ବାରିପଦା: ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ରାଜ୍ୟବାସୀଙ୍କ ସୁଖ-ସମୃଦ୍ଧି ଓ ସୁବିଧା-ଅସୁବିଧା ନିମନ୍ତେ ମାଳମାଳ ଜନକଲ୍ୟାଣକାରୀ ଯୋଜନା କାର୍ଯ୍ୟକାରୀ କରାଇଛନ୍ତିି । ଏପରିକି ମା’ର ଗର୍ଭ ଧାରଣଠାରୁ ଆରମ୍ଭ କରି ଜୁଇ ଜଳିବା ପର୍ଯ୍ୟନ୍ତ ଯୋଜନା କାର୍ଯ୍ୟକାରୀ କରାଯାଇଛି । ଏହା ମଧ୍ୟରେ ଗରୀବ ଜନସାଧାରଣଙ୍କ ନିମନ୍ତେ ଶବ ବୋହିବା ପାଇଁ ମହାପ୍ରୟାଣ ଗାଡ଼ି ଯୋଜନା ଗୋଟାଏ ରହିଛି । କିନ୍ତୁ ଏହି ଯୋଜନା ମୟୂରଭଞ୍ଜ ଜିଲ୍ଲା ଶୁକ ମାର୍ଣ୍ଡିଙ୍କ ନିମନ୍ତେ ଦୁଃଖର କାରଣ ପାଲଟିବା ସାଙ୍ଗକୁ ମୂଲ୍ୟହୀନ ସାବ୍ୟସ୍ତ ହୋଇଛି । କାରଣ ପ୍ରଶାସନିକ ଅଧିକାରୀଙ୍କ ଅପରାଗତା ଯୋଗୁଁ ଆଜି ଶୁକ ନିଜ ସ୍ୱାମୀର ମୃତଦେହକୁ ଟ୍ରଲିରେ ଗ୍ରାମକୁ ନେଇଛନ୍ତି ।
Sambad is now on WhatsApp
Join and get latest news updates delivered to you via WhatsApp
ସୂଚନାରୁ ଜଣାପଡ଼ିଛି, ରାସଗୋବିନ୍ଦପୁର ବ୍ଲକ ଗୋବରା ଗ୍ରାମର ଦୁଃଖା ମାର୍ଣ୍ଡିଙ୍କ ଦେହ ଖରାପ ହେବାରୁ ତାଙ୍କୁ ସେପ୍ଟେମ୍ବର ୧୫ ପୂର୍ବାହ୍ନ ପ୍ରାୟ ୧୦ଟା ସମୟରେ ରାସଗୋବିନ୍ଦପୁର ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଚିକିତ୍ସା ନିମନ୍ତେ ଭର୍ତ୍ତି କରାଯାଇଥିଲା ଓ ଚିକିତ୍ସାଧୀନ ଅବସ୍ଥାରେ ଅପରାହ୍ନ ପ୍ରାୟ ୫ଟା ସମୟରେ ତାଙ୍କର ପ୍ରାଣହାନୀ ଘଟିଥିଲା । କିନ୍ତୁ ସ୍ତ୍ରୀ ଶୁକ ଓ ତାର ପରିବାରର ସଦସ୍ୟମାନେ ଆଥର୍କି ସ୍ୱଚ୍ଛଳ ନ ଥିବାରୁ ଶବକୁ ଗାଡ଼ି ଭଡ଼ା କରି ଘରକୁ ନେବା ନିମନ୍ତେ ଅକ୍ଷମ ରହିଥିଲା । ବାଧ୍ୟ ହୋଇ ସ୍ତ୍ରୀ ଶୁକ ସାରା ରାତି ମୃତ ସ୍ୱାମୀକୁ ଜଗି ରହିଥିଲା । ରାତି ପାହି ସକାଳ ହେଲା । ମାତ୍ର ହସପିଟାଲ ପକ୍ଷରୁ ଦୁଃଖାର ଶବକୁ ତାର ଗ୍ରାମକୁ ପଠାଇବା ନିମନ୍ତେ କୌଣସି ବ୍ୟବସ୍ଥା କରାଗଲା ନାହିଁ । ପରନ୍ତୁ, ତୁରନ୍ତ ଶବକୁ ନେଇ ଯିବା ଲାଗି ବାରମ୍ବାର ତାଗିଦ କରାଗଲା ।
