ଜାଣନ୍ତୁ,୨୧ ଦିନିଆ ଲକଡାଉନ୍ ସମ୍ବନ୍ଧରେ ଗୃହବ୍ୟାପାର ମନ୍ତ୍ରାଳୟ ଜାରି କରିଥିବା ଗାଇଡଲାଇନ୍
ନୂଆଦିଲ୍ଲୀ: ସମଗ୍ର ଦେଶରେ ୨୧ ଦିନିଆ ଲକଡାଉନ୍ ଘୋଷିତ ହେବା ପରେ ଗୃହମନ୍ତ୍ରାଳୟ ଗାଇଡଲାଇନ୍ ଜାରି କରିଛି । ଏଥିରେ କୁହାଯାଇଛି ଯେ ଖାଦ୍ୟ, ତେଜରାତି, ଦୁଗ୍ଧଜାତ ପଦାର୍ଥ ଓ ଦୁଗ୍ଧ, ମାଂସ, ମାଛ ଏବଂ ପ୍ରାଣୀଖାଦ୍ୟ ଦୋକାନ, ବ୍ୟାଙ୍କ୍/ଏଟିଏମ୍, ପେଟ୍ରୋଲ୍ ପମ୍ପ୍, ଡାକ୍ତରଖାନା ଏବଂ ଡାକ୍ତରୀ ପ୍ରତିଷ୍ଠାନ ଆଦି ଲକଡାଉନରୁ ବାଦ ପଡ଼ିବେ । ଅର୍ଥାତ୍ ଏସବୁ ପ୍ରତିଷ୍ଠାନ ଖୋଲା ରହିବ ।
Sambad is now on WhatsApp
Join and get latest news updates delivered to you via WhatsApp
କିନ୍ତୁ, ଘର ବାହାରେ ଲୋକମାନଙ୍କର ଚଳପ୍ରଚଳ କମାଇବାକୁ ଜିଲ୍ଲା କର୍ତ୍ତୃପକ୍ଷ ଚାହିଁଲେ ଖାଦ୍ୟ ଏବଂ ଅତ୍ୟାବଶ୍ୟକ ସାମଗ୍ରୀ ଜନସାଧାରଣଙ୍କ ଘରେ ପହଞ୍ଚାଇ ଦେବାର ବନ୍ଦୋବସ୍ତ କରିପାରିବେ ।
ଲକଡାଉନ ଅମାନ୍ୟ କରୁଥିବା ବ୍ୟକ୍ତିବିଶେଷଙ୍କ ପ୍ରତି ବିପର୍ଯ୍ୟୟ ପରିଚାଳନା ଆଇନ-୨୦୦୫ ଅଧୀନରେ ଥିବା ୫୧ ରୁ ୬୦ ଧାରା ଏବଂ ଭାରତୀୟ ପିଙ୍ଗଳ କୋଡର ଧାରା ୧୮୮ ଅନୁସାରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ । ବିପର୍ଯ୍ୟୟ ପରିଚାଳନା ଆଇନ ଅମାନ୍ୟ କଲେ ଜରିମାନା ସହ ୧ ବର୍ଷରୁ ୨ ବର୍ଷ ଯାଏଁ ଜେଲ୍ ଦଣ୍ଡ ଭୋଗିବେ । ଭାରତୀୟ ପିଙ୍ଗଳ କୋଡର ଧାରା ୧୮୮ ଅମାନ୍ୟ କଲେ ଏକ ମାସ ଜେଲ୍ କିଂବା ୨୦୦ ଟଙ୍କା ଜରିମାନା ଦେବେ । ଏହି ଆଇନ ଉଲ୍ଲଂଘନ କରିବା ଦ୍ୱରା ଯଦି ମଣିଷ ଜୀବନ ବା ସ୍ୱାସ୍ଥ୍ୟ ବିପଦଗ୍ରସ୍ତ ହେଉଥାଏ ତେବେ, ୬ମାସ ଜେଲ୍ ବା ୧୦୦୦ ଟଙ୍କା ଜରିମାନା ପଡ଼ିବ ।
