ସାରା ରାଜ୍ୟରେ ‘ଯୁବ ସ୍ବାଭିମାନ ଦିବସ’ ପାଳିତ: ୭୦ଟି ଶିବିରରୁ ୩୯୮୧ ୟୁନିଟ୍‌ ରକ୍ତ ସଂଗ୍ରହ

ଭୁବନେଶ୍ବର: ‘ଆମ ଓଡ଼ିଶା’ର ଅଧ୍ୟକ୍ଷ ତଥା ‘ସମ୍ବାଦ’ର ସମ୍ପାଦକ ସୌମ୍ୟରଂଜନ ପଟ୍ଟନାୟକଙ୍କ ୭୩ତମ ଜନ୍ମଦିନକୁ ସାରା ରାଜ୍ୟରେ ଆଜି ‘ଯୁବ ସ୍ବାଭିମାନ ଦିବସ’ ରୂପେ ପାଳନ କରାଯାଇଛି। ଆଜି ସମସ୍ତ ଜିଲ୍ଲାରେ ସବୁ ବର୍ଗର ‌େଲାକଙ୍କ ମଧ୍ୟରେ ରକ୍ତଦାନ ପାଇଁ ପ୍ରବଳ ଉତ୍ସାହ ଦେଖିବାକୁ ମିଳିଥିଲା। ରାଜ୍ୟର କୌଣସି ରକ୍ତ କେନ୍ଦ୍ରରେ ଯେପରି ରକ୍ତର ଅଭାବ ନରହେ, ତାହାକୁ ନଜରରେ ରଖି ଅଗଷ୍ଟ ୧୭ ଓ ୧୮ରେ ରାଜ୍ୟର ସମସ୍ତ ରକ୍ତ କେନ୍ଦ୍ର ସହାୟତାରେ ୭୦ଟି ସ୍ଥାନରେ ରକ୍ତଦାନ ଶିବିର ଆୟୋଜନ କରାଯାଇଥିଲା। ଏଥିରେ ମୋଟ୍‌ ୩୯୮୧ ୟୁନିଟ୍ ରକ୍ତ ସଂଗ୍ରହ ହୋଇଛି। ଗତବର୍ଷ ଏହି କାର୍ଯ୍ୟକ୍ରମରେ ୬୭ଟି ଶିବିରରୁ ୩୬୩୪ ୟୁନିଟ ରକ୍ତ ସଂଗ୍ରହ ହୋଇଥିଲା।

‘ସମ୍ବାଦ’ର ୯ଟି ଜୋନ୍‌ରେ ‘ଆମ ଓଡ଼ିଶା’ ପକ୍ଷରୁ ବିଭିନ୍ନ ଅନୁଷ୍ଠାନ ସହଯୋଗରେ ୩୦ଟି ଜିଲ୍ଲାରେ ଏହି ୭୦ଟି ଶିବିର ଆୟୋଜନ କରାଯାଇଥିଲା। ଏଥିରେ ରକ୍ତ ଦେବାକୁ ଯୁବପିଢ଼ିଙ୍କ ମଧ୍ୟରେ ବେଶ୍ ଉତ୍ସାହ ଦେଖିବାକୁ ମିଳିଥିଲା। ଚଳିତବର୍ଷ କଟକ ଜୋନ୍‌ର କେନ୍ଦ୍ରାପଡ଼ା ଜିଲ୍ଲା ଡେରାବିଶ ବ୍ଲକ ଦାନପୁର ପଞ୍ଚାୟତ କେଶରପୁରସ୍ଥିତ କଳିଙ୍ଗ ଆବାସିକ ବିଦ୍ୟାଳୟ ଭବନ ଶିବିରରୁ ସର୍ବାଧିକ ୩୧୮ ୟୁନିଟ ରକ୍ତ ସଂଗୃହୀତ ହୋଇଥିବାବେଳେ ସମ୍ବଲପୁରର ଠେଲ୍‌କୁଲିସ୍ଥିତ ଜେଏସ୍‌ଡବ୍ଲ୍ୟୁ ବିପିଏସ୍‌ଏଲ୍‌ ଶିବିରରୁ ୩୦୭ ୟୁନିଟ, କଟକର ବିଦ୍ୟାଧରପୁରସ୍ଥିତ ଗ୍ଲୋବାଲ ଇଣ୍ଟରନ୍ୟାସନାଲ ସ୍କୁଲ ଶିବିରରୁ ୨୬୦ ୟୁନିଟ, କେନ୍ଦୁଝର ମ୍ୟୁନିସପାଲଟି ଟାଉନ୍ ହଲ୍‌ ଶିବିରରୁ ୧୪୭ୟୁନିଟ, ବାଲେଶ୍ବର ସଦର ବ୍ଲକର କେ.ଟି. ମାରାଇନ୍, ଚାନ୍ଦିପୁର ଶିବିରରୁ ୧୩୮ ୟୁନିଟ, କଟକର ଗୋପବନ୍ଧୁ ବିହାର କମିଟି ନୂଆରାଉସାପାଟଣା ଶିବିରରୁ ୧୦୨ୟୁନିଟ, ଖଣ୍ଡପଡ଼ା ଶିବିରରୁ ୧୦୦ୟୁନିଟ, ଲାୟନ୍ସ କ୍ଲବ ରାୟଗଡ଼ା ଶିିବିରରୁ ୧୦୧ ୟୁନିଟ, ବଲାଙ୍ଗୀର ଜିଲ୍ଲା ସାମ୍ବାଦିକ ଭବନ ଶିବିରରୁ ୧୦୧ ୟୁନିଟ, ବାଲେଶ୍ବର ସମ୍ବାଦ ଭବନ ଶିବିରରୁ ୧୦୧ ୟୁନିଟ ରକ୍ତ ସଂଗୃହୀତ ହୋଇଛି।

