ରୋଷେଇ କଲା ବେଳେ ନିଆଁରେ ପୋଡିହୋଇ ଯୁବତୀ ମୃତ

କାମାକ୍ଷାନଗର: ରୋଷେଇ କଲା ବେଳେ ନିଆଁ ଲାଗିଯିବାରୁ ଜଣେ ଯୁବତୀ ଜୀବନ୍ତ ଜଳି ଯାଇଛନ୍ତି। ଢେଙ୍କାନାଳ ଜିଲ୍ଲା ପରଜଙ୍ଗ ଥାନା ବାମ ଗ୍ରାମରେ ନିଆଁରେ ପୋଡି ହୋଇ ଯୁବତୀଙ୍କ ମୃତ୍ୟୁ ହୋଇଥିବା ଜଣାଯାଇଛି। ମୃତ ଯୁବତୀ ହେଲେ ଲିପ୍ତିରେଖା ମହନ୍ତ (୧୯)।

ସୂଚନା ଅନୁସାରେ କାମାକ୍ଷାନଗର ଉପଖଣ୍ଡ ଅନ୍ତର୍ଗତ ପରଜଙ୍ଗ ଥାନା ବାମ ଗ୍ରାମର ଲିପ୍ତିରେଖା ମହନ୍ତ ଆଜି ସକାଳୁ ରୋଷେଇ କରୁଥିଲେ। ଏହି ସମୟରେ କୌଣସି କାରଣବଶତଃ ତାଙ୍କ ଦେହରେ ନିଆଁ ଲାଗିଯାଇଥିଲା। ତାଙ୍କ ଶରୀରରେ ନିଆଁ ଲାଗିଥିବା ଯୋଗୁଁ ସେ, ଚିତ୍କାର କରୁଥିବା ସମୟରେ ପଡ଼ିଶା ଘର ଲୋକେ ଘଟଣାସ୍ଥଳକୁ ପହଞ୍ଚି ତାଙ୍କୁ ଉଦ୍ଧାର କରିଥିଲେ। ଦୁର୍ଘଟଣା ସମୟରେ ପରିବାର ଲୋକେ ଘରେ ନଥିଲେ। ପରେ ତାଙ୍କୁ ପରିବାର ଲୋକ ଓ ସ୍ଥାନୀୟ ଗ୍ରାମବାସୀଙ୍କ ଦ୍ବାରା କାମାକ୍ଷାନଗର ଉପଖଣ୍ଡ ଡାକ୍ତରଖାନାରେ ଭର୍ତ୍ତି କରାଯାଇଥିଲା। କିନ୍ତୁ ଚିକିତ୍ସାଧୀନ ଅବସ୍ଥାରେ ତାଙ୍କର ମୃତ୍ୟୁ ହୋଇଥିବା ଡାକ୍ତର ଘୋଷଣା କରିଥିଲେ।

ଯୁବତୀଙ୍କର ମୃତ୍ୟୁ ଖବର ପାଇଁ ପୁଲିସ ପହଞ୍ଚିଛି। ସ୍ଥାନୀୟ ପୁଲିସ ଘଟଣା ସଂପର୍କରେ ଅଧିକ ତଦନ୍ତ କରୁଛି। ସେହିପରି ଖବର ପାଇ କଙ୍କଡାହାଡ଼ ବ୍ଲକ ପୂର୍ବତନ ବ୍ଲକ ଅଧ୍ୟକ୍ଷ କାର୍ତିକ ସାହୁ ଡାକ୍ତରଖାନା ପହଞ୍ଚି ଥିଲେ। ମୃତକଙ୍କ ପରିବାରକୁ ସମବେଦନା ଜଣାଇଥିଲେ।

ସମ୍ବନ୍ଧିତ ଖବର