ଏହାଛଡ଼ା ଲକଡାଉନ୍ ସମୟରେ ଟେଲିକମ୍ ଓ ଇଣ୍ଟର୍ନେଟ୍ ସେବା, ପ୍ରିଣ୍ଟ୍ ଓ ଇଲେକଟ୍ରୋନିକ୍ ମିଡିଆ ଏବଂ କେବଲ/ଡିଟିଏଚ୍ ସେବା କାର୍ଯ୍ୟ କରିବ । ଇ-କମର୍ସ ସାଇଟମାନେ ଖାଦ୍ୟ, ଔଷଧ ଏବଂ ଡାକ୍ତରୀ ଉପକରଣ ଡେଲିଭରି ଦେଇପାରିବେ । ଘରୋଇ ସିକୁ୍ୟରିଟି ଗାର୍ଡମାନେ ମଧ୍ୟ ଲକଡାଉନ୍ ସମୟରେ ଡିୟୁଟି କରିପାରିବେ ।
ପ୍ରତିରକ୍ଷା, କେନ୍ଦ୍ରୀୟ ପାରାମିଲିଟାରି ବଳ, ବିପର୍ଯ୍ୟୟ ପରିଚାଳନା, ଶକ୍ତି ଉତ୍ପାଦନ ଏବଂ ପ୍ରସାରଣ ୟୁନିଟ୍ ଏବଂ ପୋଷ୍ଟ୍ ଅଫିସ୍ ଛଡ଼ା ଅନ୍ୟ ସମସ୍ତ କେନ୍ଦ୍ର ସରକାରୀ କାର୍ଯ୍ୟାଳୟ ବନ୍ଦ ରହିବ । ସେହିଭଳି ପୁଲିସ, ହୋମ୍ ଗାର୍ଡ, ସିଭିଲ୍ ଡିଫେନ୍ସ୍, ଫାୟାର୍ ଏବଂ ଏନର୍ଜି ସେବା, ଜେଲ୍, ଜିଲ୍ଲା ପ୍ରଶାସନ, ବିଜୁଳି, ଜଳଯୋଗାଣ ଓ ଜନସ୍ୱାସ୍ଥ୍ୟ ଆଦି କାର୍ଯ୍ୟାଳୟ ଛଡ଼ା ବାକି ସମସ୍ତ ରାଜ୍ୟ ସରକାରୀ କାର୍ଯ୍ୟାଳୟ ବନ୍ଦ ରହିବ । ପୌରସଂସ୍ଥା ଖୋଲା ରହିବ କିନ୍ତୁ, ପରିଚ୍ଛନ୍ନତା ପାଇଁ ଯେତିକି କର୍ମଚାରୀ ଲୋଡ଼ା ସେତିକି କର୍ମଚାରୀ ରହିବେ ।
ଅତ୍ୟାବଶ୍ୟକ ସାମଗ୍ରୀ ଉତ୍ପାଦନ କରୁଥିବା ଶିଳ୍ପସଂସ୍ଥା ଛଡ଼ା ବାକି ସବୁ ଶିଳ୍ପସଂସ୍ଥାନ ବନ୍ଦ ରହିବ । ଜଳ, ସ୍ଥଳ ଓ ଆକାଶ ପରିବହନ ଆଗାମୀ ୨୧ ଦିନଯାଏଁ ବନ୍ଦ ରହିବ । କେବଳ ଅତ୍ୟାବଶ୍ୟକ ସାମଗ୍ରୀ ପରିବହନ କରୁଥିବା ଯାନ, ଅଗ୍ନିଶମ ଯାନ, ଆଇନଶୃଙ୍ଖଳା ପରିସ୍ଥିତି ପାଇଁ ଆବଶ୍ୟକ ଯାନ ଏବଂ ଜରୁରୀକାଳୀନ ସେବା ନିମନ୍ତେ ଆବଶ୍ୟକ ଯାନ ଚଳାଚଳ କରିବ ।
ସମସ୍ତ ସାମାଜିକ, ରାଜନୈତିକ, କ୍ରୀଡ଼ା, ମନୋରଞ୍ଜନ ଏବଂ ସାଂସ୍କୃତିକ ସମାରୋହ ନିଷେଧ କରାଯାଇଛି । ଶବସଂସ୍କାର ପାଇଁ ଅନୁମତି ରହିଛି କିନ୍ତୁ, ଏଥିରେ ୨୦ରୁ ଅଧିକ ବ୍ୟକ୍ତି ଯୋଗ ଦେଇ ପାରିବେ ନାହିଁ ।
ଏହାଛଡ଼ା ଲକଡାଉନ୍ ସମୟରେ ଏକ ୨୪ଘଣ୍ଟିଆ ହେଲପଲାଇନ୍ ନମ୍ବର ଜାରି କରାଯିବ ।