ଦୁଃଖା ମାର୍ଣ୍ଡି ଜଣେ ଦିନ ମଜୁରୀଆ ଶ୍ରେଣୀର । ଝାଳ ବୁହାଇ ପରିବାରର ବୋଝ ଉଠାଇ ଆସିଥିଲା । ଏହି ସମୟରେ ରୋଗରେ ପଡ଼ି ଉପଯୁକ୍ତ ଚିକିତ୍ସ ହୋଇ ନ ପାରି ଆରପାରିକୁ ଚାଲିଗଲା । ସ୍ତ୍ରୀ ଶୁକ ନିକଟରେ କାଣି କଉଡ଼ିଟିଏ ନ ଥିଲା । ଏହି ସମୟରେ ମୃତ ସ୍ୱାମୀର ଶବକୁ କିପରି ଗ୍ରାମକୁ ନେଇ ପାରିବ । ନିରୂପାୟ ହୋଇ ଗ୍ରାମକୁ ଦୌଡ଼ି ଗଲା ପଇସା ଯୋଗାଡ଼ କରିବା ଉଦେ୍ଶ୍ୟରେ ; କିନ୍ତୁ ସବୁଠି ନିରାଶ ହେବା ପରେ ଦୁଃଖା ମାର୍ଣ୍ଡିଙ୍କ ବଡ଼ ଭାଇ ରାଜେନ୍ଦ୍ର ଜମି ବନ୍ଧକ ରଖି ୮ ଶହ ଟଙ୍କା ଦେଇଥିଲେ । ଉକ୍ତ ଟଙ୍କା ଟ୍ରଲି ଯୋଗାଡ଼ କରି ଟ୍ରଲି ଚାଳକ ପରମେଶ୍ୱର ମୁଖୀଙ୍କୁ ୮ ଶହ ଟଙ୍କା ଅଗ୍ରୀମ ଭଡ଼ା ଦେଇ ପ୍ରାୟ ୫ କିମି ଦୂର ଗୋବରା ଗ୍ରାମ ଘରକୁ ନେଇ ଯାଇଥିଲା ସ୍ୱାମୀ ଦୁଃଖାର ଶବକୁ ।
ରାସ୍ତାରେ ଟ୍ରଲିରେ ଶବ ବୁହା ହୋଇ ଯାଉଥିବାର ଦୃଶ୍ୟ ଦେଖି ମହାପ୍ରୟାଣ ଯୋଜନାରେ ଗାଡ଼ି କୁଆଡ଼େ ଗଲା ବୋଲି ଜନସାଧାରଣ ପ୍ରଶ୍ନ ପରେ ପ୍ରଶ୍ନ ପ୍ରଶ୍ନ କରିବାରେ ଲାଗି ଥିଲେ । ଏ ନେଇ ରାସଗୋବିନ୍ଦପୁର ହସପିଟାଲର ମେଡ଼ିକାଲ ଅଫିସରଙ୍କ ପ୍ରତିକ୍ରିୟା ଜାଣିବା ନିମନ୍ତେ ଯୋଗାଯୋଗ ଉଦ୍ୟମ କରାଯାଇଥିଲେ ମଧ୍ୟ ସମ୍ଭବ ହୋଇପାରି ନ ଥିବା ସମୟରେ ବିଡ଼ିଓ ଓ ତହସିଲଦାର ଏ ବିଷୟରେ କିଛି ଜଣି ନାହାନ୍ତି ଅଥବା ତାଙ୍କୁ କେହି ଜଣାଇ ନାହାନ୍ତି ବୋଲି କହିଥିଲେ । ଯଦି ଗରୀବ ଦରୀଦ୍ର ଜନସାଧାରଣଙ୍କ କାମରେ ଆସି ପାରିଲା ନାହିଁ ମୁଖ୍ୟମନ୍ତ୍ରୀଙ୍କ ମହାପ୍ରୟାଣ ଯୋଜନା, ତେବେ ସେହି ଯୋଜନାର ମୂଲ୍ୟ କେତେ ତାହାକୁ ଉପରକ୍ତ ଜନସାଧାରଣ ଅଙ୍ଗୁଳି ଉଠାଇଛନ୍ତି ।