ଜୁଆ‌ ପାଇଁ ଜୀବନ ଗଲା, ଯୁବକଙ୍କୁ ପିଟିପିଟି ହତ୍ୟା

ଚନ୍ଦାହାଣ୍ଡି / ନବରଙ୍ଗପୁର : ଜୁଆ ଖେଳରେ ଜିତିଥିବା ଟଙ୍କା ଛଡ଼ାଇବାକୁ ନେଇ ଜଣେ ଯୁବକଙ୍କୁ ପିଟିପିଟି ହତ୍ୟା କରାଯାଇଛି। ନବରଙ୍ଗପୁର ଜିଲ୍ଲା ଚନ୍ଦାହାଣ୍ଡି ଥାନା ଅନ୍ତର୍ଗତ ହଳଦୀ ଗ୍ରାମରେ ଏଭଳି ଏକ ହତ୍ୟାକାଣ୍ଡ ଘଟିଛି।

ମୃତ ଯୁବକ ହେଲେ, ଶଙ୍କର ବାଘ। ଅଭିଯୋଗ ଅନୁଯାୟୀ, ଗତକାଲି ରାତି ପ୍ରାୟ ୧୧ଟାରେ ଶଙ୍କର ଓ ତାଙ୍କ ପୁତୁରା ତପନ ବାଘଙ୍କୁ ନିଜ ଗ୍ରାମର ୩ଜଣ ବ୍ୟକ୍ତି ଜୁଆ ଖେଳିବା ପାଇଁ ହଳଦୀ ନିକଟସ୍ଥ ମାଲଭଟା ଆଡ଼ୁକୁ ଡାକି ନେଇଥିଲେ। ମାଲଭଟ୍ଟା ନିକଟରେ ଥିବା ଏକ ପଡ଼ିଆରେ ତାସ୍‌ଖେଳରେ ଶଙ୍କର ପ୍ରାୟ ଦେଢ଼ ଲକ୍ଷ ଟଙ୍କା ଜିତିଥିଲେ। ପରେ ଜିତିବା ଟଙ୍କା ଧରି ଶଙ୍କର ଓ ତପନ ନିଜଘରକୁ ଆସିବାପାଇଁ ପ୍ରସ୍ତୁତ ହେଉଥିବା ବେଳେ ସେହି ଟଙ୍କାକୁ ଛଡ଼ାଇ ନେବାପାଇଁ ଜୁଆ ଖେଳରେ ଥିବା ଅନ୍ୟ ବ୍ୟକ୍ତିମାନେ ଉଭୟଙ୍କୁ ମାରପିଟ୍‌ କରିଥିଲେ। ପୁତୁରା ତପନ କୌଣସି ପ୍ରକାରେ ସେହି ସ୍ଥାନରୁ ଖସି ଆସିବାରେ ସକ୍ଷମ ହୋଇଥିବା ବେଳେ ଅଭିଯୁକ୍ତମାନେ ଶଙ୍କରଙ୍କୁ କାବୁ କରି ମାରପିଟ୍‌ କରିଥିଲେ। ପରେ ତାଙ୍କୁ ପିଟିପିଟି ହତ୍ୟା କରିଥିଲେ। ଏନେଇ ଆଜି ମୃତକ ଶଙ୍କରଙ୍କ ଦାଦା ନରହରି ବାଘ ଚନ୍ଦାହାଣ୍ଡି ଥାନାରେ ଲିଖିତ ଅଭିଯୋଗ କରିବା ପରେ ପୁଲିସ ୧୧ଜଣଙ୍କ ନାମରେ ମାମଲା ରୁଜୁ କରି ତଦନ୍ତ ଆରମ୍ଭ କରିଛି।