ଚଳିତବର୍ଷ ସମ୍ବଲପୁର୍‌ ଜୋନ୍‌ରେ ସର୍ବାଧିକ ୧୬ଟି ଶିବିିରରୁ ୯୯୮ ୟୁନିଟ ରକ୍ତ ସଂଗ୍ରହ ହୋଇଛି। କଟକ ଜୋନ୍‌ରେ ୭ଟି ଶିବିିରରୁ ୮୬୮ ୟୁନିଟ, ବାଲେଶ୍ବର ଜୋନ୍‌ରେ ୧୯ଟି ଶିବିରରୁ ୮୧୩ୟୁନିଟ, ଯାଜପୁର ଜୋନ୍‌ରେ ୫ଟି ଶିବିରରୁ ୩୨୩ ୟୁନିଟ୍, ଜୟପୁର ଜୋନ୍‌ରେ ୭ଟି ଶିବରରୁ ୩୧୩ୟୁନିଟ, ଭୁବନେଶ୍ବର ଜୋନ୍‌ରେ ୪ଟି ଶିବିରରୁ ୨୪୫ ୟୁନିଟ, ବ୍ରହ୍ମପୁର ଜୋନ୍‌ରେ ୬ଟି ଶିବିରରୁ ୨୧୧ ୟୁନିଟ, ରାଉରକେଲା ଜୋନ୍‌ରେ ୩ଟି ଶିବିରରୁ ୧୨୨ ୟୁନିଟ, ଅନୁଗୁଳ ଜୋନ୍‌ରେ ୩ଟି ଶିବିରରୁ ୮୮ୟୁନିଟ ରକ୍ତ ସଂଗୃହୀତ ହୋଇଛି। ଏହାଦ୍ବାରା ରାଜ୍ୟର ସମସ୍ତ ରକ୍ତ କେନ୍ଦ୍ର ଏହି କାର୍ଯ୍ୟକ୍ରମରେ ଯୋଗଦେଇ ସେମାନଙ୍କର ଆବଶ୍ୟକୀୟ ପରିମାଣର ରକ୍ତ ସଂଗ୍ରହ କରପାରିଛନ୍ତି। ରାଜ୍ୟ ରକ୍ତ ସଂଚାଳନ ପରିଷଦ ଓ ରାଜ୍ୟର ସମସ୍ତ ରକ୍ତକେନ୍ଦ୍ରଗୁଡ଼ିକର ସହାୟତାରେ ଶିବିରଗୁଡ଼ିକ ଅନୁଷ୍ଠିତ ହୋଇଥିଲା। ବିଭିନ୍ନ ଅନୁଷ୍ଠାରର କର୍ମକର୍ତ୍ତା ଏବଂ ‘ସମ୍ବାଦ’ ଓ ‘ଆମ ଓଡ଼ିଶା’ର ସଦସ୍ୟମାନଙ୍କ ଦ୍ବାରା ଶିବିର ପରିଚାଳନା କରାଯାଇଥିଲା।

ଯୁବ ସ୍ବାଭିମାନ ଦିବସରେ ରକ୍ତଦାନ କାର୍ଯ୍ୟକ୍ରମର ସଫଳତା ପାଇଁ ‘ଆମ ଓଡ଼ିଶା’ ଅଧ୍ୟକ୍ଷ ସୌମ୍ୟରଂଜନ ପଟ୍ଟନାୟକ ରକ୍ତଦାତା, ସହଯୋଗୀ ଅନୁଷ୍ଠାନ ଓ ସ୍ବେଚ୍ଛାସେବୀଙ୍କୁ କୃତଜ୍ଞତା ଜ୍ଞାପନ କରିଛନ୍ତି। ସୂଚନା ଥାଉ କି, ଆମ ଓଡ଼ିଶା କ୍ରମାଗତ ଭାବେ ୧୯ବର୍ଷ ଧରି ସାରା ରାଜ୍ୟରେ ରକ୍ତଦାନ ଶିବିର ଆୟୋଜନ କରି ସ୍ବେଚ୍ଛା ରକ୍ତଦାନ କ୍ଷେତ୍ରରେ ବିପୁଳ ଜନ‌ସଚେତନତା‌ ସୃଷ୍ଟି କରିପାରିଛି। ଏହି କ୍ରମରେ ଚଳିତବର୍ଷ ମାତ୍ର ସାଢ଼େ ୭ମାସ ମଧ୍ୟରେ ୩୩ହଜାରରୁ ଅଧିକ ୟୁନିଟ ରକ୍ତ ସଂଗ୍ରହ ହୋଇସାରିଲାଣି।