ଶତ୍ରୁକୁ କଡା ଜବାବ: ଚୀନ କମ୍ପାନୀକୁ ଦିଆଯାଇଥିବା ୫,୦୦୦କୋଟିର ପ୍ରକଳ୍ପକୁ ସ୍ଥଗିତ ରଖିଲେ ମହାରାଷ୍ଟ୍ର ସରକାର
ମୁମ୍ବାଇ: ସୀମାରେ ଭାରତ ଏବଂ ଚୀନ୍ ମଧ୍ୟରେ ତିକ୍ତତାର ପ୍ରଭାବ ସାରା ଦେଶରେ ସ୍ପଷ୍ଟ ଭାବରେ ପଡିଥିବା ଦେଖାଯାଉଛି। ସ୍ଥାନୀୟ ସ୍ତରରେ ଚୀନର ସାମଗ୍ରୀକୁ ବର୍ଜନ କରିବାକୁ ଦାବି କରାଯାଉଛି । ଏହି ସମୟ ମଧ୍ୟରେ କେନ୍ଦ୍ର ଏବଂ ରାଜ୍ୟ ସରକାର ମଧ୍ୟ ଚୀନକୁ ଆର୍ଥିକ ସ୍ତରରେ ଦୁର୍ବଳ କରିବାର ଯୋଜନା ଆରମ୍ଭ କରିଦେଇଛନ୍ତି | ବର୍ତ୍ତମାନ ମହାରାଷ୍ଟ୍ର ସରକାର ଚୀନ କମ୍ପାନୀକୁ ଦିଆଯାଇଥିବା ତିନୋଟି ପ୍ରକଳ୍ପକୁ ସ୍ଥଗିତ କରିଥିବା ନେଇ ଖବର ସାମ୍ନାକୁ ଆସିଛି। ୫୦୦୦ କୋଟି ଟଙ୍କାର ପ୍ରାୟ ତିନୋଟି ପ୍ରକଳ୍ପକୁ ମହାରାଷ୍ଟ୍ର ସରକାର ସ୍ଥଗିତ କରିବା ପରେ ଏହାକୁ ନେଇ ଚର୍ଚ୍ଚା ଆରମ୍ଭ ହୋଇଛି | ଏହି ଖବରକୁ ନିଶ୍ଚିତ କରି ମହାରାଷ୍ଟ୍ର ଶିଳ୍ପ ମନ୍ତ୍ରୀ ସୁଭାଷ ଦେଶାଇ କହିଛନ୍ତି ଯେ, କେନ୍ଦ୍ର ସରକାରଙ୍କ ସହ ଆଲୋଚନା ପରେ ଏହି ନିଷ୍ପତ୍ତି ନିଆଯାଇଛି। ଆମେ ପ୍ରକଳ୍ପଗୁଡିକୁ ସ୍ଥଗିତ ରଖିଛୁ ଏବଂ କେନ୍ଦ୍ରର ପରବର୍ତ୍ତୀ ନିର୍ଦ୍ଦେଶନାମାକୁ ଅପେକ୍ଷା କରିଛୁ ବୋଲି ସେ କହିଛନ୍ତି। ବୈଦେଶିକ ମନ୍ତ୍ରଣାଳୟ କହିଛି ଯେ, ଚୀନ୍ କମ୍ପାନୀଗୁଡିକ ସହିତ ବର୍ତ୍ତମାନ କୌଣସି ଚୁକ୍ତିନାମା ହେବା ଉଚିତ୍ ନୁହେଁ। ନିକଟରେ ହରିୟାଣା ସରକାର ମଧ୍ୟ ପାୱାର ପ୍ରୋଜେକ୍ଟରୁ ଚୀନ କମ୍ପାନୀଗୁଡିକର ଟେଣ୍ଡର ବାତିଲ କରିବା ଏବଂ ନୂତନ ଟେଣ୍ଡର ଦେବା ପାଇଁ ନିର୍ଦ୍ଦେଶ ଦେଇସାରିଛନ୍ତି।
Sambad is now on WhatsApp
Join and get latest news updates delivered to you via WhatsApp
ଗତ ସୋମବାର ଭିଡିଓ କନଫରେନ୍ସିଂ ମାଧ୍ୟମରେ ଚୀନ୍ ରାଷ୍ଟ୍ରଦୂତ ସନ୍ ୱିଡୋଙ୍ଗ ସହ ଏହି ସମ୍ମିଳନୀ ଅନୁଷ୍ଠିତ ହୋଇଥିଲା | ମହାରାଷ୍ଟ୍ରରେ ଅର୍ଥନୀତି ଆରମ୍ଭ କରିବାକୁ ଏହା ଏକ ପ୍ରୟାସ ଥିଲା | ଚୀନ୍, ଦକ୍ଷିଣ କୋରିଆ, ସିଙ୍ଗାପୁର ଏବଂ ଆମେରିକା ଭଳି ଦେଶ ସହିତ ଏମଓୟୁ ମଧ୍ୟ ସ୍ୱାକ୍ଷରିତ ହୋଇଥିଲା। ମହାରାଷ୍ଟ୍ର ନିବେଶକଙ୍କ ଇଭେଣ୍ଟରେ ସହମତ ହୋଇଥିବା ୧୨ଟି ଏମଓୟୁ ମଧ୍ୟରୁ ତିନୋଟି ଚୀନ୍ ସହିତ ଥିଲା | ହେଙ୍ଗଲି ଇଞ୍ଜିନିୟରିଂ ସହିତ ୨୫୦କୋଟି ଟଙ୍କା, ଗ୍ରେଟ୍ ୱାଲ୍ ମୋଟର୍ସ ସହିତ ୩,୭୭୦ କୋଟି ଟଙ୍କା ଏବଂ ପିଏମଆଇ ଇଲେକ୍ଟ୍ରୋ ମୋବିଲିଟି ସହିତ ୧୦୦୦ କୋଟି ଟଙ୍କା ମୂଲ୍ୟର ଏକ ପ୍ରକଳ୍ପ ପାଇଁ ମହାରାଷ୍ଟ୍ର ଚୀନ ସହିତ ଏମଓୟୁ ସ୍ୱାକ୍ଷରିତ କରିଥିଲା ।
କିନ୍ତୁ ସେହି ଦିନ ପୂର୍ବ ଲଦାଖର ଗଲୱାନ ଉପତ୍ୟକାରେ ଭାରତୀୟ ଏବଂ ଚୀନ୍ ସୈନିକମାନଙ୍କ ମଧ୍ୟରେ ଘାତକ ସଂଘର୍ଷ ହୋଇଥିଲା। ଏହି ସଂଘର୍ଷରେ ୨୦ ଜଣ ଭାରତୀୟ ଯବାନ ସହିଦ ହୋଇଥିଲେ । ଏହି ଘଟଣା ପରେ ଦେଶବ୍ୟାପୀ ଚୀନର ସାମଗ୍ରୀକୁ ବର୍ଜନ କରିବାକୁ ଦାବି ଜୋର ଧରିଥିଲା ।