ଭୁବନେଶ୍ୱରରେ ଚାନ୍ଦା ନ ଦେବାରୁ ଯୁବକଙ୍କୁ ମରଣାନ୍ତକ ଆକ୍ରମଣ, ଆଇସିୟୁରେ ଗୁରୁତର ଅବସ୍ଥାରେ ଭର୍ତ୍ତି
ଭୁବନେଶ୍ୱର: ଆଗକୁ ଗଣେଷ ପୂଜା, ଆଉ ତାପରେ ଦଶହରା । ଆରମ୍ଭ ହୋଇଗଲାଣି ପୂଜା ସିଜିନ୍ । ହେଲେ ପାର୍ବଣ ଋତୁ ସହ ଆରମ୍ଭ ହୋଇଯାଇଛି ଚାନ୍ଦାର ଯନ୍ତ୍ରଣା । ଗଳି ଗଳିରେ ଚାଲିଛି ପୂଜା ପାଇଁ ଚାନ୍ଦା ଆଦାୟ । ଖାଲି ଚାନ୍ଦା ତ ନୁହେଁ ଚାନ୍ଦା ନାଁରେ ଗୁଣ୍ଡାରାଜ । ସ୍ଥିତି ଏଭଳି ହୋଇଛି ଯେ, ଭୁବନେଶ୍ୱର ଖଣ୍ଡଗିରି ଅଂଚଳରେ ଗଣେଷ ପୂଜା ଚାନ୍ଦା ପାଇଁ ଜଣେ ଆମ୍ବୁଲାନ୍ସ ଚାଳକଙ୍କୁ ମରଣାନ୍ତକ ଆକ୍ରମଣ ହୋଇଛି । ଯୁବକ ଜଣକ ଏବେ ଆଇସିୟୁରେ ଚିକିତ୍ସିତ ହେଉଛନ୍ତି । ପୂଜା ଚାନ୍ଦା ନଦେବାରୁ ହୋଇଛି ମରଣାନ୍ତକ ଆକ୍ରମଣ । ହସ୍ପିଟାଲ ବେଡରେ ପୀଡିତ ଜଣକ ମୃତ୍ୟୁ ସହ ସଂଗ୍ରାମ କରୁଛନ୍ତି | ଅବସ୍ଥା ଏତେ ସଂକଟାପର୍ଣ୍ଣ ଯେ, ତାଙ୍କୁ ଆଇସିୟୁକୁ ଡାକ୍ତର ସ୍ଥାନାନ୍ତର କରିଛନ୍ତି |
Sambad is now on WhatsApp
Join and get latest news updates delivered to you via WhatsApp
ମିଳିଥିବା ସୂଚନା ମୁତାବକ ଆନନ୍ଦ ପାଟ୍ଟଶାଣୀ ନାମକ ଯୁବକଙ୍କ ଘର ଭୁବନେଶ୍ୱରର ପାତ୍ରପଡ଼ାରେ ହୋଇଥିବାବେଳେ ପେଶାରେ ସେ ଜଣେ ଆମ୍ବୁଲାନ୍ସ ଚାଳକ । ଆନନ୍ଦ ଏମ୍ସ ହସ୍ପିଟାଲକୁ ନିଜ ଆମ୍ବୁଲାନ୍ସରେ ରୋଗୀ ନେବା ଆଣିବା କରନ୍ତି | ହେଲେ ସ୍ଥାନୀୟ ଅଂଚଳର କିଛି ଗୁଣ୍ଡା ଶ୍ରେଣୀୟ ଯୁବକଙ୍କ ଟାର୍ଗେଟରେ ରହିଥିଲେ ଆନନ୍ଦ । ବିଭିନ୍ନ ସମୟରେ ବଟି ପାଇଁ ତାଙ୍କ ଉପରେ ହୋଇ ଆସୁଥିଲା ଜୁଲମ । ହେଲେ ଗଣେଶ ପୂଜାକୁ ଆଳ କରି ଏହି ସ୍ଥାନୀୟ ଅସାମାଜିକ ଯୁବକମାନେ ଗାଡି ପିଛା ଲକ୍ଷେ ଟଙ୍କା ଲେଖାଏଁ ଚାନ୍ଦା ମାଗିଥିଲେ । ଆନନ୍ଦଙ୍କର ୭ଟି ଗାଡି ଥିବାରୁ ତାଙ୍କୁ ୭ ଲକ୍ଷ ଟଙ୍କା ଚାନ୍ଦା ଦାବି କରାଯାଇଥିଲା । ଚାନ୍ଦା ଦେବା ପାଇଁ ମନା କରିବାରୁ ମରଣାନ୍ତକ ଆକ୍ରମଣ ହୋଇଥିଲା ।
ଏହି ଘଟଣାରେ ପୁଲିସ ସମୀର ରାଉତରାୟ ନାମକ ଅଭିଯୁକ୍ତକୁ ଗିରଫ କରିଛି । ଦୋକାନ ବଜାରଠାରୁ ଆରମ୍ଭ କରି ଗାଡି ଚାଳକଙ୍କ ପର୍ଯ୍ୟନ୍ତ ସମୀରର ଗୁଣ୍ଡା ବାହିନୀ କାହାକୁ ବି ଛାଡ଼ୁନଥିବାର ଅଭିଯୋଗ ହୋଇଛି । ଏପରିକି ଆମ୍ବୁଲାନ୍ସ ଗାଡିଠୁ ବି ଚାନ୍ଦା ମାଗିବାକୁ ପଛାଉନି ଏହି କୁଖ୍ୟାତ ଅପରାଧୀ । ନା’ ଅଛି ଆଇନକୁ ଭୟ, ନା ଅଛି କମିସନରେଟ୍ ପୋଲିସର କଟକଣାକୁ ପରୱା । ଦିନ ଦ୍ୱିପହରରେ ଗୁଣ୍ଡା ଚଳାଉଛନ୍ତି ଗୁଣ୍ଡାରାଜ । ଅନ୍ୟପଟେ ଚାନ୍ଦା ଆଦାୟ ସଂପୂର୍ଣ୍ଣ ବେଆଇନ, ଚାନ୍ଦା ମାଗିଲେ ହାତକଡ଼ି ପଡ଼ିବ ବୋଲି କହିଛନ୍ତି ଭୁବନେଶ୍ୱର ଡିସିପି ଅନୁପ କୁମାର ସାହୁ । ସମୀରକୁ ବାଦ ଦେଲେ, ଅନ୍ୟ ୧୫ ଜଣ ଅଭିଯୁକ୍ତ ଏବେ ବି ଫେରାର ଅଛନ୍ତି । ପୂଜା କମିଟି ନାଁରେ ହେଉ ବା ପୂଜା, ପାର୍ବଣ ବାହାନାରେ କେହି ଚାନ୍ଦା ମାଗିଲେ, ତାକୁ ବରଦାସ୍ତ କରାଯିବନି ବୋଲି ଚେତାବନୀ ଦେଇଛି କମିସନରେଟ୍ ପୋଲିସ ।