ନୂଆଦିଲ୍ଲୀ- ବ୍ୟାଙ୍କ ଖାତା ସହିତ ଆଧାର ଓ ପ୍ୟାନ୍ ଲିଙ୍କ୍ ବା ଫର୍ମ ୬୦ ସଂଯୋଗ କରିବାର ଶେଷ ତାରିଖକୁ କେନ୍ଦ୍ର ସରକାର ମାର୍ଚ୍ଚ ୩୧ ପର୍ଯ୍ୟନ୍ତ ବଢାଇଦେଇଛନ୍ତି । ପୂର୍ବରୁ ଏଥିଲାଗି ଶେଷ ତାରିଖ ଡିସେମ୍ବର ୩୧ ତାରିଖ ଥିଲା । ଏ ସଂପର୍କରେ ଅର୍ଥମନ୍ତ୍ରଣାଳୟ ପକ୍ଷରୁ ଟ୍ଵିଟ୍ କରି ସୂଚୀତ କରାଯାଇଛି ।
Sambad is now on WhatsApp
Join and get latest news updates delivered to you via WhatsApp
ଦେଶରୁ କଳାଧନକୁ ନିୟନ୍ତ୍ରଣ କରିବା ଲକ୍ଷ୍ୟରେ ସରକାର ପ୍ରିଭେନ୍ସନ ଅଫ ମନି ଲଣ୍ଡରିଂ ଆକ୍ଟ ୨୦୦୨ ଅନୁସାରେ ବ୍ୟାଙ୍କ ଖାତା, ମ୍ୟୁଚୁଆଲ ଫଣ୍ଡ ଓ ବୀମା ପଲିସୀ ସହ ଆଧାର ଲିଙ୍କ୍ କରିବା ଲାଗି ନିର୍ଦ୍ଦେଶ ଦେଇଥିଲେ । ତେବେ ବୁଧବାରଦିନ ଏହି ଆଇନରେ ଏକ ସଂଶୋଧନ ଅଣାଯିବା ସହ ଏନେଇ ଏକ ଗେଜେଟ୍ ନୋଟିସ୍ ପ୍ରକାଶ ପାଇଛି । ଅର୍ଥମନ୍ତ୍ରଣାଳୟ ଅଧିନସ୍ଥ ରାଜସ୍ୱ ବିଭାଗ ପକ୍ଷରୁ ପ୍ରକାଶିତ ଏହି ନୋଟିସରେ କୁହାଯାଇଛି ଯେ ଆଇନରେ ଲେଖାଥିବା ‘ଡିସେମ୍ବର ୩୧ , ୨୦୧୭ ସୁଦ୍ଧା’ ବଦଳରେ ‘ସରକାରଙ୍କ ପକ୍ଷରୁ ଧାର୍ଯ୍ୟ ସମୟସୀମା’ ଲେଖାହେବ ।
ଏହା ଫଳରେ ବ୍ୟାଙ୍କ ଖାତା ସହ ବାଧ୍ୟତାମୂଳକଭାବେ ଆଧାର ଓ ପ୍ୟାନ୍ ଲିଙ୍କ କରିବାର ଶେଷତାରିଖ ବଢିବାର ପଥ ପରିଷ୍କାର ହୋଇଯାଇଛି । ଆଧାର ଲିଙ୍କ ବେଆଇନ ବୋଲି ଦର୍ଶାଇ କେତେକ ପକ୍ଷ ସୁପ୍ରିମକୋର୍ଟରେ ଅଭିଯୋଗ କରିଥିଲେ ।
ଗତ ଜୁନ ମାସରେ କେନ୍ଦ୍ର ସରକାର ବ୍ୟାଙ୍କଖାତା ସହିତ ଆଧାର ଲିଙ୍କ୍ କରିବା ବାଧ୍ୟତାମୂଳକ କରିଥିଲେ । ଏଥିଲାଗି ଡିସେମ୍ବର ୩୧ ଶେଷ ତାରିଖ ରଖାଯାଇଥିଲା । ଏହା ସହିତ ନୂଆ କରି ଖାତା ଖୋଲୁଥିବା ଲୋକମାନଙ୍କୁ ଖାତା ଖୋଲାହେବାର ୬ ମାସ ମଧ୍ୟରେ ଆଧାର ନମ୍ବର ଦେବାପାଇଁ ଯେଉଁ ନିୟମ ଥିଲା ତାହା ବଳବତ୍ତର ରହିଛି ।
ଗତ ସପ୍ତାହରେ ସୁପ୍ରିମକୋର୍ଟରେ କେନ୍ଦ୍ର ସରକାର କହିଥିଲେ ଯେ ଆଧାର- ବ୍ୟାଙ୍କ ଖାତା ଲିଙ୍କ କରିବା ଲାଗି ଥିବା ଶେଷ ତାରିଖକୁ ମାର୍ଚ୍ଚ ୩୧ ପର୍ଯ୍ୟନ୍ତ ବଢାଇବାକୁ ସରକାର ରାଜି ଅଛନ୍ତି । ଏହା ସହିତ ପ୍ୟାନ ନମ୍ବର ସହ ଆଧାର ଲିଙ୍କ କରିବାର ଶେଷତାରିଖକୁ ମଧ୍ୟ ବଢାଇବାକୁ ସରକାର ରାଜି ହୋଇଥିଲେ ।