ସୀମାନ୍ତରେ ଏନକାଉଣ୍ଟର; ଜଣେ ମହିଳା ମାଓବାଦୀ ନିହତ

ମାଲକାନଗିରି: ସୀମାନ୍ତ ଛତିଶଗଡର କାଂକେର ଜିଲ୍ଲାରେ ପୁଲିସ ନକ୍ସଲ ମଧ୍ୟରେ ଗୁଳିବିନିମୟ ଘଟିଛି। ଏହି ଗୁଳିବିନିମୟରେ ଜଣେ ମହିଳା ନକ୍ସଲର ମୃତ୍ୟୁ ହୋଇଥିବା ଜଣାପଡ଼ିଛି। କାଂକେର ଜିଲ୍ଲାର ଛୋଟେବେଠିଆ ଥାନା ଅନ୍ତର୍ଗତ ବିନାଗୁଣ୍ଡା ଗ୍ରାମ ଜଂଗଲରେ ଜିଲ୍ଲା ପୁଲିସ, ବିଏସଏଫ, ବସ୍ତର ଫାଇଟରସ୍ ଏବଂ ଡିଆରଜି ଯବାନଙ୍କ ସହ ନକ୍ସଲର ମୁହାଁମୁହିଁ ହୋଇଥିଲା। ଦୀର୍ଘ ସମୟ ଧରି ଦୁଇ ପଟରୁ ଗୁଳିବିନିମୟ ଘଟିଥିଲା।

ତେବେ ଗୁଳିବିନିମୟ ସ୍ଥାନଟି ଥାନା ଠାରୁ ମାତ୍ର ୧୨ କିଲୋମିଟର ଦୁରରେ ରହିଛି। ପରେ ଘଟଣାସ୍ଥଳରେ ସର୍ଚ୍ଚ ଅପରେସନ କରୁଥିବା ବେଳେ ଯବାନ ଜଣେ ମହିଳା ନକ୍ସଲର ଶବକୁ ଉଦ୍ଧାର କରିଛନ୍ତି। ଶବ ନିକଟରୁ ଗୋଟିଏ ୩୦୩ ରାଇଫଲ, ଗୋଟିଏ ୩୧୫ ରାଇଫଲ ସମେତ ବହୁ ମାଓ ସାମଗ୍ରୀ ଉଦ୍ଧାର କରାଯାଇଛି। ଏହି ଗୁଳିବିନିୟମରେ ସମସ୍ତ ଯବାନ ସୁରକ୍ଷିତ ରହିଛନ୍ତି। ସର୍ଚ୍ଚ ଅଭିଯାନ ଏବେ ବି ଚାଲିଥିବା ପୁଲିସ କହିଛି। ମୃତ ମହିଳା ନକ୍ସଲ ପିଏଲଜିଏ କମ୍ପାନି ନମ୍ବର-୫ର ବୋଲି ଜଣାପଡିଛି। ଚିହ୍ନଟ ପରେ ହିଁ ସଠିକ ରିପୋର୍ଟ ଦିଆଯିବ ବୋଲି ପୁଲିସ କହିଛି।