ନୂଆଦିଲ୍ଲୀ, ୨୪/୧୨: କଂଗ୍ରେସ ନେତା ରାହୁଲ ଗାନ୍ଧିଙ୍କ ନେତୃତ୍ବରେ ଚାଲିଥିବା ଭାରତ ଯୋଡ଼ୋ ଯାତ୍ରା ଶନିବାର ସକାଳେ ଦିଲ୍ଲୀରେ ପହଞ୍ଚିଛି। ବହୁ ସଂଖ୍ୟକ ଦଳୀୟ କର୍ମୀ ବଦରପୁର ସୀମାରେ ଯାତ୍ରାକୁ ସ୍ବାଗତ ଜଣାଇଥିଲେ। କଂଗ୍ରେସ ସଂସଦୀୟ ଦଳ ଅଧ୍ୟକ୍ଷ ସୋନିଆ ଗାନ୍ଧି, ଉତ୍ତରପ୍ରଦେଶର କଂଗ୍ରେସ ପ୍ରଭାରୀ ପ୍ରିୟଙ୍କା ଗାନ୍ଧି ଭଦ୍ରା ଓ ତାଙ୍କ ସ୍ବାମୀ ରବର୍ଟ ଭଦ୍ରା ଏହି ଯାତ୍ରାରେ ରାହୁଲ ଗାନ୍ଧିଙ୍କ ସହ ଯୋଗ ଦେଇଥିଲେ। ଅଭିନେତା କମଲ ହାସନ ମଧ୍ୟ ଦିଲ୍ଲୀରେ ଆରମ୍ଭ ହୋଇଥିବା ଏହି ଯାତ୍ରାରେ ରାହୁଲଙ୍କ ସହ ଯୋଗ ଦେଇଥିଲେ। ପ୍ରାତଃ ବିରତି ପାଇଁ ଯାତ୍ରା ଆଶ୍ରମ ଚୌକଠାରେ ପହଞ୍ଚିବା ପୂର୍ବରୁ ସୋନିଆ ଗାନ୍ଧି ମାସ୍କ ପିନ୍ଧି ପୁଅ ରାହୁଲ ଓ ଝିଅ ପ୍ରିୟଙ୍କାଙ୍କ ସହ କିଛି ମିନିଟ୍ ଚାଲିଥିଲେ। ବହୁ ସଂଖ୍ୟକ କଂଗ୍ରେସ କର୍ମୀ ଓ ନେତା ଦିଲ୍ଲୀ ରାସ୍ତାରେ ରାହୁଲଙ୍କ ସହ ଚାଲିବା ଦେଖିବାକୁ ମିଳିଥିଲା। ହରିୟାଣାର ଫରିଦାବାଦ ପଟୁ ଯାତ୍ରା ଦିଲ୍ଲୀରେ ପହଞ୍ଚିଥିଲା। କଂଗ୍ରେସର ଦିଲ୍ଲୀ ଶାଖା ମୁଖ୍ୟ ଅନିଲ ଚୌବେ ଗାନ୍ଧି ଓ ଯାତ୍ରୀମାନଙ୍କୁ ବଦରପୁରଠାରେ ସ୍ବାଗତ କରିଥିଲେ। କଂଗ୍ରେସ ବିଧାୟକ ଜିତୁ ପଟୱାରୀ ମଧ୍ୟ ଉପସ୍ଥିତ ଥିଲେ।