ନିଜ ଦେହରେ କିରାସିନି ଢାଳି ଆତ୍ମହତ୍ୟା କଲେ ୯ ମାସର ଗର୍ଭବତୀ, କାରଣ ଅସ୍ପଷ୍ଟ
ପାଲଲହଡ଼ା: ଗତକାଲି ମଧ୍ୟରାତ୍ରିରେ ପାଲଲହଡ଼ା ଥାନା ଜମରଦିହ ଗାଁର ଜଣେ ୯ ମାସର ଗର୍ଭବତୀ ମହିଳା ନିଜ ଦେହରେ କିରାସିନ ଢାଳି ଆତ୍ମହତ୍ୟା କରିଥିବାର ଖବର ମିଳିଛି। ମିଳିଥିବା ସୂଚନା ଅନୁଯାୟୀ, ଦୁଇଟି ସନ୍ତାନର ଜନନୀ ପ୍ରଣତି ଧୀବର(୨୫) ୯ ମାସର ଗର୍ଭବତୀ ଥିଲେ। ସେ ଆଉ କିଛି ଦିନ ପରେ ୩ୟ ସନ୍ତାନକୁ ଜନ୍ମ ଦେଇଥାନ୍ତେ। ହେଲେ ପ୍ରଣତି ଗତକାଲି ରାତିରେ ନିଜ ଘରେ ଦେହରେ କିରାସିନି ଢାଳି ନିଆ ଲଗାଇ ଆତ୍ମହତ୍ୟା କରିଛନ୍ତି।
Sambad is now on WhatsApp
Join and get latest news updates delivered to you via WhatsApp
ଏ ନେଇ ତାଙ୍କର ସ୍ବାମୀ ଶଙ୍କର ଧୀବର ରାତି ୧୨:୧୫ ରେ ପାଲଲହଡ଼ା ଥାନାରେ ଲିଖିତ ଭାବେ ଜଣାଇବା ପରେ ଆଇଆଇସି କିଶୋର କୁମାର ସାମଲ, ଏଏସଆଇ ରାଜକିଶୋର ବିଶ୍ଵାଳ ଘଟଣାସ୍ଥଳରେ ପହଞ୍ଚି ଶବକୁ ଜବତ କରିଥିଲେ। ଆଜି ଶବକୁ ବ୍ୟବଚ୍ଛେଦ ପାଇଁ ପଠାଯାଇଛି । ପ୍ରଣତି କାହିଁକି ନିଜ ଦେହରେ କିରାସିନି ଢାଳି ଆତ୍ମହତ୍ୟା କରିଲେ, ସେହି କାରଣ ଅସ୍ପଷ୍ଟ ରହିଛି। ସେ କାହିଁକି ଆତ୍ମହତ୍ୟା କଲେ ତାକୁ ନେଇ ପୁଲିସ ପକ୍ଷରୁ ତଦନ୍ତ ଜାରି ରହିଛି।