କ୍ଷମତାର ଅପବ୍ୟବହାର: ଜବତ ପିକ୍-ଅପ୍ ବ୍ୟବହାର କରୁଥିଲା ବନ ବିଭାଗ, ଚେକିଂ ବେଳେ ଖୋଲିଲା ଗୁମର
ନୟାଗଡ଼: ପ୍ରାୟ ବର୍ଷେ ତଳେ ଜବତ ହୋଇଥିବା ଏକ ଗାଡ଼ିକୁ ବେଧଡକ ନିଜ କାମରେ ବ୍ୟବହାର କରୁଥିଲା ନୟାଗଡ ବନ ବିଭାଗ । ଏମଭିଆଇ ଚେକିଂରେ ଧରାପଡିବା ପରେ ଏ ସବୁ ଗୁମର ଖୋଲିଯାଇଛି । ତେବେ ରାତି ଅଧିଆ ଫାଇନ ଦେଇ ଗାଡି ମୁକୁଳାଯାଇଥିବା ବେଳେ ତରବରିଆ ଭାବରେ ସେହି ଗାଡିକୁ ସିଜର ଷ୍ଟୋରକୁ ପଠାଇ ଗାଡିର ରଙ୍ଗ ବଦଳାଇ ଦିଆଯାଇଥିବା ଅଭିଯୋଗ ହୋଇଛି ।
Sambad is now on WhatsApp
Join and get latest news updates delivered to you via WhatsApp
ସିଜର ଷ୍ଟୋରରେ ଥିବା ଗାଡିର ରଙ୍ଗ କାହିଁକି ରାତାରାତି ବଦଳିଗଲା, କାହିିଁକି ବନ ବିଭାଗ ନୟାଗଡ ଲେଖା ବଦଳରେ ଏକ କେଶର ନମ୍ବର ଲେଖି ଦିଆଗଲା, ତାର କାରଣ ଜାଣିଲେ ଆପଣ ବି ତାଜୁବ ହୋଇଯିବେ । ଗତ ବୁଧବାର ସଂନ୍ଧ୍ୟାରେ ନମ୍ବର ବିହିନ ଏକ ଗାଡିଟି ଏମଭିଆଇଙ୍କ ହାତରେ ଧରାପଡିଥିଲା । ଗାଡିର ଇନସ୍ୟୁରାନସ ନ ଥିଲା, କି ଫିଟନେସ ବି ନଥିଲା । ହେଲେ ଏହାକୁ ରାତି ଅଧିଆ ଫାଇନ କାଟି ମୁକୁଳାଇଥିଲା ନୟାଗଡ ବନାଞ୍ଚଳ । ହେଲେ ଅଫିସ ନ ନେଇ ଗାଡିଟିକୁ ଏହି ଷ୍ଟୋରରେ ଛାଡି ଦେଇଗଲା ।
ମିଳିଥିବା ସୂଚନା ମୁତାବକ, ୧୦ ମାସ ତଳେ ଚୋରା କାଠ ଚାଲାଣ ବେଳେ ଧରାପଡିଥିଲା ଗୋଟିଏ ପିକ-ଅପ ଭ୍ୟାନ । ଇଟାମାଟି ଅଞ୍ଚଳର ପୁଷ୍ପାଞ୍ଜଳି ହୋତାଙ୍କ ନାମରେ ଥିବା ଏହି ଗାଡିର ମାମଲା କୋର୍ଟଙ୍କ ବିଚାରାଧୀନ ରହିଥିବା ସ୍ୱୀକାର କରୁଛନ୍ତି ନିଜେ ଅଧିକାରୀ । ତା ସତ୍ତ୍ୱେ ଗାଡିରେ ବନ ବିଭାଗ ନୟାଗଡ ଲେଖି ବେଧଡକ ନିଜ କାମରେ ଲଗାଇଥିଲା ବିଭାଗ ।
ତେବେ ଏମଭିଆଇ ଓ ଆରଟିଓଙ୍କ ଠାରୁ ମିଳିଥିବା ସୂଚନା ଅନୁସାରେ ୨୩ ହଜାର ଟଙ୍କା ଚାଲାଣ କାଟି ଗାଡ଼ିକୁ ମୁକୁଳାଇଛି ବନ ବିଭାଗ । ତେବେ ଫାଇନ ଅର୍ଥ କେଉଁ ହେଡରୁ ଦିଆଯିବ, ସେ ନେଇ ସମସ୍ତେ ଚୁପ ରହୁଛନ୍ତି । ସେପଟେ ଜବତ ଗାଡିକୁ ବ୍ୟବହାର ନ କରିବା ପାଇଁ କଡା ଚେତାବନୀ ଦେଇ ଚିଠି ଲେଖିଥିବା କହିଛନ୍ତି ଡିଏଫଓ । ହେଲେ ଜବତ ଗାଡିକୁ ନିଜ କାମରେ ଲଗାଇବା, ଧରାପଡ଼ି ଫାଇନ ଗଣିବା ଓ ରାତାରାତି ଗାଡିର ରଙ୍ଗ ବଦଳାଇବା ଘଟଣା ସ୍ଥାନୀୟ ଅଞ୍ଚଳରେ ଚର୍ଚ୍ଚାର ବିଷୟ ପାଲଟିଛି ।