ସୁକିନ୍ଦାରୁ ୪୬୧ ଘନଫୁଟ କାଠଗଣ୍ଡି ଉଦ୍ଧାର
କାଳିଆପାଣି : କରୋନା କଟକଣାକୁ କଡ଼ାକଡ଼ି ଅନୁପାଳନ ପାଇଁ ସରକାରଙ୍କ ପକ୍ଷରୁ ଲକ୍ଡାଉନ ଓ ସଟ୍ଡାଉନ ଘୋଷଣା କରାଯାଇଛି। ଅମାନିଆଙ୍କ ପାଇଁ ପୁଲିସର ଦାୟିତ୍ବ ବଢ଼ିଯାଇଛି। ସେହିପରି ପ୍ରଚଣ୍ଡ ଗ୍ରୀଷ୍ମପ୍ରବାହ ଓ ଶୁଖିଲା ପତ୍ରରୁ ସୃଷ୍ଟି ହେଉଥିବା ଜଙ୍ଗଲ ନିଆଁ ନିୟନ୍ତ୍ରଣ ପାଇଁ ବନ ବିଭାଗରେ ତତ୍ପରତା ଦେଖାଉଛି। ପୁନଶ୍ଚ କିଛି ନଛୋଡ଼ବନ୍ଦା ଜୁଆଙ୍ଗ, ଆଦିବାସୀ ଓ ନ୍ୟସ୍ତସ୍ବାର୍ଥୀ ବ୍ୟକ୍ତି ପୋଡ଼ୁଚାଷ ପାଇଁ ଯୋଜନାବଦ୍ଧ ଭାବେ ଜଙ୍ଗଲରେ ନିଆଁ ଲଗାଇ ଦେଉଛନ୍ତି। ଏହି କାରଣରୁ ବନ ବିଭାଗ ଆଖିରୁ ନିଦ ହଜିଯାଇଛି। ସାଧାରଣ ପ୍ରଶାସନ ଓ ଦୁଇ ଖାକି ବିଭାଗ କାର୍ଯ୍ୟବ୍ୟସ୍ତ ଥିବା ବେଳେ ଏ ପରିସ୍ଥିତି କିନ୍ତୁ କାଠ ମାଫିଆଙ୍କ ପାଇଁ ସୁଯୋଗ ସୃଷ୍ଟି କରିଛି। କଟକ, ଆଠଗଡ଼, ଢେଙ୍କାନାଳ, ଅନୁଗୁଳ ଓ ଆନନ୍ଦପୁର ବନଖଣ୍ଡରେ କେତେକ କୁଖ୍ୟାତ କାଠ ମାଫିଆ ଏବେ ବେଶ୍ ସକ୍ରିୟ ଥିବା ସୂଚନା ମିଳିଛି।
Sambad is now on WhatsApp
Join and get latest news updates delivered to you via WhatsApp
ସୂଚନା ଅନୁସାରେ, ଲକ୍ଡାଉନ୍ ସମୟରେ କେବଳ କଟକ ବନଖଣ୍ଡ ଅନ୍ତର୍ଗତ ସୁକିନ୍ଦା ରେଞ୍ଜ ପକ୍ଷରୁ ଦୈତାରୀ ଓ ମହାଗିରି ସୁରକ୍ଷିତ ଜଙ୍ଗଲର ସୁକୁରଙ୍ଗି, ଗୁରୁଜଙ୍ଗ, କୁମୁଡ଼ିବାହାଳି, କାକୁଡ଼ିଆ, ପୁରୁଣାପାଣି, କରଡ଼ାଗାଡ଼ିଆ, ରାଙ୍କିଆ, କଣ୍ଟାପାଳ ଓ ଗୁଣ୍ଡୁଚିପଶିରେ ଚଢ଼ଉ କରାଯାଇ ୪୬୧ ଘନଫୁଟ କାଠଗଣ୍ଡି ଜବତ କରାଯାଇଛି ବୋଲି ରେଞ୍ଜର ବିପିନ ବିହାରୀ ରାଉତରାୟ ‘ସମ୍ବାଦକୁ ସୂଚନା ଦେଇଛନ୍ତି। ଟମକା ରେଞ୍ଜ ପକ୍ଷରୁ ଚଢ଼ଉ କରାଯାଇ ଏକ କାଠଗଣ୍ଡି ଭର୍ତ୍ତି ଟ୍ରାକ୍ଟର ଓ କିଛି କାଠଗଣ୍ଡି ଉଦ୍ଧାର ହୋଇଥିବା ନେଇ ରେଞ୍ଜର ଘନଶ୍ୟାମ ମୁଦୁଲି କହିଛନ୍ତି। ଏସବୁ କାଠଗଣ୍ଡିର ଆନୁମାନିକ ମୂଲ୍ୟ ୭ ଲକ୍ଷ ଟଙ୍କା ପାଖାପାଖି ହେବ। ତଥାପି ଜଙ୍ଗଲରେ ବିକ୍ଷିପ୍ତ ଭାବେ ଆହୁରି ଅନେକ କାଠଗଣ୍ଡି ପଡ଼ି ରହିଥିବା ଏକାଧିକ ବନରକ୍ଷୀଙ୍କ ସୂତ୍ରରୁ ଜଣାପଡ଼ିଛି।
ଘଞ୍ଚ ଜଙ୍ଗଲ ମଧ୍ୟକୁ ଯାଇ କାଠଗଣ୍ଡି ଖୋଜିବା କଷ୍ଟକର ବ୍ୟାପାର ହୋଇଥିବାରୁ ଏ କ୍ଷେତ୍ରରେ ବନ ବିଭାଗକୁ ସ୍ବତନ୍ତ୍ର ରଣନୀତି ପ୍ରସ୍ତୁତ କରିବାକୁ ପଡ଼ୁଛି ବୋଲି ରାଁସୋଳ ଫରେଷ୍ଟର ରବି ନାରାୟଣ ମହାନ୍ତି ବିବୃତି ରଖିଛନ୍ତି। ବନ ବିଭାଗ ପାଇଁ ଏବେ ଜଙ୍ଗଲ ନିଆଁ ନିୟନ୍ତ୍ରଣ ମୁଖ୍ୟ କାର୍ଯ୍ୟ ଓ ଅନ୍ୟସବୁ କାର୍ଯ୍ୟ ଗୌଣ ଥିବା ବେଳେ କାଠ ମାଫିଆଙ୍କ ପାଇଁ ସେମାନଙ୍କ ମୁଣ୍ଡବିନ୍ଧା ବଢ଼ିଯାଇଛି ବୋଲି ଉଭୟ ରେଞ୍ଜର ସ୍ପଷ୍ଟ ମତ ଦେଇଛନ୍ତି।