କୁନ୍ଦୁଲି ହାଟରେ ପାଳିତ ହେଲା ବିଶ୍ୱ ଆଦିବାସୀ ଦିବସ

କୋରାପୁଟ: ଜନଜାତି ଅଧ୍ୟୁଷିତ ଅଞ୍ଚଳ କୋରାପୁଟ ଭଳି ଜାତୀୟସ୍ତରରେ ହାରାହାରି ୧୧% ରୁ କମ୍ ଅନୁପାତ ଥିବା କମ୍ ଶିକ୍ଷାଗତ ଯୋଗ୍ୟତା ଲୋକମାନଙ୍କୁ "ସମାନତା ଏବଂ ଉପଲବ୍ଧତା" ସମସ୍ୟାର ସମାଧାନ କରିବା ଏବଂ ଗୁଣାତ୍ମକ ଉଚ୍ଚଶିକ୍ଷାର ମାନଙ୍କୁ ବୃଦ୍ଧି କରିବା ପାଇଁ ଭାରତ ସରକାରଙ୍କ ନୀତି ସହିତ ଓଡ଼ିଶା କେନ୍ଦ୍ରୀୟ ବିଶ୍ୱବିଦ୍ୟାଳୟ ଆନୁକୂଲ୍ୟରେ କୁନ୍ଦୁଲି ହାଟ ଅଞ୍ଚଳରେ ଶନିବାର ବିଶ୍ୱ ଜନଜାତି ଦିବସ ପାଳନ ଆୟୋଜିତ ହୋଇଯାଇଛି। ସ୍ଥାନୀୟ ଜନଜାତି ଯୁବକମାନଙ୍କୁ ସଶକ୍ତ କରିବା ଏବଂ ଇକୋ-ଟୁରିଜିମ୍‌ରେ ବ୍ୟାପକ ନିଯୁକ୍ତି ସୁଯୋଗ ସୃଷ୍ଟି କରିବା ଉପରେ ଏହି କାର୍ଯ୍ୟକ୍ରମର ଶୀର୍ଷକ ରହିଥିଲା ।

ଏହି କାର୍ଯ୍ୟକ୍ରମକୁ ବିଶ୍ୱବିଦ୍ୟାଳୟର ମାନ୍ୟବର କୁଳପତି ପ୍ରଫେସର ଚକ୍ରଧର ତ୍ରିପାଠୀ ଆନୁଷ୍ଠାନିକ ଭାବେ ଉଦ୍‌ଘାଟନ କରିଥିଲେ। ଏହି ଅବସରରେ ସମ୍ବଲପୁର ବିଶ୍ୱବିଦ୍ୟାଳୟର ପୂର୍ବତନ କୁଳପତି ପ୍ରଫେସର ବିଷ୍ଣୁ ଚରଣ ବାରିକ ପ୍ରମୁଖ ବକ୍ତା ଭାବେ ଯୋଗ ଦେଇଥିଲେ। ସମ୍ମାନିତ ଅତିଥି ଭାବେ ଭୁବନେଶ୍ୱର ସ୍ଥିତ ଇନଷ୍ଟିଚ୍ୟୁଟ୍ ଅଫ୍ ହୋଟେଲ ମ୍ୟାନେଜମେଣ୍ଟର ପ୍ରିନ୍ସିପାଲ ପ୍ରଫେସର ଶାରଦା ଘୋଷ ଯୋଗ ଦେଇଥିଲେ। ପୂର୍ବତନ ସାଂସଦ ଜୟରାମ ପାଙ୍ଗୀ, ଆଦିବାସୀ ବିକାଶ ପରିଷଦର ଉପଦେଷ୍ଟା ତଥା ନେତାଜୀ ସୁଭାଷ ଜନ୍ମ ଭୂମି ଯାତ୍ରାର ଆବାହକ ଦେବୀ ପ୍ରସାଦ ପୃଷ୍ଟି, ସାମାଜିକ କର୍ମୀ ଜି ଜନ୍, ଉଦ୍ୟୋଗୀ ତଥା ସାମାଜିକ କର୍ମୀ ଯୁଗବ୍ରତ କର, ଜିଲ୍ଲା ପର୍ଯ୍ୟଟନ ଅଧିକାରୀ ତାଲିନା ପ୍ରଧାନୀ, ଜିଲ୍ଲା ସଂସ୍କୃତି ଅଧିକାରୀ ପ୍ରୀତିସୁଧା ଜେନା ଓ ସିୟୁଓର ଆସୋସିଏଟ୍ ପ୍ରଫେସର ନିର୍ଝରୀଣୀ ତ୍ରିପାଠୀ ପ୍ରମୁଖ ଉପସ୍ଥିତ ଥିଲେ।

