ଖୁଣ୍ଟୁଣୀ: କଟକ ଜିଲ୍ଲା ଖୁଣ୍ଟୁଣୀ ଥାନା ଘଣ୍ଟିଖାଲସ୍ଥିତ ପୁରୁଣା କଟକ-ସମ୍ବଲପୁର ରାସ୍ତାର ନିଧିପୁର ନଈମୁହଁ ଗଡ଼ାରେ ଏକ ବଡ଼ଧରଣର ଅଘଟଣ ଟଳି ଯାଇଛି। ପୁରୀରୁ ଜଗନ୍ନାଥ ଦର୍ଶନ କରି ଫେରୁଥିବା ଏକ ପରିବାର ସୋମବାର ରାତିରେ ବନ୍ୟା ପାଣିରେ ଫସି ଯାଇଥିବାବେଳେ ସେମାନଙ୍କ କାର୍‌ ଭାସି ଯାଇଥିଲା। କାର୍‌ରେ ଥିବା ୪ ଜଣଙ୍କୁ ତିନି ଘଣ୍ଟା ପରେ ଉଦ୍ଧାର କରାଯାଇଛି। ଉଦ୍ଧାର ହୋଇଥିବା କାର୍‌ର ଯାତ୍ରୀ ହେଲେ; ଅନୁଗୁଳ ତାମ୍ବେତ କଲୋନିର ହଳଧର ଦାସ (୫୦), ତାଙ୍କ ପତ୍ନୀ ମମତା ଦାସ(୪୫), ପୁଅ ଶିବସୁନ୍ଦର ଦାସ(୨୦) ଏବଂ ଚାଳକ ତଥା କାର୍‌ ମାଲିକ ଅମୂଲ୍ୟ ସାହୁ।

Advertisment

ସୂଚନା ମୁତାବକ, ହଳଧର ନିଜ ପତ୍ନୀ ଓ ପୁଅଙ୍କ ସହ କାର୍‌ରେ ଶ୍ରୀଜଗନ୍ନାଥଙ୍କ ଦର୍ଶନ ପାଇଁ ସୋମବାର ପୁରୀ ଯାଇଥିଲେ। ସେଠାରୁ ସେମାନେ ପୁରୁଣା କଟକ-ସମ୍ବଲପୁର ରାସ୍ତାର କଖଡ଼ି ଦେଇ ଅନୁଗୁଳ ଫେରୁଥିଲେ। ମଧ୍ୟରାତ୍ରିରେ ନିଧିପୁରଗଡ଼ାରେ ୮ଫୁଟ ଉଚ୍ଚ ବନ୍ୟାଜଳ ପ୍ରବାହିତ ହେଉଥିବା କାର୍‌ ଚାଳକ ଜାଣି ନ ପାରି ପାଣି ଭିତରେ ଗାଡ଼ି ପୂରାଇ ଦେଇଥିଲେ। ଫଳରେ, ପାଣି ସୁଅରେ କାର୍‌ ଭାସିଯାଇ ରାସ୍ତାରୁ ପ୍ରାୟ ୧୫୦ ମିଟର ଦୂର ଗହୀରକୁ ଚାଲି ଯାଇଥିଲା। ସୌଭାଗ୍ୟକୁ ହଠାତ୍‌ କାର୍‌ ଡୋର୍‌ ଖୋଲି ଯାଇଥିଲା। ପାଣିରେ ଗାଡ଼ିଟି ସମ୍ପୂର୍ଣ୍ଣ ବୁଡ଼ି ଯାଇଥିଲାବେଳେ ସମସ୍ତ ୪ଜଣ ଯାତ୍ରୀ କାର୍‌ ଛାତ ଉପରକୁ ଉଠି ଆସି ଉଦ୍ଧାର ପାଇଁ ଚିତ୍କାର କରିଥିଲେ। ଏହିସମୟରେ ନିଧିପୁର ଛକରେ ରାତ୍ରି ଡ୍ୟୁଟି କରୁଥିବା ଖୁଣ୍ଟୁଣୀ ଥାନାର ହୋମ୍‌ଗାର୍ଡ ନରେଶ ନାୟକ କାର୍‌ ଆରୋହୀମାନଙ୍କ ପାଇଁ ଦେବଦୂତ ସାଜିଥିଲେ। ଘଟଣା ସମ୍ପର୍କରେ ସେ ଜାଣିପାରି ତୁରନ୍ତ ପୁଲିସ୍‌ ଓ ସ୍ଥାନୀୟ ଲୋକଙ୍କୁ ଖବର ଦେଇଥିଲେ। ଖୁଣ୍ଟୁଣୀ ଥାନା ଓ ଘଣ୍ଟିଖାଲ ଫାଣ୍ଡି ପୁଲିସ ସହ ସ୍ଥାନୀୟ ଲୋକମାନେ ପହଞ୍ଚି ଆଠଗଡ଼ ତହସିଲଦାରଙ୍କୁ ଅଘଟଣ ସମ୍ପର୍କରେ ଜଣାଇଥିଲେ। ତୁରନ୍ତ ଆଠଗଡ଼ରୁ ଅଗ୍ନିଶମ ବାହିନୀ ବିଭାଗ ପହଞ୍ଚି ଉଦ୍ଧାର କରିଥିଲେ।