ନୂଆଦିଲ୍ଲୀ: ଦିଲ୍ଲୀ ଏବଂ ଆସାମରେ ଏକ ବଡ଼ ଧରଣର ଆତଙ୍କବାଦୀ ଆକ୍ରମଣ ଉଦ୍ୟମ ପଣ୍ଡ କରିଦେଇଛି ଦିଲ୍ଲୀ ପୁଲିସ। ଆସାମରୁ ୩ ଆତଙ୍କବାଦୀଙ୍କୁ ଗିରଫ କରିଛି ଦିଲ୍ଲୀ ପୁଲିସ। ସେମାନଙ୍କ ନିକଟରୁ ଆଇଇଡି ସମେତ ବିପୁଳ ପରିମାଣରେ ବି‌ସ୍ଫୋରକ ଜବତ କରିଛି। ପୁଲିସ ସୂଚନାନୁଯାୟୀ ଗିରଫ ହୋଇଥିବା ଆତଙ୍କବାଦୀମାନେ ଆଇଏସ୍‌ ଦ୍ବାରା ଅନୁପ୍ରା‌ଣିତ ଏବଂ ସେମାନେ ଆସାମର ରାମ ମେଳା ଓ ଦିଲ୍ଲୀରେ ଏକ ବଡ଼ ଧରଣର ଆକ୍ରମଣ ଯୋଜନା କରିଥିଲେ। ଦିଲ୍ଲୀ ପୁଲିସ ସ୍ବତନ୍ତ୍ର ଶାଖା ଡିସିପି ପ୍ରମୋଦ କୁଶୱାହା କହିଛନ୍ତି, ଆଇଇଡି ସହ ୩ ଆତଙ୍କବାଦୀ ଗିରଫ ହୋଇଥିବାରୁ ଏକ ବଡ଼ ଧରଣର ଆକ୍ରମଣ ଉଦ୍ୟମ ପଣ୍ଡ ହୋଇଯାଇଛି। ପୁଲିସ ମଧ୍ୟ ଦାବି କରୁଛି ଯେ ଏହି ଆତଙ୍କବାଦୀମାନେ ଦେଶର ଅନ୍ୟ ଅଂଶରେ ମଧ୍ୟ ଆକ୍ରମଣ ଯୋଜନା କରୁଥିଲେ। ଗିରଫ ଆତଙ୍କବାଦୀମାନେ ହେଲେ ରଂଜିତ ଅଲି, ଇସଲାମ, ଜମାଲ । ସେମାନଙ୍କ ଘର ଆସାମର ଗୋଲପରାରେ। ଗିରଫ ହୋଇଥିବା ଆତଙ୍କବାଦୀଙ୍କଠାରୁ ଆଇଡି ସମେତ ୧ କିଲୋ ବିସ୍ଫୋରକ, ବୋମା ପ୍ରସ୍ତୁତ ପାଇଁ ବ୍ୟବହୃତ ସାମଗ୍ରୀ, ଛୁରୀ ଏବଂ ଖଣ୍ଡା ଜବତ କରାଯାଇଛି।