କୋମନା,: ନୂଆପଡ଼ା ଜିଲ୍ଲା କୋମନା ଥାନା କାଣ୍ଡେତରା ଗ୍ରାମରେ ପତ୍ନୀକୁ ତଣ୍ଟିଚିପି ହତ୍ୟା ଘଟଣାରେ ପୁଲିସ୍‌ ସ୍ବାମୀକୁ ଅଟକ ରଖି ତଦନ୍ତ ଜାରି ରଖିଛି। ପ୍ରକାଶ ଯେ, କାଣ୍ଡେତରା ଗ୍ରାମର ନରହରି ଭୋଇ (୩୫) ବୈଶାଖୀ ଭୋଇ (୩୨)ଙ୍କୁ ବିବାହ କରିଥିବା ବେଳେ ତାଙ୍କର ୧୧ ବର୍ଷର ଏକ ପୁଅ ଓ ୫ ବର୍ଷର ଝିଅ ଅଛନ୍ତି। ଦୁଇବର୍ଷ ହେଲା ନରହରି ଅନ୍ୟ ଜଣେ ମହିଳାଙ୍କୁ ଭଲ ପାଉଥିବା ବୈଶାଖୀ ଜାଣିବା ପରେ ନରହରିଙ୍କୁ ବାରଣ କରିଥିଲେ। ଏହି ଘଟଣାକୁ ନେଇ ନରହରି ଅନେକ ସମୟରେ ନିଶାସେବନ କରି ବୈଶାଖୀକୁ ମାର୍‌ପିଟ୍‌ କରୁଥିଲା। ବୁଧବାର ରାତିରେ ନିଶାସେବନ କରି ଘରକୁ ଆସିବା ପରେ ନରହରି ଓ ବୈଶାଖୀ ମଧ୍ୟରେ ପାଟିତୁଣ୍ଟ ହେବା ସହ ବୈଶାଖୀର ତଣ୍ଟି ଚିପିଦେଇ ଶୋଇବା ଘରେ ପକାଇ ଦେଇଥିଲା। ଆଜି ସକାଳେ ଏହି ଘଟଣା ଜଣାପଡ଼ିବା ପରେ ପଡ଼ୋଶୀ ଘର ଲୋକେ ବୈଶାଖୀଙ୍କ ବାପ ଘରକୁ ଖବର ଦେଇଥିଲେ। ବୈଶାଖୀର ଭାଇ ହରି ସ୍ବାଇଁ ପହଞ୍ଚି ଭଣଜାଠାରୁ ଘଟଣା ବିଷୟରେ ଜାଣିବା ପରେ ଭିଣୋଇ ନରହରି ଭଉଣୀକୁ ହତ୍ୟା କରିଥିବା ନେଇ କୋମନା ଥାନାରେ ଅଭିଯୋଗ କରିଥିଲେ। ଅଭିଯୋଗ ପରେ କୋମନା ପୁଲିସ୍‌ ସାଇଣ୍ଟିଫିକ୍‌ ଟିମ୍‌ ସହ ଘଟଣାସ୍ଥଳରେ ପହଞ୍ଚି ତଦନ୍ତ କରିଥିଲା। ପରେ ଶବ ଜବତ କରି ବ୍ୟବଚ୍ଛେଦ ପାଇଁ ପଠାଇଥିଲା। ନରହରିକୁ ଅଟକ ରଖି ତଦନ୍ତ ଜାରି ରଖିଥିବା ଆଇଆଇସି ଟଙ୍କଗିରି ଭୋଇ ପ୍ରକାଶ କରିଛନ୍ତି।