରିବାକୁ ଉଦ୍ୟମ କରୁଥିବା ବେଳେ ପ୍ରଶାସନ ପହଞ୍ଚି ବନ୍ଦ କରିଛି। ଶିଶୁ ସୁରକ୍ଷା ବିଭାଗର କର୍ମଚାରୀ ଓ ସ୍ଥାନୀୟ ଜନପ୍ରତିନିଧିମାନେ ବୁଝାସୁଝା କରିବା ପରେ ଦମ୍ପତି ଶିଶୁର ଲାଳନପାଳନ କରିବାକୁ ନିଷ୍ପତ୍ତି ନେଇଛନ୍ତି।
Sambad is now on WhatsApp
Join and get latest news updates delivered to you via WhatsApp
ସୂଚନା ଅନୁସାରେ, ପାରିବାରିକ ସମସ୍ୟା, ଅର୍ଥାଭାବ ଓ ପତ୍ନୀଙ୍କ ସ୍ବାସ୍ଥ୍ୟାବସ୍ଥା ଭଲ ନଥିବାରୁ ଶଙ୍କରପୁର ଗ୍ରାମର ଏକ ଦମ୍ପତି ଶିଶୁଟିକୁ ବିକ୍ରି କରିବାକୁ ଉଦ୍ୟମ କରୁଥିଲେ। କେନ୍ଦୁଝର ସଦର ବିଡିଓ ଅଧିକାରୀ ବିଜୟ କୁମାର ସାହୁ ଏ ସମ୍ପର୍କରେ ଖବର ପାଇ ତୁରନ୍ତ ଜିଲ୍ଲା ଶିଶୁ ସୁରକ୍ଷା ବିଭାଗକୁ ଜଣାଇଥିଲେ। ଜିଲ୍ଲା ଶିଶୁ ସୁରକ୍ଷା ଅଧିକାରୀ ଦେବାଙ୍ଗନା ବାରିକଙ୍କ ନିର୍ଦେଶକ୍ରମେ ବିଭାଗର ଦୁଇଜଣ କର୍ମଚାରୀ ସୌମ୍ୟରଞ୍ଜନ ରଣା, ଝରଣା ଦାଶ ଓ ଶିଶୁ ମଙ୍ଗଳ ସମିତିର ସଦସ୍ୟ ରାଜଶ୍ରୀ ଉପାଧ୍ୟାୟ ଶଙ୍କରପୁର ଗ୍ରାମରେ ପହଞ୍ଚିଥିଲେ। ୱାର୍ଡମେମ୍ବର ନିରାକାର ମହାନ୍ତି, ସମିତିସଭ୍ୟା ପଦ୍ମିନୀ ରାୟ ଓ ପୁଲିସର ହସ୍ତକ୍ଷେପ ପରେ ବାପାମା’ ବୁଝିଥିଲେ। ଶିଶୁପୁତ୍ରକୁ ବିକ୍ରି ନ କରି ନିଜେ ଲାଳନପାଳନ କରିବେ ବୋଲି ରାଜି ହୋଇଥିଲେ।