ଭୁବନେଶ୍ୱର: ଆଉ ମାତ୍ର ୮ ଦିନ ପରେ ମୁଖ୍ୟ ଶାସନ ସଚିବ ଅସିତ୍ ତ୍ରିପାଠୀଙ୍କ ଚାକିରି ଜୀବନ ସମାପ୍ତ ହେବ। ଶ୍ରୀ ତ୍ରିପାଠୀ ଚାକିରିରୁ ଅବସର ଗ୍ରହଣ କରିବେ। ଏ ନେଇ ଆଜି ସାଧାରଣ ପ୍ରଶାସନ ପକ୍ଷରୁ ବିଧିବଦ୍ଧ ବିଜ୍ଞପ୍ତି ପ୍ରକାଶ ପାଇଛି। ମୁଖ୍ୟ ଶାସନ ସଚିବ ଅସିତ୍ ତ୍ରିପାଠୀ ଆସନ୍ତା ୩୧ ତାରିଖ ଦିନ ଅବସର ନେବା ସଂକ୍ରାନ୍ତରେ ସରକାର ସୂଚିତ କରିଛନ୍ତି । ୧୯ ଅଗଷ୍ଟ ୨୦୧୯ରେ ମୁଖ୍ୟ ଶାସନ ସଚିବ ଭାବେ ଅଭସ୍ଥାପିତ ହୋଇଥିବା ଶ୍ରୀ ତ୍ରିପାଠୀ ରାଜ୍ୟ ସରକାରଙ୍କ କରୋନା ପରିଚାଳନାରେ ମୁଖ୍ୟ ଭୂମିକା ଗ୍ରହଣ କରିଥିଲେ। ଏଥିସହ ଲକଡାଉନ୍ ଓ ସଟଡାଉନ୍ ଭଳି ବଡ଼ ବଡ ଘୋଷଣା କରି ବେଶ ଚର୍ଚ୍ଚାରେ ରହିଥିଲେ ।
Sambad is now on WhatsApp
Join and get latest news updates delivered to you via WhatsApp
ଅତି ବିଶ୍ବସ୍ତ ସୂତ୍ରରୁ ମିଳୁଥିବା ସୂଚନା ମୁତାବକ, ଉନ୍ନୟନ କମିସନର ସୁରେଶ ମହାପାତ୍ର ମୁଖ୍ୟସଚିବ ଦୌଡରେ ଆଗରେ ଅଛନ୍ତି। ବରିଷ୍ଠତା ଦୃଷ୍ଟିରୁ ବି ସବୁଠୁ ଆଗରେ ରହିଛନ୍ତି ୧୯୮୬ ବ୍ୟାଚର ଅଧିକାରୀ ଶ୍ରୀ ମହାପାତ୍ର । ତା’ ପଛକୁ ବରିଷ୍ଠତା ଭିତ୍ତିରେ ୧୯୮୭ ବ୍ୟାଚର ଆଇଏଏସ ପ୍ରଦୀପ୍ତ ମହାପାତ୍ରଙ୍କ ନାଁ ଆସୁଛି । କିନ୍ତୁ ଗତ ଦୁଇ/ ତିନିଥର ହେଲା ଉନ୍ନୟନ କମିସନର ଥିବା ଅଧିକାରୀଙ୍କୁ ମୁଖ୍ୟ ଶାସନ ସଚିବ ପଦବୀରେ ଅବସ୍ଥାପିତ କରାଯାଉଛି । ତେଣୁ ତାଙ୍କୁ ଏହି ଗୁରୁତ୍ବପୂର୍ଣ୍ଣ ପଦବିରେ ସରକାର ବସାଇବା ସମ୍ଭାବନା ଅଧିକ। ଏଥିସହିତ ନୂଆବର୍ଷରେ ପ୍ରଶାସନିକସ୍ତରରେ ଏକ ବଡ଼ଧରଣର ଅଦଳବଦଳ ହେବାର ସମ୍ଭାବନା ସୃଷ୍ଟି ହୋଇଛି।
ସାଧାରଣତଃ ମୁଖ୍ୟଶାସନ ସଚିବ ବଦଳିଲେ ପ୍ରଶାସନରେ ପରିବର୍ତନ ହୋଇଥାଏ । ଯଦି ଶ୍ରୀ ମହାପାତ୍ର ମୁଖ୍ୟସଚିବ ହୁଅନ୍ତି, ତେବେ ଉନ୍ନୟନ କମିସନର ପଦବିରେ ନୂଆ ଅଧିକାରୀଙ୍କୁ ଦେଖିବାକୁ ମିଳିବ। ସେହିଭଳି ଦୀର୍ଘ ୮ ବର୍ଷ ଧରି ନଗର ଉନ୍ନୟନ ଓ ପଞ୍ଚାୟତିରାଜ ସଚିବଙ୍କର ବଦଳି ହୋଇନାହିଁ। ଏଣୁ ଜଙ୍ଗଲ, ଉଚ୍ଚଶିକ୍ଷାଠାରୁ ଆରମ୍ଭ କରି ଏକାଧିକ ବିଭାଗର ସଚିବସ୍ତରରେ ଅଦଳବଦଳ ହୋଇପାରେ। କିଛି ଜିଲ୍ଲାର ଜିଲ୍ଲାପାଳ ବି ବଦଳିପାରନ୍ତି। ଢେଙ୍କାନାଳ ଓ ସମ୍ବଲପୁର ଜିଲ୍ଲାରେ ଏସ୍ପି ପଦବି ଖାଲି ପଡିଛି। ଏଣୁ ଏସବୁ ସହିତ ନୂଆ ବର୍ଷରେ ଆଇଏଏସ୍ ଓ ଆଇପିଏସ୍ ସ୍ତରରେ ମଧ୍ୟ ବ୍ୟାପକ ଅଦଳବଦଳ ହେବ।