ନୂଆଦିଲ୍ଲୀ: ପ୍ରତିବର୍ଷ ବିବାହ କରନ୍ତି ରାଜା । ବିବାହ ପୂର୍ବରୁ କୁଆଁରୀ ଝିଅମାନେ କରିଥାନ୍ତି ନାଚ । ଶେଷରେ ମନ ପସନ୍ଦର ଝିଅକୁ ବିବାହ କରନ୍ତି ରାଜା । ତେବେ ଏହି ରାଜାଙ୍କ ପତ୍ନୀଙ୍କ ସଂଖ୍ୟା ଜାଣିଲେ ଆଶ୍ଚର୍ଯ୍ୟ ହୋଇଯିବେ। ଆଜି ବି ରହିଛି ଏଭଳି ପରମ୍ପରା। ଆଜ୍ଞା ହଁ, ବିଶ୍ୱାସ ନହେଲେ ମଧ୍ୟ ଏହା ସତ । ବିଶ୍ୱର ଅଧିକାଂଶ ଦେଶରେ ଲୋକତନ୍ତ୍ର ଚାଲୁଥିବା ବେଳେ ଏବେ ବି ଏମିତି କିଛି ସ୍ଥାନ ଅଛି ଯେଉଁଠାରେ ରାଜତନ୍ତ୍ର ଚାଲୁଛି । ରାଜା ନିଜ ମନ ଇଛା ଶାସନ କରୁଥିବା ବେଳେ ତାଙ୍କ ଉପରେ କୌଣସି କଟକଣା ନଥିବା ମଧ୍ୟ ଦେଖିବାକୁ ମିଳିଥାଏ ।
Sambad is now on WhatsApp
Join and get latest news updates delivered to you via WhatsApp
ତେବେ ସବୁଠାରୁ ବଡ଼ କଥା ହେଉଛି କି ଏଠାକାର ପରମ୍ପରା ଏଭଳି ରହିଛି କି ରାଜା ପ୍ରତିବର୍ଷ ନୂଆ ନୂଆ କୁଆଁରୀ ଝିଅଙ୍କୁ ବିବାହ କରିଥାନ୍ତି। ଆମେ କହୁଥିବା ଏହି ଦେଶଟି ଆଫ୍ରିକା ମହାଦୀପର ସ୍ୱିଜିଲ୍ୟାଣ୍ଡ । ତେବେ ୨୦୧୮ ମସିହାରେ ଦେଶର ସ୍ୱାଧିନତାକୁ ୫୦ ବର୍ଷ ପୂରଣ ହୋଇଥିବା ବେଳେ ଦେଶର ନାମକୁ ବଦଳେଇ ଦେଇଛନ୍ତି ରାଜା । ଏବେ ଏହି ଦେଶର ନାମ ରହିଛି ଦ କିଙ୍ଗ ଡମ ଅଫ୍ ୱାତିନି। ଏହି ଦେଶ ଦକ୍ଷିଣ ଆଫ୍ରିକା ଏବଂ ମୌଜମ୍ବି ସୀମାକୁ ଲାଗି ରହିଛି । ଗରିବ ଦେଶ ଭାବେ ପରିଚିତ ଥିବା ଏହି ଦେଶର ରାଜା କିନ୍ତୁ ବିଳାସମୟ ଜୀବନଯାପନ କରିଥାନ୍ତି । ଗାଡ଼ିଠାରୁ ଆରମ୍ଭ କରି ଫ୍ଲାଇଟ ରହିଛି । ଏପରିକି ରାଜାଙ୍କ ଜୀବନଶୈଳୀକୁ ନେଇ ସବୁବେଳେ ଚର୍ଚ୍ଚା ହେଉଥିବା ବେଳେ ପ୍ରତିବର୍ଷ ବିବାହକୁ ନେଇ ମଧ୍ୟ ଅନେକ ଚର୍ଚ୍ଚା ହୁଏ । ତେବେ ଅଗଷ୍ଟରୁ ସେପ୍ଟେମ୍ବର ମଧ୍ୟରେ ଏହି ଦେଶରେ ମହାରାଣୀଙ୍କ ମାଙ୍କ ଗାଁ ଲୁତଜିଜିନରେ ଉମଲିଙ୍ଗା ସେରିମନି ପର୍ବ ପାଳନ ହୋଇଥାଏ । ଯେଉଁଥିରେ ୧୦ ହଜାରରୁ ଅଧିକ କୁଆଁରୀ ଝିଅମାନେ ଭାଗ ନେଇଥାନ୍ତିି ।
ଏହି ପର୍ବରେ ରାଜା ସାମନାରେ ଝିଅମାନେ ନାଚ କରିଥାନ୍ତି । ଏହି ଝିଅମାନଙ୍କ ମଧ୍ୟରୁ ରାଜା ନିଜର ରାଣୀ ବାଛିଥାନ୍ତି । ସବୁଠାରୁ ବଡ଼ କଥା ହେଉଛି କି ଝିଅମାନେ ସବୁ ପ୍ରଜାଙ୍କ ସାମ୍ନାରେ ନାଚ କରିଥାନ୍ତି । କିନ୍ତୁ ୨୦୨୦ରେ କିଛି ଝିଅ ଏହି ପ୍ରଥାକୁ ବିରୋଧ କରିଥିଲେ । ରାଜା ଏହି ଖବର ପାଇବା ପରେ ସେମାନଙ୍କ ପରିବାରକୁ ଜରିମାନା ଲଗାଇଥିଲେ । ଆଉ ପରବର୍ତ୍ତୀ ସମୟରେ କେହି ଏହାକୁ ବିରୋଧ କରିନଥିବା ମଧ୍ୟ କୁହାଯାଉଛି ।
ତେବେ ୨୦୧୫ ମସିହାରେ ଆଫ୍ରିକା ଶିଖର ସମ୍ମିଳନୀରେ ଯୋଗ ଦେବାଲାଗି ଏଠାକାର ରାଜା ମସବାତି ତ୍ରିତେୟେ ଭାରତକୁ ଆସିଥିଲେ । ତାଙ୍କ ସହ ୧୫ଜଣ ରାଣୀଙ୍କ ପିଲାଙ୍କ ସମେତ ୧୦୦ଜଣ କର୍ମଚାରୀଙ୍କ ସହ ଆସିଥିଲେ । ଦିଲ୍ଲୀର ଏକ ପଂଚତାରକା ହୋଟେଲରେ ସେ ରହିଥିବା ବେଳେ ୨ଶହଟି ରୁମ ବୁକ କରାଯାଇଥିଲା । ତେବେ ସେ ଯାହାବି ହେଉ ରାଜା ତାଙ୍କର ଜୀବନଶୈଳୀ ପାଇଁ ସେ ସବୁବେଳେ ଚର୍ଚ୍ଚାରେ ମଧ୍ୟ ରହିଥାନ୍ତି।