ଲୌସାନେ: କନିଷ୍ଠ ପୁରୁଷ ହକି ବିଶ୍ବକପ୍ ଭୁବନେଶ୍ବର-୨୦୨୧ ଲାଗି ବୁଧବାର ଅନ୍ତର୍ଜାତୀୟ ହକି ମହାସଂଘ (ଏଫ୍ଆଇଏଚ୍) ସୂଚୀ ଘୋଷିତ କରିଛ। ଏହି ପ୍ରତିଯୋଗିତା ଭୁବନେଶ୍ବରସ୍ଥିତ କଳିଙ୍ଗ ଷ୍ଟାଡ଼ିୟମରେ ଆସନ୍ତା ମାସ ୨୪ରୁ ନଭେମ୍ବର ୫ ତାରିଖ ପର୍ଯ୍ୟନ୍ତ ଖେଳାଯିବ। ୧୬ ଦଳକୁ ନେଇ ଆୟୋଜିତ ଏହି ପ୍ରତିଯୋଗିତାର ପୁଲ୍-ବିରେ ଆୟୋଜକ ଭାରତ ସହ କାନାଡ଼ା, ଫ୍ରାନ୍ସ ଓ ପୋଲାଣ୍ଡ ରହିଛନ୍ତି। ପୁଲ୍-ଏରେ ବେଲ୍ଜିୟମ, ମାଲେସିଆ, ଦକ୍ଷିଣ ଆଫ୍ରିକା ଓ ଚିଲି, ପୁଲ୍-ସିରେ ନେଦରଲାଣ୍ଡ୍ସ, ସ୍ପେନ୍, କୋରିଆ ଓ ଆମେରିକା ଏବଂ ପୁଲ୍-ଡିରେ ଜର୍ମାନି, ଆର୍ଜେଣ୍ଟିନା, ପାକିସ୍ତାନ ଓ ଇଜିପ୍ଟ ରହିଛନ୍ତି। ବିଜେତା ଭାରତ ଉଦ୍ଘାଟନୀ ଦିବସରେ ଫ୍ରାନ୍ସ ବିପକ୍ଷରୁ ଅଭିଯାନ ଆରମ୍ଭ କରିବ। ସେହିଭଳି ପ୍ରଥମ ଦିବସରେ ଖେଳାଯିବାକୁ ଥିବା ଅନ୍ୟ ମ୍ୟାଚ୍ଗୁଡ଼ିକରେ ବେଲ୍ଜିୟମ-ଦକ୍ଷିଣ ଆଫ୍ରିକା, ମାଲେସିଆ-ଚିଲି ଓ ଜର୍ମାନି-ପାକିସ୍ତାନ ମୁହାଁମୁହିଁ ହେବେ। ଭାରତ ପରବର୍ତ୍ତୀ ପୁଲ୍ ମ୍ୟାଚ୍ ନଭେମ୍ବର ୨୫ରେ କାନାଡ଼ା ଏବଂ ନଭେମ୍ବର ୨୭ରେ ପୋଲାଣ୍ଡ ବିପକ୍ଷରେ ଖେଳିବ। ସେମିଫାଇନାଲ୍ ଓ ଫାଇନାଲ୍ ଯଥାକ୍ରମେ ଡିସେମ୍ବର ୩ ଓ ୫ ତାରିଖରେ ଖେଳାଯିବ।
Sambad is now on WhatsApp
Join and get latest news updates delivered to you via WhatsApp
ଏଥି ସହ ଏଫ୍ଆଇଏଚ୍ ଦକ୍ଷିଣ ଆଫ୍ରିକାରେ ଡିସେମ୍ବର ୫ରୁ ୧୬ ତାରିଖ ପର୍ଯ୍ୟନ୍ତ ହେବାକୁଥିବା ମହିଳା କନିଷ୍ଠ ବିଶ୍ବକପ୍ ପାଇଁ ମଧ୍ୟ ସୂଚୀ ଘୋଷଣା କରିଛି। ଏଥିରେ ଭାରତ ପୁଲ୍-ସି’ରେ ବିଜେତା ଆର୍ଜେଣ୍ଟିନା, ଜାପାନ ଓ ରୁଷିଆ ସହ ରହିଛି। ଡିସେମ୍ବର ୬ରେ ରୁଷିଆ ବିପକ୍ଷରୁ ଭାରତ ଅଭିଯାନ ଆରମ୍ଭ କରିବ। ଏହାପରେ ଡିସେମ୍ବର ୭ରେ ଆର୍ଜେଣ୍ଟିନା ଓ ଡିସେମ୍ବର ୯ରେ ଜାପାନ୍କୁ ଭେଟିବ।