ରାଜକନିକାରେ ପୁଲିସ-ଆନ୍ଦୋଳନକାରୀ ମୁହାଁମୁହିଁ: ବ୍ୟାପକ ଭଙ୍ଗାରୁଜା, ଘଟଣାସ୍ଥଳରେ ୧୬ ପ୍ଲାଟୁନ୍ ପୁଲିସ ମୁତୟନ
ରାଜକନିକା: ରାଜକନିକାରେ ପୁଲିସ-ଆନ୍ଦୋଳନକାରୀ ମୁହାଁମୁହିଁ। ଖରସ୍ରୋତାରୁ ଭଦ୍ରକକୁ ପାଣି ଦେବା ପାଇଁ ହେଉଥିବା ମେଗା ଜଳ ପ୍ରକଳ୍ପକୁ ଜୋରଦାର ବିରୋଧ କରୁଛନ୍ତି ସ୍ଥାନୀୟ ଲୋକ। ପ୍ରଶାସନ ପକ୍ଷରୁ ଧାରା ୧୪୪ ଲାଗିଥିଲେ ମଧ୍ୟ ସ୍ଥାନୀୟ ଲୋକେ ଆନ୍ଦୋଳନକୁ ଓହ୍ଲାଇଛନ୍ତି। ମେଗା ଜଳ ପ୍ରକଳ୍ପର କାମକୁ ବିରୋଧ କରି କଟକ-ଚାନ୍ଦବାଲି ରାସ୍ତାକୁ ବନ୍ଦ କରିଛନ୍ତି ଆନ୍ଦୋଳନକାରୀ। ଏଣେ ଘଟଣାସ୍ଥଳରେ ୧୬ ପ୍ଲାଟୁନ୍ ପୁଲିସକୁ ମୁତୟନ କରିଛି ପ୍ରଶାସନ। ପ୍ରକଳ୍ପ ସ୍ଥାନରେ ବ୍ୟାପକ ଭଙ୍ଗାରୁଜା ହୋଇଛି। କଂପାନିର ବିଭିନ୍ନ ଯନ୍ତ୍ରପାତି ଏପରିକି ଆମ୍ବୁଲାନ୍ସକୁ ବି ଆନ୍ଦୋଳନକାରୀମାନେ ଭାଙ୍ଗି ଦେଇଥିବା ଜଣାଯାଇଛି।
Sambad is now on WhatsApp
Join and get latest news updates delivered to you via WhatsApp
ଆନ୍ଦୋଳନକାରୀଙ୍କୁ ବୁଝାସୁଝା କରିବା ପାଇଁ ପ୍ରଶାସନ ଯେତେ ଉଦ୍ୟମ କଲେ ବି ତାହା ସଫଳ ହେଉନାହିଁ। ଗତକାଲି ପ୍ରଶାସନ ପକ୍ଷରୁ ପୁଣି ଥରେ ସଂଗ୍ରାମ ସମିତି କର୍ମକର୍ତାଙ୍କ ସହିତ ସଂଧ୍ୟାରେ ବୈଠକ ହୋଇଥିଲା। ରାଜକନିକା ବ୍ଲକ୍ କାର୍ଯ୍ୟାଳୟରେ ଅନୁଷ୍ଠିତ ଏହି ବୈଠକରେ ଏସ୍ପି, ଅତିରିକ୍ତ ଜିଲ୍ଲାପାଳ, ଉପଜିଲ୍ଲାପାଳ, ରାଜକନିକା ବିଡିଓ, ତହସିଲଦାରଙ୍କ ସମେତ ଦୁଇ ସମିତି ପକ୍ଷରୁ ପୂର୍ବତନ ବିଧାୟକ ଦେବେନ୍ଦ୍ର ଶର୍ମା, ଦୋଳଗୋବିନ୍ଦ ନାୟକ, ସଭାପତି ଦୁର୍ଯୋଧନ ମହାନ୍ତିଙ୍କ ସମେତ ଅନ୍ୟମାନେ ଉପସ୍ଥିତ ଥିଲେ। ଆନ୍ଦୋଳନ ବନ୍ଦ କରି ଆମକୁ ସହଯୋଗ କରିବାକୁ ପ୍ରଶାସନ ପ୍ରସ୍ତାବ ଦେଇଥିବା ବେଳେ ସଂଗ୍ରାମ ସମିତି ଏହାକୁ ପ୍ରତ୍ୟାଖାନ କରିଦେଇଥିଲେ। ପ୍ରକଳ୍ପ ବନ୍ଦ ନ ହେବା ଯାଏ ଆନ୍ଦୋଳନ ପ୍ରତ୍ୟାହାର ହେବାର ପ୍ରଶ୍ନ ଉଠୁନାହିଁ ବୋଲି ସମିତିର କର୍ମକର୍ତ୍ତାମାନେ ରୋକଠୋକ୍ ଶୁଣାଇ ଦେଇଥିବାରୁ ଆଗକୁ ଆନ୍ଦୋଳନ ଆହୁରି ତୀବ୍ରତର ହେବା ଆଶଙ୍କା ସୃଷ୍ଟି ହୋଇଛି।
ଅନ୍ୟପଟେ ସଂଗ୍ରାମ ସମିତି ବୈଠକରେ ଆଜି ଠାରୁ ମହାସଂଗ୍ରାମ ପାଇଁ ନିଷ୍ପତ୍ତି ହୋଇଛି। ସଭାପତି ଦୁର୍ଯ୍ୟୋଧନ ମହାନ୍ତିଙ୍କ ସଭାପତିତ୍ବରେ ଅନୁଷ୍ଠିତ ଏହି ବୈଠକରେ ମହାସଂଗ୍ରାମର ରୂପରେଖ କ’ଣ ହେବ, ସେ ସଂପର୍କରେ ନିଷ୍ପତ୍ତି ନେବା ଲାଗି ସକାଳ ୯ଟାରେ ସମସ୍ତଙ୍କୁ ଏକାଠି ହେବାକୁ ଆହ୍ବାନ ଦିଆଯାଇଥିଲା। ଆଜି ସକାଳୁ ହଜାରହଜାର ଲୋକ ଏକତ୍ରିତ ହୋଇଥିବାର ପରିଲକ୍ଷିତ ହୋଇଛି।