ରଣପୁର/ନୟାଗଡ଼: ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରୁ ଫେରିଆସି ଜଣେ ମହିଳା ଆଜି ବିଶ୍ରାମଗାରରେ ଶିଶୁକନ୍ୟା ଜନ୍ମ ଦେଇଛନ୍ତି । ନୟାଗଡ଼ ଜିଲ୍ଲାର ରଣପୁର ବ୍ଲକ ଅନ୍ତର୍ଗତ ରାଜସୁନାଖଳା ଠାରେ ଏଭଳି ଅଭାବନୀୟ ଘଟଣା ଘଟିିଛି । ମିଳିଥିବା ସୂଚନା ଅନୁସାରେ ଗୁଣ୍ଡୁରିଆ ଗାଁର ହାଇଦର ଖାନଙ୍କ ପତ୍ନୀ ମେରୁଇନ ବିବି ଗତକାଲି ପ୍ରସବ ପାଇଁ ରାଜସୁନାଖଳ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରକୁ ଯାଇଥିଲେ । ରାତିରେ ସେ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ରହିଥିଲେ । ଆଜି ସକାଳ ୬ଟାରେ ସେ ଘରକୁ ଫେରୁଥିଲେ । କିନ୍ତୁ ସେ ଫେରିବା ବାଟରେ ସୁନାଖଳା ବସ ରହଣୀ ପାଇଁ ଉଦ୍ଦିଷ୍ଟ ବିଶ୍ରାମଗାର ଠାରେ ଅଟକିଯାଇଥିଲେ । ପରେ ସକାଳ ପ୍ରାୟ ୭ଟା ବେଳକୁ ସେଠାରେ ସେ ଏକ ଶିଶୁକନ୍ୟା ଜନ୍ମ ଦେଇଥିଲେ । ଖବର ପାଇ ସୁନାଖଳା ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରର କର୍ମଚାରୀମାନେ ସେଠାରେ ପହଂଚି ଶିଶୁକନ୍ୟା ସମେତ ମହିଳାଙ୍କୁ ଡାକ୍ତରଖାନାକୁ ନେଇଥିଲେ । ରିପୋର୍ଟ ଲେଖାଯିବା ବେଳକୁ ଉଭୟ ମା’ ଓ ଶିଶୁ ସୁସ୍ଥ ଥିବା ଜଣାଯାଇଛି ।
Sambad is now on WhatsApp
Join and get latest news updates delivered to you via WhatsApp
ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ର ତରଫରୁ କୁହାଯାଇଛି, ମହିଳା ଜଣକ ସାମାନ୍ୟ ମାନସିକ ବିକୃତ ଥିଲେ ବୋଲି ଆମେ ଅନୁମାନ କରିଥିଲୁ । ଗତକାଲି ତାଙ୍କୁ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଆଡମିଟ କରିଥିଲୁ । କିନ୍ତୁ ଆଜି ସକାଳୁ ସେ କାହାରିକୁ କିଛି ନ ଜଣାଇ ଏଠାରୁ ଚାଲି ଯାଇଥିଲେ । ମହିଳା ଜଣକ ପୂର୍ବରୁ ଭୁବନେଶ୍ୱରରେ ରହୁଥିଲେ । ସାତ ମାସର ଗର୍ଭବତୀ ହେବା ପରେ କିଛି ମାସ ପୂର୍ବରୁ ଗାଁକୁ ଆସିଥିଲେ ।
ଅନ୍ୟପଟରେ ମହିଳାଙ୍କ କହିବା ଅନୁଯାୟୀ, ସେ ହସ୍ପିଟାଲରେ ଆଡମିଟ ହେବା ବେଳକୁ ସାଥୀରେ ନିଜର ୯ ବର୍ଷର ଝିଅ ଥିଲା । ଗତକାଲି ହସ୍ପିଟାଲରେ ତାଙ୍କୁ ଆଡମିଟ କରାଯାଇଥିଲା । କିନ୍ତୁ ପରେ ତାଙ୍କୁ ଚିକିତ୍ସାରେ କୌଣସି ସହାୟତା ମିଳି ନଥିଲା । ଏପରିକି କୌଣସି ସ୍ୱାସ୍ଥ୍ୟକର୍ମୀ ଆସି ନଥିବା ସେ ଅଭିଯୋଗ କରିଛନ୍ତି । ଫଳରେ ବାଧ୍ୟ ହୋଇ ସେ ଘରକୁ ଫେରିବାକୁ ଉଦ୍ୟମ କରିଥିଲେ ।