ଚୋରା ମଦ ପାଇଁ କଳିଳେଶ୍ବରପୁରରେ ପୁଣି ଉତ୍ତେଜନା : ଉତ୍ତ୍ୟକ୍ତ ମହିଳାଙ୍କ ଗାଡ଼ି ଭଙ୍ଗାରୁଜା, ରାସ୍ତାରୋକ

ପୁରୀ : ପୁରୀ ସଦର ଥାନା କପିଳେଶ୍ବରପୁର ପଞ୍ଚାୟତ ବିଲକାଙ୍କୁଡ଼ା ଗାଁ’ ସ୍ବାଇଁସାହି ଦେଇ ‌ଦେଶୀ ମଦ ପ୍ରସ୍ତୁତି ପାଇଁ ଗୁଡ଼ ନେଇ ଯାଉଥିବା ଏକ ଗାଡ଼ିକୁ ଗାଁର ମହିଳାମାନେ ଅଟକାଇ ଭଙ୍ଗାରୁଜା କରିଛନ୍ତି। ଏହାକୁ କେନ୍ଦ୍ର କରି ବିଲକାଙ୍କୁଡ଼ା ଗାଁରେ ପ୍ରବଳ ଉତ୍ତେଜନା ଦେଖାଦେଇଛି। ଅବକାରୀ ବିଭାଗ ଘଟଣାସ୍ଥଳରେ ପହଞ୍ଚି ଦୁଇ ଜଣଙ୍କୁ ଅଟକ ରଖିବା ସହ ଗାଡ଼ି ଜବତ କରିବା ପରେ ପରିସ୍ଥିତି ଶାନ୍ତ ପଡ଼ିଛି।

କପିଳେଶ୍ବରପୁର ପଞ୍ଚାୟତରେ ମହିଳାମାନେ ଆଜି ଅପରାହ୍‌ଣ ପ୍ରାୟ ୨ଟ‌ା ସମୟରେ ସୂଚନା ପାଇ ମଦ ପ୍ରସ୍ତୁତ ପାଇଁ ଗୁଡ଼ ନେଇ ଯାଉଥିବା ଓଡି ୧୩ ଜି ୯୯୨୬ ଗାଡ଼ିକୁ ଅଟକାଇଥିଲେ। ଏହାକୁ ନେଇ ଗୁଡ଼ ନେଉଥିବା ବ୍ୟକ୍ତି ଓ ମହିଳାଙ୍କ ମଧ୍ୟରେ ଯୁକ୍ତିତର୍କ ହୋଇଥିଲା। ପରେ ଏହା ଉଗ୍ରରୂପ ନେବା ସହ ମହିଳାମାନେ ଗାଡ଼ିକୁ ଭଙ୍ଗାରୁଜା କରିବା ସହ ରାସ୍ତା ଅବରୋଧ କରିଥିଲେ।ଖବର ପାଇ ପୁରୀ ଅବକାରୀ ବିଭାଗର ଅଧିକାରୀମାନେ ଘଟଣାସ୍ଥଳରେ ପହଞ୍ଚି ଗାଡ଼ି ସହ ଏଥିରେ ରଖାଯାଇଥିବା ଗୁଡ଼କୁ ଜବତ କରିଛନ୍ତି। ଏହି ଘଟଣାରେ ଅବକାରୀ ବିଭାଗ ଦୁଇଜଣଙ୍କୁ ଅଟକ ରଖି ପଚରାଉଚରା କରୁଛି।

ସୂଚନା ଥାଉକି, କିଛି ଦିନ ତଳେ ମଦମୃତ୍ୟୁକୁ କେନ୍ଦ୍ର କରି କଳିଳେଶ୍ବରପୁର ପଞ୍ଚାୟତ ବିଲକାଙ୍କୁଡ଼ାର ସ୍ବାଇଁ ସାହି ସହ ଅନ୍ୟାନ୍ୟ ସାହିରେ ଦେଶୀ ମଦ ଭାଟି ଉପରେ ମହିଳାମାନେ ମିଳିତ ଚଢ଼ଉ କରି ବ୍ୟାପକ ଭଙ୍ଗାରୁଜା କରିଥିଲେ। ‌ଦେଶୀ ମଦ ପ୍ରସ୍ତୁତି ପାଇଁ ଗଚ୍ଛିତ କଞ୍ଚାମାଲ ଗାଁ ଦାଣ୍ଡରେ ଢ଼ାଳି ନିଆଁ ଲଗାଇ ଦେଇଥିଲେ।