ଆସୋସିଏଟ୍ ପ୍ରଫେସର ତଥା କାର୍ଯ୍ୟକ୍ରମର ସଂଯୋଜକ ଡ. କପିଳ ଖେମୁଣ୍ଡୁ ସ୍ୱାଗତ ଭାଷଣ ଦେବା ସହ ସେମିନାର ଆୟୋଜନ ର ଉଦ୍ଦେଶ୍ୟ ଉପରେ ବକ୍ତବ୍ୟ ରଖିଥିଲେ। ଉଦ୍ ଘାଟନୀ ଉତ୍ସବରେ ଅଧ୍ୟକ୍ଷତା କରି ବିଶ୍ୱବିଦ୍ୟାଳୟର ମାନ୍ୟବର କୁଳପତି ପ୍ରଫେସର ଚକ୍ରଧର ତ୍ରିପାଠୀ ଏହି ଅଞ୍ଚଳର ଲୋକଙ୍କ ସାମାଜିକ-ଅର୍ଥନୈତିକ ମାନ ବିକାଶ ପାଇଁ ଭାରତ ସରକାରଙ୍କ ନିର୍ଦ୍ଦେଶ ଅନୁଯାୟୀ ବିଶ୍ୱବିଦ୍ୟାଳୟର ଦାୟିତ୍ୱ ଉପରେ ଆଲୋକପାତ କରିଥିଲେ। କୋରାପୁଟ ଇକୋ ଟୁରିଜିମ୍ ପାଇଁ ଉପଯୁକ୍ତ ଏକ ସୁନ୍ଦର ସ୍ଥାନ ଯେଉଁଠାରେ ସ୍ଥାନୀୟ ଆଦିବାସୀ ଯୁବକଯୁବତୀଙ୍କ ପାଇଁ ବ୍ୟାପକ ନିଯୁକ୍ତି ସୁଯୋଗ ସୃଷ୍ଟି ହୋଇପାରିବ। ଓଡ଼ିଶା କେନ୍ଦ୍ରୀୟ ବିଶ୍ୱବିଦ୍ୟାଳୟ ହେଉଛି ସ୍ଥାନୀୟରୁ ବିଶ୍ୱସ୍ତରୀୟ ମାଧ୍ୟମ ଏବଂ କୋରାପୁଟର ସାମର୍ଥ୍ୟକୁ ବିଶ୍ୱ ଆଗରେ ପ୍ରଦର୍ଶିତ କରିବାରେ ଅଗ୍ରଣୀ ଭୂମିକା ଗ୍ରହଣ କରିବ । ଇକୋ ଟୁରିଜିମ୍ ଓ ରୋଜଗାର ସମ୍ପର୍କରେ ଲୋକଙ୍କ ମଧ୍ୟରେ ସଚେତନତା ସୃଷ୍ଟି କରିବା ଏହି ସେମିନାର ର ଉଦ୍ଦେଶ୍ୟ ବୋଲି ସେ କହିଛନ୍ତି। ଭବିଷ୍ୟତରେ ଏହି ବିଶ୍ୱବିଦ୍ୟାଳୟ ଓଡ଼ିଶାର ଅର୍ଥନୈତିକ ପ୍ରଗତିରେ ଅଗ୍ରଣୀ ଯୋଗଦାନ କରିବ ବୋଲି ସେ ଆଶା ବ୍ୟକ୍ତ କରିଥିଲେ।

