ଯୁବକଙ୍କୁ ଗୁଳି କରି ହତ୍ୟା: ହୀରାକୁଦ ଡ୍ୟାମ୍‌ରେ ଫିଙ୍ଗିଦେଲେ ଶବ

ଝାରସୁଗୁଡ଼ା: କୁକୁଡ଼ା ବ୍ୟବସାୟକୁ କେନ୍ଦ୍ର କରି ସମ୍ପର୍କୀୟ ଭାଇକୁ ଗୁଳି କରି ହତ୍ୟା ପରେ ପ୍ରମାଣ ନଷ୍ଟ ପାଇଁ ଶବକୁ ହୀରାକୁଦ ଡ୍ୟାମ୍‌ରେ ଫିଙ୍ଗିଦିଆଯାଇଛି। ମୃତକ ହେଲେ ଝାରସୁଗୁଡ଼ା ସଦର ଥାନା ମଙ୍ଗଳବଜାରର ମହମ୍ମଦ ଶାହାଜାହାନ୍‌ ଖାନ୍‌ (୨୬)। ପୁଲିସ୍‌ ସୂଚନାନୁସାରେ, ମଙ୍ଗଳବଜାରର ୨ ସମ୍ପର୍କୀୟ ଭାଇ ଇମ୍‌ରାନ୍‌ ଓ ଶାହାଜାହାନ୍‌ କୁକୁଡ଼ା ବ୍ୟବସା‌ୟ କରନ୍ତି। ବ୍ୟବସାୟକୁ କେନ୍ଦ୍ର କରି ଗତ କିଛି ମାସ ହେଲା ଉଭୟଙ୍କ ମଧ୍ୟରେ ଶତ୍ରୁତା ଲାଗି ରହିଥିଲା। ୩ ମାସ ତଳେ ଶାହାଜାହାନ୍‌ଙ୍କ ମଙ୍ଗଳବଜାରସ୍ଥିତ ଦୋକାନକୁ ଯାଇ ଇମ୍‌ରାନ୍‌ ଗାଳିଗୁଲଜ କରିଥିଲା। ତେବେ ଏହି ମାମଲାର ସମାଧାନ ପାଇଁ ଇମ୍‌ରାନ୍‌ ସେହି ଅଞ୍ଚଳର ମହମ୍ମଦ ଇଜାଜ୍‌କୁ କହିଥିଲା। ଗତକାଲି ରାତି ପ୍ରାୟ ୧୦ଟାରେ ଶାହାଜାହାନ୍‌କୁ ନେଇ ଇଜାଜ୍‌ ବେହେରାପାଟସ୍ଥିତ ଇମ୍‌ରାନର କୁକୁଡ଼ା ଫାର୍ମରେ ପହଞ୍ଚିଥିଲା। ଇମ୍‌ରାନ୍‌ ଓ ଶାହାଜାହାନ୍‌ଙ୍କ ମଧ୍ୟରେ ଆଲୋଚନା ଚାଲିଥିବା ବେଳେ ଇମ୍‌ରାନ୍‌ ପୂର୍ବରୁ ପ୍ରସ୍ତୁତ କରି ରଖିଥିବା ବନ୍ଧୁକରେ ଶାହାଜାହାନ୍‌ଙ୍କ ଉପରକୁ ୨ ରାଉଣ୍ଡ ଗୁଳି ଚଳାଇଥିଲା। ଛାତି ଓ ବେକରେ ଗୁଳି ବାଜିବା ଯୋଗୁଁ ଘଟଣାସ୍ଥଳରେ ହିଁ ଶାହାଜାହାନ୍‌ଙ୍କର ମୃତ୍ୟୁ ହୋଇଯାଇଥିଲା। ଏହା ପରେ ଇମ୍‌ରାନ୍‌ ଓ ଇଜାଜ୍‌ ମିଶି ଶବକୁ ଏକ କାର୍‌ରେ ନେଇ ଝାରସୁଗୁଡ଼ା-ସମ୍ବଲପୁର ଜିଲ୍ଲା ସୀମାନ୍ତ ରେଙ୍ଗାଲି ବ୍ଲକ୍‌ ରମ୍ପେଲା ସେତୁରୁ ହୀରାକୁଦ ଡ୍ୟାମ୍‌କୁ ଫିଙ୍ଗି ଦେଇଥିଲେ। 

ଶାହାଜାହାନ୍‌ ରାତିରେ ଘରକୁ ଫେରି ନଥିବାରୁ ପରିବାର ଲୋକେ ଥାନାରେ ଏତଲା ଦେଇଥିଲେ। ତେବେ ଏହା ଭିତରେ ଘଟଣା ପ୍ରଘଟ ହୋଇଯିବାରୁ ଅଭିଯୁକ୍ତ ଇମରାନ ଓ ଇଜାଜ୍ ଥାନାକୁ ଯାଇ ଆତ୍ମସମର୍ପଣ କରିଥିଲେ। ଇଜାଜ୍‌ର ସୂଚନାକୁ ଭିତ୍ତି କରି ମଙ୍ଗଳବାର ଦିନ ପ୍ରାୟ ୧୨ଟା ବେଳକୁ ରମ୍ପେଲା ସେତୁ ନିକଟରୁ ଶାହାଜାହାନ୍‌ଙ୍କ ଶବ ଉଦ୍ଧାର କରାଯାଇଛି।