ଦୀପ ଜାଳୁଥିବା ବେଳେ ମହିଳାଙ୍କ ଶାଢ଼ିରେ ଲାଗିଗଲା ନିଆଁ, ଡାକ୍ତରଖାନାରେ ଭର୍ତ୍ତି ହେଲେ ପୀଡ଼ିତା
ମହାଶିବରାତ୍ରିରେ ବଡ଼ ଅଘଟଣ
ଆନନ୍ଦପୁର: କେନ୍ଦୁଝର ଜିଲ୍ଲା ଅନ୍ତର୍ଗତ ଆନନ୍ଦପୁର ଅଞ୍ଚଳରେ ଆଜି ଏକ ଅଭାବନୀୟ ଘଟଣା ସାମ୍ନାକୁ ଆସିଛି। ଆଜି ମହାଶିବରାତ୍ରି ତଥା ଜାଗରଯାତ୍ରା ହୋଇଥିବାରୁ ରାଜ୍ୟର ଅଧିକାଂଶ ଶୈବପୀଠମାନଙ୍କ ଭଳି ଘଷିପୁରା ବ୍ଲକର ଦେଓଗାଁସ୍ଥିତ କୁଶଳେଶ୍ୱର ଶିବ ମନ୍ଦିରରେ ବି ସକାଳୁ ଶ୍ରଦ୍ଧାଳୁମାନଙ୍କର ଭିଡ଼ ପରିଲକ୍ଷିତ ହୋଇଥିଲା। ଭକ୍ତମାନେ ଧାଡ଼ିରେ ମନ୍ଦିର ଭିତରକୁ ପ୍ରବେଶ କରୁଥିଲେ।
Sambad is now on WhatsApp
Join and get latest news updates delivered to you via WhatsApp
ପୂର୍ବାହ୍ନ ପ୍ରାୟ ୧୧ଟା ସମୟରେ ଦେଓଗାଁର କୁଶଳେଶ୍ୱର ଶିବ ମନ୍ଦିରରେ କମଳିନୀ ବାରିକ ନାମକ ଜଣେ ମହିଳା ଦୀପ ଜଳାଉଥିଲେ। ହଠାତ୍ ସେଠାରେ ଦୀପଷ୍ଟାଣ୍ଡରେ ଥିବା ଦୀପର ନିଆଁ ତାଙ୍କ ଶାଢ଼ିରେ ଲାଗି ଯାଇଥିଲା। ଏହାପରେ ସେ ଚିତ୍କାର କରିଥିଲେ। ତାଙ୍କ ପାଟି ଶୁଣି ପାଖରେ ଥିବା ଅନ୍ୟ ଭକ୍ତମାନେ କମଳିନୀଙ୍କୁ ଉଦ୍ଧାର କରିଥିଲେ। ତା’ପରେ ସେମାନେ ତାଙ୍କୁ ଆନନ୍ଦପୁର ଉପଖଣ୍ଡ ଚିକିତ୍ସାଳୟରେ ଭର୍ତ୍ତି କରିଥିଲେ। କମଳିନୀଙ୍କର ବାମ ହାତ ପୋଡ଼ି ଯାଇଥିବାର ସୂଚନା ମିଳିଛି।
କମଳିନୀଙ୍କର ବୟସ ୪୮ ବର୍ଷ ଏବଂ ସେ ଦେଓଗାଁର ଅଚ୍ୟୁତାନନ୍ଦ ବାରିକଙ୍କ ସ୍ତ୍ରୀ ବୋଲି ଜଣାଯାଇଛି। ତାଙ୍କର ସ୍ବାସ୍ଥ୍ୟାବସ୍ଥା ଭଲ ଥିବା କୁହାଯାଉଛି।