ଗୋବର୍ଦ୍ଧନ ମଠରେ ହୋମ୍‌ କ୍ୱାରେଣ୍ଟାଇନ୍‌ରେ ରହିଲେ ପୁରୀ ଶଙ୍କରାଚାର୍ଯ୍ୟ

ପୁରୀ: ଜଗତଗୁରୁ ଶଙ୍କରାଚାର୍ଯ୍ୟ ସ୍ୱାମୀ ନିଶ୍ଚଳାନନ୍ଦ ସରସ୍ୱତୀ ମହାରାଜଙ୍କୁ ହୋମ୍‌ କ୍ୱାରେଣ୍ଟାଇନ୍‌ ବା ସଙ୍ଗରୋଧରେ ରଖାଯାଇଛି। ଶଙ୍କରାଚାର୍ଯ୍ୟ ସୋମବାର ରାତିରେ ନିଜର ୧୪ ଜଣ ଶିଷ୍ୟ ଓ ଅନୁଗାମୀଙ୍କ ସହ ଗୋବର୍ଦ୍ଧନ ପୀଠରେ ପହଞ୍ଚିଥିଲେ। ପହଞ୍ଚିବା ପରେ ତାଙ୍କୁ ଗୋବର୍ଦ୍ଧନ ପୀଠରେ ହୋମ କ୍ୱାରେଣ୍ଟିନରେ ରଖାଯାଇଛି।

ମିଳିଥିବା ସୂଚନା ଅନୁସାରେ ଶଙ୍କରାଚାର୍ଯ୍ୟଙ୍କ ସମେତ ଅନ୍ୟମାନେ ମଧ୍ୟ ସୁସ୍ଥ ଅଛନ୍ତି। ପୂଜ୍ୟ ଶଙ୍କରାଚାର୍ଯ୍ୟ ସୋମବାର ସଂଧ୍ୟାରେ ବିମାନ ଯୋଗେ ଦିଲ୍ଲୀରୁ ଭୁବନେଶ୍ୱର ବିମାନବନ୍ଦରରେ ପହଞ୍ଚିବା ପରେ କାର ଯୋଗେ ପୁରୀସ୍ଥିତ ଗୋବର୍ଦ୍ଧନ ମଠକୁ ପହଞ୍ଚି ଥିଲେ।

Photo: Santosh, Puriକରୋନା ଭାଇରସ ଯୋଗୁଁ ଓଡ଼ିଶା ସମେତ ପୁରୀ ଜିଲ୍ଲାକୁ ଲକ୍‌ଡାଉନ କରାଯାଇଛି। ରାଜ୍ୟ ସରକାରଙ୍କ ନିର୍ଦ୍ଦେଶରେ ପୁରୀ ସହରର ସବୁ ଦୋକାନ ବଜାର ଓ ଚଳାଚଳ ସଂପୂର୍ଣ୍ଣ ରୂପେ ବନ୍ଦ ରହିଛି। ପୁରୀ ସହରକୁ ଥିବା ବିଭିନ୍ନ ପ୍ରବେଶ ପଥକୁ ମଧ୍ୟ ସିଲ କରାଯାଇଛି। ଏଥି ସହ ଚଳାଚଳ କରୁଥିବା ଗାଡ଼ିଗୁଡ଼ିକୁ ଅଟକାଇ ପୁଲିସ ସେମାନଙ୍କୁ ପଚରାଉଚରା କରୁଛି। ଏଥି ପାଇଁ ୨୪ଟି ମୋବାଇଲ ପାର୍ଟି ମଧ୍ୟ ବୁଲୁଛନ୍ତି। ପୁରୀ ସହରକୁ ୩ଟି ଜୋନ୍‌ରେ ବିଭକ୍ତ କରାଯାଇ ଲକ୍‌ଡାଉନର ସ୍ଥିତି ତଦାରଖ କରାଯାଉଛି। ପ୍ରତି ଜୋନରେ ଜଣେ ଲେଖାଏଁ ଡିଏସ୍‌ପିଙ୍କୁ ଦାୟିତ୍ୱ ମିଳିଛି। ଏହି ୩ଟି ଜୋନକୁ ୬ଟି ସେକ୍ଟରରେ ବିଭକ୍ତ କରାଯାଇଛି। ପ୍ରତି ସେକ୍ଟର ଦାୟିତ୍ୱରେ ଜଣେ ଲେଖାଏଁ ଇନ୍‌ସପେକ୍ଟର ନେତୃତ୍ୱ ନେଇଛନ୍ତି।

ଶ୍ରୀମନ୍ଦିରକୁ କେବଳ ସେବାୟତଙ୍କୁ ପ୍ରବେଶ ପାଇଁ ଅନୁମତି ମିଳିଛି। ମନ୍ଦିରରେ ଯେଉଁ ସେବାୟତଙ୍କ କାମ ଅଛି, କେବଳ ସେମାନଙ୍କୁ ହିଁ ପ୍ରବେଶ ଦିଆଯାଉଛି। ବଡ଼ଦାଣ୍ଡ ଓ ବେଳାମାର୍ଗ ଖାଁ ଖାଁ ଲାଗୁଛି।