ଭାରତ ସରକାରଙ୍କ ସଂସ୍କୃତି ମନ୍ତ୍ରଣାଳୟର ପୂର୍ବତନ ଟାଗୋର ଜାତୀୟ ଫେଲୋ, ପ୍ରଫେସର ବାରିକ କୋରାପୁଟରେ ପରିବେଶ ପର୍ଯ୍ୟଟନର ବିକାଶ ଉପରେ ଗୁରୁତ୍ୱାରୋପ କରିଥିଲେ। କୋରାପୁଟ ପର୍ଯ୍ୟଟନର ଏକ ଗୁରୁତ୍ୱପୂର୍ଣ୍ଣ କେନ୍ଦ୍ର ହୋଇଥିବାବେଳେ ଏହାର ଉପଯୁକ୍ତ ବିକାଶ ହେଲେ ଏହାକୁ ଅନ୍ତର୍ଜାତୀୟ ସ୍ତରରେ ଏକ ଗୁରୁତ୍ୱପୂର୍ଣ୍ଣ ପର୍ଯ୍ୟଟନସ୍ଥଳୀ ଭାବେ ସ୍ଥାନିତ କରାଯିବ। ବିକାଶ ପ୍ରକ୍ରିୟାରେ ଗ୍ରାମୀଣ ଯୁବକଯୁବତୀଙ୍କୁ ନିୟୋଜିତ କରି ଏହା କରାଯାଇପାରିବ। କୋରାପୁଟର ପର୍ଯ୍ୟଟନ ଅଞ୍ଚଳର ଭିତ୍ତିଭୂମି ବିକାଶ ଉପରେ ମଧ୍ୟ ସେ ଗୁରୁତ୍ୱାରୋପ କରିଥିଲେ। ପର୍ଯ୍ୟଟକମାନେ କୋରାପୁଟ ଗନ୍ତବ୍ୟସ୍ଥଳର ରାଷ୍ଟ୍ରଦୂତ ହୋଇପାରିବେ ବୋଲି ସେ କହିଛନ୍ତି। ଶ୍ରୀ ପାଙ୍ଗୀ କୋରାପୁଟର ବିକାଶର ବିଭିନ୍ନ ଅନୁଭୂତି ଉପରେ ଆଲୋକପାତ କରିବା ସହ ସହଯୋଗ ଅଭାବରୁ କୋରାପୁଟର ସୁନ୍ଦର ସ୍ଥାନ ପର୍ଯ୍ୟଟନସ୍ଥଳୀ ଭାବେ ଲୋକପ୍ରିୟ ହୋଇପାରୁନାହିଁ ବୋଲି କହିଥିଲେ। ଶୃଙ୍ଖଳିତ ଯୋଜନା କରାଗଲେ କୋରାପୁଟକୁ କୁଲୁ ଓ ମନାଲି ଭଳି ବିକଶିତ କରାଯିବ। କୋରାପୁଟରେ ଇକୋ ଟୁରିଜିମ୍ ର ବିକାଶ ହେଲେ ସ୍ଥାନୀୟ ଯୁବପିଢ଼ି ନିଯୁକ୍ତି ସୁଯୋଗ ପାଇପାରିବେ ବୋଲି ସେ ଗୁରୁତ୍ୱାରୋପ କରିଥିଲେ।

ପ୍ରଫେସର ଘୋଷ କହିଥିଲେ ଯେ ଗ୍ରାମୀଣ ଯୁବକମାନଙ୍କୁ ଆତିଥ୍ୟ କ୍ଷେତ୍ରରେ ଉପଯୁକ୍ତ ପ୍ରଶିକ୍ଷଣ ଦିଆଯିବା ଉଚିତ ଏବଂ ଆମ ଅନୁଷ୍ଠାନ ବିଶ୍ୱବିଦ୍ୟାଳୟ ସହାୟତାରେ କୋରାପୁଟ କ୍ଷେତ୍ରରେ ପର୍ଯ୍ୟଟନ ବୃଦ୍ଧି କରିବାରେ ସହାୟକ ହେବ । ପର୍ଯ୍ୟଟନ ବିକାଶ ପାଇଁ ସ୍ଥାନୀୟ ଭାଷା, ସ୍ଥାନୀୟ ସଂସ୍କୃତି ଓ ସ୍ଥାନୀୟ ଖାଦ୍ୟକୁ ଗୁରୁତ୍ୱ ଦିଆଯିବା ଦରକାର। ଶ୍ରୀ କର ଅଞ୍ଚଳର ବିକାଶ ପାଇଁ ଗ୍ରାମୀଣ ରୋଜଗାର ଉପରେ ଗୁରୁତ୍ୱାରୋପ କରିଥିଲେ । ତେବେ ଆତିଥ୍ୟ ଶିଳ୍ପ କ୍ଷେତ୍ରରେ ଉଦ୍ୟୋଗୀଙ୍କ ବିକାଶ ଉପରେ ସେ ଗୁରୁତ୍ୱାରୋପ କରିଥିଲେ। ଇକୋ ଟୁରିଜିମ୍ ର ବିକାଶ ପାଇଁ ଯୁବପିଢ଼ିଙ୍କ ମଧ୍ୟରେ ଉତ୍ସାହ ରହିବା ଦରକାର ବୋଲି ସେ କହିଛନ୍ତି। ଶ୍ରୀ ଜନ୍ ଇକୋ ଟୁରିଜିମ୍ ର ଉଦ୍ଦେଶ୍ୟ ବର୍ଣ୍ଣନା କରିବା ସହ କହିଥିଲେ ଯେ ଇକୋ ଟୁରିଜିମ୍ ର ଅର୍ଥ ହେଉଛି ଶାନ୍ତି ଓ ବିଶ୍ରାମ। ପର୍ଯ୍ୟଟନସ୍ଥଳୀଗୁଡ଼ିକୁ ଏତେ ସଜ୍ଜିତ କରାଯିବା ଦରକାର ଯେ ପର୍ଯ୍ୟଟକଙ୍କୁ ସକାରାତ୍ମକ ଶକ୍ତି ମିଳିବ, ଯାହା ପରିବେଶ ପର୍ଯ୍ୟଟନକୁ ବଢ଼ାଇବ ବୋଲି ସେ କହିଛନ୍ତି। ଶ୍ରୀମତୀ ପ୍ରଧାନୀ କୋରାପୁଟର ବିଭିନ୍ନ ପର୍ଯ୍ୟଟନସ୍ଥଳୀ ସମ୍ପର୍କରେ ଆଲୋଚନା କରିବା ସହ କୋରାପୁଟରେ ପର୍ଯ୍ୟଟନର ବିକାଶ ପାଇଁ ସରକାରଙ୍କ ଯୋଜନା ସମ୍ପର୍କରେ ବିସ୍ତୃତ ବିବରଣୀ ଦେଇଥିଲେ। ଜିଲ୍ଲା ସଂସ୍କୃତି ଅଧିକାରୀ ପ୍ରୀତିସୁଧା କହିଥିଲେ ଯେ, କୋରାପୁଟର ସ୍ଥାନୀୟ ଲୋକେ ପର୍ଯ୍ୟଟକଙ୍କ ପ୍ରତି ଅତ୍ୟନ୍ତ ସହଯୋଗ କରୁଥିବାରୁ ଏହି ଅଞ୍ଚଳରେ ପର୍ଯ୍ୟଟନର ବିକାଶ ହେବାର ଅନେକ ସମ୍ଭାବନା ରହିଛି।

କାର୍ଯ୍ୟକ୍ରମର ସଂଯୋଜକ ତଥା ସହକାରୀ ପ୍ରଫେସର ଡ. ସୌରଭ ଗୁପ୍ତା ଧନ୍ୟବାଦ ଅର୍ପଣ କରିଥିଲେ। ଆନୁଷ୍ଠାନିକ ବୈଠକ ପରେ ଜିଲ୍ଲା ସଂସ୍କୃତି ବିଭାଗ ସହାୟତାରେ ବିଶ୍ୱବିଦ୍ୟାଳୟ ପକ୍ଷରୁ ସାଂସ୍କୃତିକ କାର୍ଯ୍ୟକ୍ରମ ଆୟୋଜନ କରାଯାଇଥିଲା। ଏହି କାର୍ଯ୍ୟକ୍ରମରେ ବିଶ୍ୱବିଦ୍ୟାଳୟର ସମସ୍ତ ଅଧ୍ୟାପକ, କର୍ମଚାରୀ, ଛାତ୍ରଛାତ୍ରୀ ଓ ସ୍ଥାନୀୟ ଲୋକେ ଯୋଗ ଦେଇଥିଲେ ବୋଲି ବିଶ୍ଵବିଦ୍ୟାଳୟର ଲୋକସମ୍ପର୍କ ଅଧିକାରୀ ଡ. ଫଗୁନାଥ ଭୋଇ ଜଣେଇଛନ୍ତି ।